موش كلّ سكّات حمّال .. للشاعر/ مصباح الفاخري

موش كلّ سكّات حمّال .. ولاكلّ من عاب خايب
ولاكلّ من راجا طال ..ولا بالبكاء اتجيب غايب
ولاكلّ حكّاي نشوال ..ولاكلّ من شاخ شايب
ولاكلّ من حطّ شال .. ولاكلّ راي صايب
ولاكلّ مال من حلال.. ولاكلّ صلاّي تايب
ولاكلّ برق سيّال.. ولاكلّ مزن ذايب
ولاكلّ من جاك ساوال .. مرّات شامت وعايب
ولاكلّ من هاب ذلاّل.. كبير عقل والشرّ هايب
ولاكلّ من دزّ مرسال.. يجنيله أثمار طايب
ولاكلّ من دار مال .. بيه ينطرَه فـ العرايب
ولاكلّ راجل أفعال .. مرّات قوله كذايب
ولاكلّ صاحب أقوال .. أنقول قال وأنجيه جايب
ولاكلّ زمّاق زعّال ..يرضَى أبلوم وعتايب
ولاكلّ من ناض قال .. والسامع إيريد السبايب
ولا الشعر كي الموّال .. أللي أعياط فيه وقلايب
وكثرت أبصارة العيال .. أتجيبلك أمغير الهزايب
يا العقل ليش منهال .. والرّايات تمّن ذهايب
يحفظنا ألله م الضلال .. هذا وقت فيه العجايب
فيه الفتن والقتال .. أللي هن أكبار المصايب
فيه قيل قالوا وقال .. وأفراق بين الحبايب
اليوم فيه ناضوا أجيال .. شرّابة سكير وغضايب
والحق حق ينقال .. حتى انكان ضدّ القرايب
مامن أللي كانوا أبطال .. إيخشّوا النار واللهايب
خاضوا أحروباً أطوال .. أوقات كرب وأخرى جدايب
منهم أجدود وخوال .. إيحاموك والبخش ثايب
إيصبّوا أن صار القتال .. أمصاباة أجيوش وكتايب
فراسين ماهم أذلال .. إيردّوا النيب م النهايب
لايبخلوا لاهم أبخال ..ضرّابة غزال الجلايب
أن جاهم الضيف أبعجَال .. إيدنّوا طعام الضرايب
أسماح الوجوه والفال .. أنياهم انظاف م العوايب
كسّابين للي ام أشمال .. أللي أصواتها بالرجايب
قطّاعة أغرود وأرمال ..أتشيل فى احمول وصلايب
هدير ثلبها فـ الليال .. أرعود نوّ عازق عصايب
لاتعلف شعير لا بال ..ولا أتبات جوّه زرايب
ناظره امعاهم دلال .. رفاقاك ياأم الجنايب
ماأتقول كانوا أنزال .. أديارهم بعدهم خرايب
عليهم أتقول شلاّل .. أدموعي سكايب سكايب
والتاريخ ثابت أرجال .. وشامل جميع الدرايب
وعندي كلام فـ البال .. كاميه حاسب حسايب
ألله يدوم مايدوم حال.. وكلّ شيّ لله سايب
راهو العمر حتى أن طال.. صيّورك أتسير للترايب
والصلاه والسلام ياالعقّال .. على شفيعنا من العذايب

مشكـــــ وبارك الله فيك ـــــــــــــــور