مسلسل ريما مش كريمة..الحلقة الثالثة

من طرف **زهرة اللوتس** 2012-04-27, 9:12 pm

ريما مش كريمة..الحلقة الثالثة
بعد السلام والاستقبال انطلق موكب حوش الخال نادية والرتل اللي جايباته معاها من السقيفة الى دار التعقميز ..والصغار منهم انطقلو يجروا في انحاء الحوش بحثا عن معاذ..
وقعمزت نادية وبناتها مع فتحية وريما ومروة اللي سلمت واختفت زي عوايدها ..
وقعدت ريما تشبح لمرة خالها وتقول في بالها : ( مرزن دمها هالمراة..سم صافي قريب يطلع من عيونها..كان مرة عمى امي تقول عليها لفعة معناها هادي تمساحة)
ونقلت ريما نظراتها لسلمى النسخة المصغرة من نادية ..و اللي كانت تقرا في نفس الجامعة مع ريما لكن في كلية مختلفة وبيناتهم تاريخ حافل من التوتر والتلقيح واحيانا حتى التشوشيد المتعمد وغير المتعمد..وقالت في بالها :( والله ماتتحشم هالفرخة..مبرد وجهها..تو واحدة مدايرتلي قداش موقف زي خليقتها وجاية مادة وجهها في حوشنا!! حلال فيها انوض نريشها توا )
وبابتسامة ودية نظرت ريما الى سلوى وقالت في بالها :( الحق البنت هادي مش ليهم جاية غلطة في حوش خالي احسن واحدة فيهم كلهم)
وفي خضم الابتسامة جاها سؤال من نادية :( اللطف ..ياكريمة..خيرك سمنتي هكي شكلك شادتيها ماكلة ورقاد طول العطلة !!)
وفي هذه اللحظة حست ريما ان الدم كله ركب من جسمها وجي في راسها وقعد راسها ينبض بقوة..واتمنت لو تهجم على مرة خالها نادية وتطيح فيها نتش وتخبيش لين تعلمها الاسلوب..بس سيطرت على روحها لانها شبه تعودت على اسلوب مرة خالها واتعلمت كيف ترد عليها ..
وقالت بضحكة متعددة الاغراض :( خيرك يامرة خالى شكلك كبرتي ومعاش تسمعي كويس!! قداش مرة قتلك اسمي غيرته ..ريما..معاش كريمة خلاص..من الابتدائي مغيراته راهو! لين نسيته اسم كريمة خلاص!! وكانك على السمن وينه بالله؟؟ يارتني نسمن حتى زوز كيلو!! قاعد وزني زي ماهو!! وخايفة نولي معظمة ومدابيا نزيد )
قالتها وعطت نظرة لسلمى باشارة ضمنية لنادية ان بنتها سلمى ينطبق عليها وصف معظمة..
وقالت فتحية في محاولة منها لترطيب الاجواء :( الحق هي السمن مانشوفش فيها سمنت..لكن الرقاد هذا اللي فالحة فيه..هو و ارزينا فيه النت اللي من تصبح وهي مقابلاته )
نطت سلمى زي عوايدها كل ماتجي سيرة حاجة لازم تغتنم الفرصة وتشكر روحها كان امها ماسبقتهاش وبدت تشكر فيها :( مبعد سنيني عليه النت..الحق يضيع في الوقت هلبة اني ماعنديش ليه خلوق بكل ..محلاها التقعميزة بحدا ماما والتهدريزة معاها عندي بالدنيا وما فيها )
وعضت ريما على شورابها في محاولة منها لكتم الغيظ وقالت في خاطرها :( كان مانعرفش الاكاونت اللي مدايرتيه بالدرقة نصدق ونقول حق !!! اه ياكبادي شن بيصبرني عليها لين تنتلف هي واماليها ويروحوا)
وفي اثناء ذلك عطت فتحية تفنيصة من اللي هي لبنتها ريما..واشرتلها باشارة مبهمة تنوض تجيب حاجة يشربوها..
وفرحت ريما بالافراج وطلعت للمطبخ..وهي تفكر :( والله مامرتاحة الا مروة اللي جابدة روحها بسبلة القراية ومفتكية من خلطة الدراهات ..ماحاصلة فيهم غير اني )
وفتحت التلاجة في عملية استكشاف سريعة : ( تو شن بنمدلهم هي!! جايين في القوايل ومن غير موعد!! من وين بنجيبه العصير توا!! )
ونادت بصوت عالي :( ماااااااااااااااااااااااااااااااااااما)
وردت الام : ( تعالى اهني مانسمعش فيك !)
اتجهت ريما لدار التقعميز وهي تقول في بالها :( تو زعميتك ماتسمعش فيا ..ربي يصبرني وخلاص )
وقالت لامها : ماما تعالى كلمي ولدك معاد نبي نبعته يجيب حاجة..وعارافاته مش حيسمع كلامي..
قاطعتها نادية : ( كان على خاطرنا والله ماهي صايرة ..العفو احني من العيلة )
ردت فتحية بوجه تعلوه الحشمة :( حوش خالك مش برانية ياريما..ديري حتى طويسة شاهي..وجيبي البسبوسة اللي درتيها امس )
طبست ريما على امها وكلمتها في ودنها :( اما بسبوسة !! ولادك هنو عليها من امس )
نطت نادية اللي واضح انها كاسرة ودنها معاهم :( ياخسارة ياسلوى ياريتنا جبنا من الغربية والمقروض اللي درتيهم امس!! كله من سالم دهبلنا شيرتنا واستعجلنا ..تي كان ضقتيهم يافتحية ..سلوى اللي تشبحي فيها اتدير في حلاوات زمنية زي العسل والله الغريبة ماتقولي خاشة للكوشة واتذوب في الفم ذوبان )
ابتسمت فتحية ابتسامة كذابية وقالت :( ماشاء الله عليها سلوى من يومها فالحة ) ووجهت الكلام لريما بنظرة مستحيل ماتفهمهاش:( حوش خالك مش برانية ومعاد قوليله امك قاتلك ومايقولك شي)
اتجهت ريما تاني للمطبخ والمرة هادي ناضت معاها سلوى تساير فيها..وقررت تدير بسبوسة على السريع ..وبعد تهدريزة مع بنت خالها فات الوقت وجهزت البسبوسة بعد ما مدت العصير اللي جابه معاذ ووتت سفرة الشاهي وقصت البسبوسة اللي قاعدة سخونة..وخشت عليهم في الدار لتجد امها وجهها اصفر تقول مجبودة من قبر ..واستغربت..( شنى زعما اللي قالاته مرة خالى ودار في امي هكي؟؟) وبعدما كملت مدان وقعمزت ..جتها الطامة ..
بلطت نادية الجوهرة اللي جاية على خاطرها وقالت :( يا كريمة توا كي..)قاطعتها ريما: ( ريما يامرة خالي ريييييييييييما) واصلت نادية :( كيف كنا جايبين في سيرتك..قلت لامك على خبر حلو حيفرحك ..عرفتي خوي حسين؟؟ يبي يخطب واني قتله ماتلقاش خير من كر..قصدي ريما وقلت خلي نقوللكم قبل مايجو بقية العويلة )
في هذه اللحظة تجمد الدم في عروق ريما واتمنت لو في ايدها موس دبح ولاشيتة تحدفها على مرة خالها وترشقها في راسها ..(معقولة توصل بيها صحة الوجه بتخطبني اني لخوها حسين ؟؟ اللي مطلق !! وقريب نديد بوي!! وزيادة خبر يفرحني!!حي عليها مني هالمسمومة!!حرام فيها البسبوسة )
وهي قاعدة ترحي وتفكر شن ممكن ترد على مرة خالها رد يوقفها عند حدها..واصلت نادية ووضحت اكتر السبب الحقيقي لجيتها :( ونسيت ماقلتكمش..سلوى شبه تمينا فيها ..جونا عويلة يخطبو فيها وماتو فيها..وولدهم هبل فيها..ومانحكيلكمش العيلة كيف..امورهم امبحبحة وراقيين على الاخير...والعريس امالا ينزمط زمط..وحوشه بروحه واحتمال يمشي يحضر برا )
وبعد هالكلمتين فتحية وجهها ولى احمر وحست ان دماغها شيط والدخان طالع من ودانها وردت على نادية رد حيغير حياة ريما..
يتبع في الحلقة القادمة..
منقول عن صفحة:يوميات زوج ليبي