مسلسل ريما مش كريمة..الحلقة الاولى

من طرف **زهرة اللوتس** 2012-04-27, 9:09 pm

مسلسل ريما مش كريمة..الحلقة الاولى
( مسلسل في الطول احرف من الارض الطيبة للناس اللي عندها خلوق )
مسلسل ريما مش كريمة
الحلقة الاولى
استيقظت ريما الفتاة الليبية الجامعية ذات 20 سنة على اصوات دعاء وصراخ غير مفهوم ..طلعت موبايلها من تحت مخدتها وشافت الساعة ( الساعة عشرة ونص..صبح يافتاح مازال بكري خيرها امي تعيط عالصبح؟)
ناضت ريما من السرير بالسيف ولولا صوت امها اللى اقترب من دراها شيئا فشيئا راهي ضربتها نويمة للساعة 12 ..
فتحت الام الاربعينية ذات الشعر المنتف المصبوغ بالاصفر الفاقع اللي مش ماشي معاها..باب الدار بقوة واندفاع تقول في عملية مداهمة وتبي تشد بنتها متلبسة..ولكن ريما كانت قد قفزت من السرير في اللحظة المناسبة ودارت روحها حتى بادية ترتب في سريرها..
الام بصوت عالى تقول تسمع في الجيران : ( والله ماتتحشمي انتي ..يابايرة يامضحكة البنات..شوفي عارك بنات الناس الفالحات..يا) تقاطعها ريما بانفعال :( تي خيرني شن درت !! كان على النوم شن تبوني انوض من الفجور! )
الام :( شن درتي!!! يااللي ماتتحشميش!! الكوجينة على مني امس؟؟ مش عليك؟؟ الاماعين اللي مخليتيهم من بيغسلهم؟؟ الشغالة اللي مدايرهالك بوك ؟؟ معقولة انوض الصبح بندير فطور بوك نلقى المطبخ مقلوب تقول متفجرة فيها قنبلة؟؟ وصراكة تنقيع الطناجر والله مازال اتديريها الا من نحطهملك الطناجر في دولابك!! يابايرة انداندك فاتحين حياش..و)
تقاطع ريما مرة تانية بانفعال اكتر : ( هذا كله على خاطر طشة اماعين؟؟ نحساب روحي غير اشبح شن درت..تي ماهو من اولادك وبنتك التانية اللي زي العزري!! مدايرين سبلة القراية ينوضوا في الليل زي الجنون يقلو في الدحي والبطاطا!! امالا تبيني نقعد نعس عليهم ..مفروض اللي يدير حاجة يغسل اماعينها خلاص غسلت الاماعين في الغدي والعشي شن دخلني في حوستهم !)
الام : ( هذا فاش فالحة تنوضي بسبعة السانات لما حد يكلمك..تي هذا كله من النت اللي مادة وجهك قدامه وذاهبلك شيرتك..الا مانرزيك فيه ..الا حظي اني هكي من دون الناس ..كل البنات فالحات الا المصايب الا عندي اني ..وو)
وواصلت الام شكواها من بناتها وهي تبتعد عن دار ريما وقعدت تتكلم بروحها..
وريما اللي غسلت وجهها ..وخشت للمطبخ..ولقاته للاسف قاعد مقلوب تقول فعلا متفجرة فيه قنبلة ..واخذت تقول في قلبها : ( استغفر الله ياربي..تي شن هالحياة الغبرة؟؟ امتى بتبدي الجامعة ونفتك!! فديت تقول شغالة قاعدلتهم..امتى بس بنفتك من العيشة السوداء معاهم ) وعلى انغام اغنية اجنبية فتحتها في موبايلها اخذت تغسل في الاماعين وتمصمص فيهم وتتخيل في حياة بودرية مختلفة تماما عن الحياة القريدجو اللي عايشتها..
وابتسمت من تاثير الاحلام..وقاطعها الم مفاجئ في ودانها وانخلعت..فاذا بها امها فكت السماعات من ودانها باستعمال القوة المفرطة..وصيحت عليها:( مش قتلك غسل البايرات هذا معاش تغسليه؟؟ اطلي الامعاين كلهم بعدين مصمصيهم..مش بالحاجة هذا اسمه غسل الحيلة..يا اديري الحاجة باهي يا ما اديريهاش خير)
وكملت الام اوامرها :( طلعي الحمص من الفريز وقرضيلي راس بصل كبير )
صيحت ريما : ( ووووووك شكله غذانا حاجة بالبصلة ؟)
الام :( ايه وخيرها البصلة؟؟ مش عاجباتك شمري على ذرعانك وطيبي ندادك ايطيبوا ويشكلوا مش قاعدة بايرة وتتشرطي شن تبي تاكلي..)
اخذت ريما تنفذ اوامر وتوجيهات امها وتضم في المطبخ وفشت غلها فيه لين خلاته يلمع..ووتت لامها البصل والحمص..ودارت دورة سريعة على الحوش لم تستغرق سوى ساعة..وشدت موبايلها وفتحت النت بتدير تشيك ..وجلست بهدوء لنصف ساعة
ولمحتها الام اثناء احدى جولاتها التفقدية في الحوش..وقالتلها :( هذا فاش فالحة من تصبحي عليه ؟؟ تو ينفعك بدل ماتتعلمي حاجة تنفعك) لم ترد ريما وطنشت زي عوايدها
..واستمرت الام في الكلام :( شن امالا كملتي!! نوضي ديري السلاطة بوك وخوتك قريب يروحوا) ردت ريما : ( تي شن قريب يروحوا؟؟ مازال قريب ساعة ونص على وقتهم؟؟) الام بهدوء متصنع :( وهذاكا هو انتي مهيلة تبيلك قريب ساعة تقرضي في السلاطة )
انصاعت ريما لاوامر امها تفاديا لمزيد من التنقريز وتكسير الراس..واخذت تقرض السلاطة..وقررت في هذه اللحظة قلي بعض البطاطا لان ماعندهاش نية في الرز بالبصلة..وقعدت تخيل فيها بالمايونيز والكاتشاب والهريسة واتذكرت اياماتالجامعة الحلوة...ومرت الدقائق وهي تسترجع في الذكريات ...
وصدقت امها ماهي كملت السلاطة وبدت في البطاطا لين روح بوها وخوتها الاولاد الزوز محمد اللي يقرا في تالتة تانوي ومعاد اللي يقرا في تانية اعدادي..ومروة اللي تقرا في اولى تانوي..
واخذت تسمع اصوات دخولهم وقالت في بالها :( اهم جو زي الهم بيقلبو اللي ضميته كله )
واثناء ذلك طابت القلية الاولى من البطاطا المقلية ..ودخل الاب اللي كان جوه مليح الى حد ما..ومع ان الشمس ضارباته ومصهود من الخدمة ومن رفع وجيبان الصغار اللي كل واحد يقرا في تركينة الا انه حافظ على روحه المعنوية شبه عالية..
واخذ يمازح بنته ريما وقال :( غير شن هالحاجات الحلوة؟؟ ويقولو عليك بايرة؟؟ اهو ماشاء الله فالحة وتقلي في البطاطا؟؟ ) وفتح طنجرة البصلة اثناء كلامه قائلا :( شن الغدي؟؟ شكله حاجة بالبصلة؟؟ وكان بنتي ريما تقلينا روس فلفل اخضر توا بعد هكي فساد)
وافقت ريما بابتسامة..وقالت في قلبها :( وكان نعرف كيف بوي هالحليوة اللي جوه مليح اتزوج واحدة زي امي اللي ماعندهاش الروح مع النكد )
وهي سرحانة وتطلع في الفلفل من التلاجة لم تلاحظ خوها معاذ اللي خش وخذي مجموعة من البطاطا المقلية في ايده وقعد ياكل فيها ..وشافاته ريما وصرخت قائلة :( سمسمام!! ان شاء الله غير غاسل ايديك اللي طايح تاكل بيهم!! تي خلي البطاطا ياسرك اهو بنحط الغدي!) واخذت ريما تقلي في الفلفل والزيت يتناطر عليها..ولمحت معاد وقد اخذ مجموعة اكبر من البطاطا وحشاها في فمه مع بعضها..وفي لمح البصر تنحي ريما شبشب النايلو من رجلها وتحدفه عليه ..حيث فر خارجا من المطبخ وايديه مزيتات..
وبعد لحظات كان الجميع جالسا حول السفرة وكان شيئا لم يحدث..ورائحة الفلفل المقلي مدايرة جو حميمي ماليشي حل..
يتبع في الحلقة القادمة..
منقول عن صفحة:يوميات زوجة رجل ليبي