مسلسل ريما مش كريمة..الحلقة الرابعة

من طرف **زهرة اللوتس** 2012-05-01, 4:25 pm

ريما مش كريمة
الحلقة الرابعة
بعد الخبر اللي بلطاته نادية في وجه ريما وامها ارتسمت معالم النصر على وجهها واللي زاد فرحها معالم التبلغيم اللي بانت على وجوهم..
وهي قاعدة تغلى بادرت فتحية ام ريما بالرد على كلام نادية اللي يقطر سم : ( باهي مبارك وربي يكملكم على خير..وحقا خذانا الكلام وبنسالك ونسيت..خوك حسين مواليد قداش بالزبط؟؟ اصغر من عبدالله راجلي بسنتين ولا بي تلاتة؟؟)
ردت نادية بكل صحة وجه : ( والله ماعارفة ياتلاتة يا اربعة سنين !! ) ومع ابتسامة تدل على نيتها السوداء واصلت :( صح هو كبير شوية على ريما لكن الراجل مايعيبه شي! وحسين زي ماتعرفي خدام على روحه وحوشه ماشاء الله كيف ماخلاته مرته الاولى ماناقصاته حتى عودة اوقيد)
ردت فتحية وهي شادة روحها بالسيف وخاطرها تلط نادية كفين تفسدلها وجهها وتلصقها في الحيط :( لا حق مايعيبه شي..وكان كبير ومطلق ..المهم راجل..بس عندي ليكم عروسة تناسبه اكتر من بنتي ريما ؟)
قامت نادية حواجبها متسائلة :( ومن هي هادي؟؟ وخيرها ريما حتى هي ماناقصها شي ومناسباته؟ وكان على القراية هي من امتى فالحة فيها اصلا وماعندها ماتدير بيها وبعدين المراة سيورها تقعمز في الحوش !! وكان سكرت راسها وتبي تكمل هاوينا تستعد هي وياه ومرات يخليها تكمل!)
ردت فتحية اللي حتى صوابع رجليها اتشنجوا من الاعصاب : ( لا شن ريما ! ريما جاينيها عويلة قبلكم وشبه تام الموضوع..غير مابيناش نقولوا على خاطر انتي عارفة الحاجات هادي الواحد مايحكيهاش خير ماتندريش على النصيب لين يبدا كل شي رسمي ..و)
قاطعتها نادية وخليقتها انقلبت بعد ماسمعت الخبر :( صار هكي..ومن هما العيلة ومن وين تعرفوهم؟؟ وتو معقولة ولدهم بيجي خير من حسين خوي اللي تعرفوه وعشرة عمر؟؟)
وفي هذه اللحظة بلقو عيون ريما بعد ماسمعت اللي قالاته امها وقالت في بالها :( زعما فيه منها الدوة رسمي واني مانندريش!! ولا غير امي تفلم على مرة خالى ؟)
كملت فتحية كلامها وشادة روحها بصعوبة على انها تحدف مرة خوها بالمزهرية اللي قدامها وتفشخها :( غير خلينا من ريما وخليني نقولك على العروسة ..عرفتيها مفيدة بنت جيران حوش امي ؟؟)

ردت نادية بانفعال : ( من مفيدة اللطف مازبطتهاش ؟) واصلت فتحية :( مفيدة بنت جارنا الحاج محمد الله يرحمه اللي يسكنوا وراء حوش امي بالزبط !! العفو معقولة مازبطتيهاش!!)
شهقت نادية وصيحت قائلة :( ان شاء الله قصدك على مفيدة اللي زي الختشة !!! هاديكا الدرويشة اللي ذقنها مرخي !! واللي قريب انديدتك في العمر!!! )
قاطعتها فتحية : ( حرام عليك شن ختشة وذقنها مرخى!! بالعكس ماشاء الله عليها بنية محترمة وعمرها كله قايمة امها وبوها لين اتوفوا وايدياتها زي الدهب في القضية والضمان وعلى فم ساكت وكانك على العمر اصغر من خوك حسين ومناسباته عاقلة وزرينة )
انكمدت نادية بعد سماعها لهذه الكلمات ووجهت حديثها لبنتها سلمى :( كلمي بوك قوليله قاتلك امي تعالى روح بينا توا ولا والله نروح على رجليا)
وقالت فتحية بمجاملة كذابية :( غير خيركم اللطف ؟ مازال بكري!! من كتر جيانكم انتم ؟ غير اقعدوا نتعشو مع بعض)
ردت نادية منفعلة :( خيرنا؟؟ معقولة نجيكم نبي ريما لخوي حسين تقوليلي على مفيدة؟؟ الحق مش فيكم ..الحق فيا اني اللي وديت ريما بخوي حسين !)
وردت عليها فتحية :( الماخذة نصيبات واني الحق عاجبتني مفيدة ووديت بيها خوك حسين زي ما انتي وديتي ريما بيه !وريما زي ماقتلك جايها عريس كويس ومناسبها في العمر )
ولم يقطع هذه الحرب الباردة سوى صوت الكلاكس المكمود متاع سيارة سالم ..وصوت نادية وهي تعيط على صغارها بش يطلعوا ..وروحت نادية وصغارها وسقدتهم فتحية اللي شكت ان جاها الضغط من كتر ماصدعت..وبعدما ربطت راسها بتسمال مع ليمة عصر خشت على ريما في دارها ولاول مرة من فترة طويلة حيدور بين ريما وامها حوار من نوع مختلف..
يتبع في الحلقة القادمة كان مازال عندكم خلوق