ملحمه من القصائد الليبيه, قصيده عاطفيه من الترات الليبي

من طرف **زهرة اللوتس** 2012-06-02, 12:24 pm

ملحمه من القصائد الليبيه, قصيده عاطفيه من الترات الليبي
كان الشاعر الشعبي المعروف ( بوعجيلة عبد السلام القبائلي ) احد شعراء مدينة اجدابيا ماراً في أحد الايام امام منزل فتاة في مقتبل العمر فداعبها ولكن الفتاة صدت الباب في وجهه فابتسم وبسرعة بديهة ورد على لسانه هذا البيت :
لوكانك من جيلي..انّصبي على بابك بطوله ليلي .. شحات للغلا
ومرت الأيام والتقى بزميله الشاعر ( عبد السلام بوجلاوي ) وحكى له ما حصل له وبسرعة بديهة رد عليه بوجلاوي قائلاً :
لو كانك من ندّي = مانرد من ردت الباب انعدي
انخبط برجلي كيف تبطل يدي = نين يشغلك مطراي وتحليلي
كيف تفتحي عندي اسلوب تجدي =ضروري ان كانك مسلمة ترثيلي
ونسيل ان سالتيني فيه انبدي = سريب سرد سهرايه سبب تسويلي
نين للغلا يد ليمين اتمدي = وابها تعزقي احسنات في منديلي
ومرت سنوات وتزوج ابن الشاعر بوعجيله عبد السلام ورزق بمولود وحضر بعض الشعراء والاحباب مهنئين له وسأله احدهم ( هل مازلت شحات للغلا يا بوعجيله ) فرد عليه قائلاً :
مازلت نا هو نا .. حتى ونا ضناي مخلفين ضنا .. شحات للغلا
واليكم قصيدة صاحب هذه الملحمة الشاعر بوعجيله عبد السلام الذي يقول :
مازلت نا هو نا= حتى ان كنت داير صاحبه وضنا = شحات للغلا
مازلت ما غتنيت = حتى ان كاني عاقل وباني بيت
تقولّي سعيد نقولك ياريت =عايش امعيشه ما عليك ابها
قولو الناس على سماحة صيت = ونا اتقول طيب الصيت قطع الوا
تلاشى دلالي لوّلي وانسيت=اعزاز دنوهم للعقل كان دوا
مازلت نا هو نا
مازلت من وجداني = نعشق ونا عارف احدود مكاني
واخذ نصيبي م الغرام الفاني =امغير شيمتي في غيّتي الوفا
ومازلت متمسك بقو ايماني=وعارف الدنيا موش دار بقا
وحتى انكان هو الزمان موش زماني =امسايرينه وادعا ايحد ادعا
مازلت نا هو نا
رغم اتعابي = ورغم الزمان اللي مضى شبابي
مازال لي مكان بين اصحابي= نرتاح كان ساقني الهْم اخطا
ومازلت داير ليبيا محرابي = وندعي الها في كل وان صلا
ومازال رايي في الشباب ايجابي = حتى انكان فيهم تختلف لاراء
ومازال يلمع من بعيد ركابي =من يومن اركوب الخيل بامزابا
ما يهمني كان الجواد كبابي = واجدين غير يلهدوالا بعصا
مازلت نا هو نا
هذه هي قصيدة الشاعر بو عجيلة عبد السلام التي تحولت إلى ملحمة الهبت مشاعر الشعراء مما دفعهم إلى الرد عليها كل حسب هواه فمنهم من سرد بطولاته العاطفية السابقة واصر على مواصلة المشوار ومنهم من تحدث عن ماضيه ولم يواصل المشوار ومنهم من سلم للكبر و ( حط المذاري عالتبن ) ومنهم من تحدث عن الدنيا وامورها ......
مازلت نا هو نا .. حتى ونا ضناي مخلفين ضنا .. شحات للغلا
من هنا تغير رأس البيت ونال اعجاب جميع الشعراء في جميع انحاء الجماهيرية وتناولوه بالرد .. وتحضرني رؤوس الابيات لبعض الشعراء الذين سنورد ردودهم على قصيدة بو جلاوي حسب ما يتوفر :
على الساعدي الفاخري يقول :
مازلت نا هو نا = على ماطرالي في الحياه وجرا = نظيف معدني
وقال محمد بوهارون الزوي :
مالت نا هو نا .. حتى ان كان قالو لا مشى لا جا .. شور دارهم
وقال عوض الهوني :
ما نيش نا هونا .. شاب الشعر والعين فيها دا .. وكيف عاد اتريديني
وقال ادريس الشيخي :
يا حاج فرقت نا .. في بوغثيث تقول غيم اشتا .. رجاي منقطع
وقال عمران القزون :
مازلت نا هو نا .. مغير ما نشوش امعا سريب نسا .. وفي غيرهن
وقال عبدالسلام الحر :
مازلت نا هو نا .. نشعر وراسي ما عليه اغطا
وقال مصطفى الشلماني :
ما زلت نا هو نا .. نجري على قوتي وقوت ضنا .. في عازتي
ويقول حسن البوسيفي :
مانيش نا هو نا .. خذيت قرعتي والصغر لي انتهى .. مواطي النظر
ويقول حسن شاكر الهوني :
مازلت نا هو نا لوّل .. صابر على جور الزمان امهوّل
لو انموت لا نشحت لا نسوّل .. ولا عبد منّه نطلبه الرجا
وتقول فاطمة عبدالله :
مازلت نا هي نا .. لا نروم عيب ولاندير خطا
ويقول عبدالله بالروين :
مازلت نا هو نا .. حتى ان كان شيبي عالسواد طغا
(عبدالسلام إبراهيم طاهر بو جلاوي ) الشاعر الذي اشتهر شهرة واسعة في شرق البلاد وغربها وجنوبها ويتلهف الجميع للقاء به وسماع الجديد من أشعاره المنمقة وانتقائه للكلمات البدوية الاصيلة كقصيدة :
اللي العين ما رضيت بزول بديله .. مقطوع الرجا فيه بكل وسيله
وقصيدة ( ميموله خلاف ) وقصيدة ( الهاتف ) :
ما عد علي ترنّي .. ما يسمحن عدة ظروف وشني .. معاك بالغلا
ويقول الشاعر عبدالسلام بوجلاوي رداً على الشاعر بوعجيلة عبدالسلام في ملحمة ( مازلت نا هو نا ) :
مازلت مسّع رقت = ولسّع انسيت من فارقت
تقول ما اوصل منهم الا هالوقت =خبار ياسهم دوبه عليّ لفا
وما من افراق نهاره ذقت = لها امعاي ما زالن ابواقي دا
مكتوب في جبيني من نهار اخلقت = بنار الغلا نسمر ولا مه لا
مازلت نا هو نا
مازلت للزينين = نشارف ونا شارف علي الخمسين
ومازلت لا توا نموج حزين = اطربي شال في جرة امناي جلا
مازلت ما نقبل إللي هالحين = من جهة امعزى في عزيز عزا
انظاري تقول مفارقات جنين =مجهول المصير انحاز بين اعدا
و لا بن ايهوننه بطول اسنين = غلا اشرب عليه زمانا وكلا
مازلت نا هو نا
مازال عقلي خضر = ايام لحصاد نريد نبذر بذر
علامات كبري ما عليهن عذر =. امراض مالهن عند الطبيب دوا
والياس مانع الغيه وفارض حظر=على من لصيف الشيب فيه بدا
خطيه كبيرة ملفته للنظر = ان كان دارها منا اينال جزا
والناس عندهم لازم يموت الجذر =ان صاف الورق ماله يجوز بقا
شين الملابس في نظرهم قذر= حتى لو ابقي طاهر نظيف عضا
مازلت نا هو نا
مازلت كي ما كنت = ان صاوبت صوب امصاوبتني صنت
ولا من امنّي حياتي خنت =مبداي صدق قول وفي لوعود اوفا
وكنت اللي نجرح اليوم اطعنت = بلا اجراح طاعني سليم مشا
الحاصل على جنس الصبايا هنت = ما عد انذيبل غاليه بغلا
ولا ان بنت تفرح غير بنتي بنت = تقول لمها يا أمي الغايب جا
ولا لي عليهن لوم شبت وشنت = وفي هالمجال الكبر راه اخيا
حتى ان قلت مازلت له مالنت = حقيقة وياجب لعتراف ابها
الصوب سريبه ع اليسار ركنت = بنيت فيه كم عللي وبتت خلا
ومازلت صامد كيف ما قلت انت = وفيهم انراجي كان فاد رجا
مازلت نا هو نا
مازال في دوامه = مدورد عليه جذار عقلي ضاما
يمشي مع ايهن عدو دروب امامه=يخاير وحاير ما قرار خذا
ايخاف اللصيف يغر به يتعامى = عليه عالضما لوّلي يزيد ضما
اختامه اوقات يصلح غلطته بندامه = بلا مشربه خلف السراب جرا
ويطالب نهار ليل باستسلامه = الياس قاله سلم وهو مابا
حتى والسلام اوقات فيه سلامه = وناظر لغيري ما جرا وطرا
رفضت الخضوع وسلطته واحكامه = وله ما ركعت ولا طلبت جدا
نعيش صقر يوم ولا اسنين حمامه = ولا لي على عير الكريم اعبا
مازلت نا هو نا
مازلت في تياري =انواري نويت وما قدرت انواري
اصروع الجواد اطلقت في مشواري =وين م الجضر والغيض بي مشا
ومن قبل ناصب ع الغوالي طاري = بكيت ما قضيت الياسهم ببكا
اللي افرقهم شوش جهاز افكاري = ما قبل حوته من جديد صفا
وتمن ايشوشن للجميل انظاري =كيف ما يريدن في زمان مضى
ولكن الشي اللي عليهن طاري = لا عذر فيه ولا عليه اغطا
زرابهن مرض من حكم ياس اقراري =اسماه كبر سن بواجدين زرا
وجدت الصوب ما ولول بحكمه ساري= معمول بيه الوصوب القديم لغا
عقبت وغلبني ما اقدرت انجاري = الجيل الجديد اللي عليه نشا
لا اقدرت نوقف عند شوكة جاري = نعاكس صبايا عامدات عزا
ولا طال يالا مدرسة انتظاري = لفرعة بنات مسرحات غدا
جميع ف كتاب خليل ماني قاري =فنا مع الشباب اللي خلاص فنا
انظاري عوضهن في الطرب عالباري = له مابقي مما عطا وخذا
ولكن ابها بكل هوايد ضاري = يهفن ان جاهن العزيز نبا
يروقن اشجارهن واشجاري = عروقهن يطولن في عقاب ثرا
مازلت نا هو نا
كانن ايام الماضي = يجن في المنبي والجميل غراضي
ان كان قلبه م الغوالي فاضي= يلبي ندا قلبي ان ذاع ندا
وامعاه ان لفظت انكون عند القاضي =ما يصير من شوري امعاه خطا
وديمه عميل الغيرنا متغاضي=في ىخر المطاف ايهد ما ابتنا
ونصبح سوا راضي اوماني راضي = نصيبي حسايف م الغلا وشقا
الحاصل عليا تقول حاكم قاضي = ابياس ما يطالقني مدى الحيا
كمّين جاينه جتني العقل تشاطى=حتى وهي قويه راضيات ابها
مازلت نا هو نا
مازلت ماني ناسي= سريب الغلا اللي ثقب حماسي
ريح من غلاه توزّ في مقباسي=ما همدت واخمدت نين هفا
امعاه قبل من لاماه نحتم ياسي = ما انسيتهن عايش ايام زها
اوين ما صدر حكم لفراق القاسي = اللي اضحكتها ردت علي ابكا
مازلت نا هو نا
مازلت في موّالي = حتى ونا كبير وبزوجتي وعيالي
وكبرن وتمن من بنات اجيالي =عجايز ونا راسي الشيب كسا
ولا عد بصوب خليل يزهى بالي = ربابيط والا معنوه واغنا
وحتى ان قلت نترك هالصوب البالي = فايحات ما نعرف اندير اجوا
واللي ما عليه انغلا عيب انغالي=حتى لو اطري لمرضي فيه دوا
سقايهن ان ماتم السواقي مالي = ويهاوي ولا قط للضوّال عصا
يصابن بعيد وهن اعطاش اجمالي=اثقال ما يداعيهن زقيق ارشا
نين م العطش يفنن خلا في الخالي= ولا م السما ينل شراب سما
مازلت نا هو نا
ثم اتجه شاعرنا كغيره من الشعراء المشاركين في هذه الملحمة إلى عرض احاسيسه واستعراض اموره الخاصة متحدياً من اراد المساس بشعره وتحريف بعض الابيات وهو خير من يتحدى وهنا لسنا بصدد سرد هذه الامور الخاصة ولكن دون شك بعض القراء والمتتبعين لهذه الملاحم يعرفون جيداً ما يقصده شاعرنا عبد السلام بوجلاوي من خلال ابياته التي لا تحتاج إلى شرح وتوضيح كقوله :
مازال ماسك داره .. الخاطر مع اللي يعرفو مقداره
لجواد بينهم بالكبر زاد كباره .. كبير عندهم ولهم عليه عنا
وحتى لو شكرهم ماي عليه معاره .. للناس لملاح الشكر رد اكفا
ولا من شكر واحد يجير اشكاره .. الزين من امعاي ايزين قال اجحا
ولا من قرض ينساق في تياره .. لا ذم واحد لا مدح بإيحا
ومزال يبسط في العرب باشعاره .. كان البحر عنده اصفي وهدا
وان هاج وتغضب يا شقي بحاره .. قليل وين ياجد م الغراق نجا
واخيار الكلا م يفيد باختصاره .. حتى وهو قليل ان كان دل كفا
بلا شرح يعرف مقصدي بافكاره .. الفاهم الليربي عطاه ذكا
مرسولك انكان احسنت في اختياره .. على من رسلته ما يريد وصا
مازلت نا هو نا
مازلت ماسك حدي .. على ما تركني فيه بوي وجدي
لا ننجرف في دفع سيل امعدي .. ولا يزحزحن ساسي ارياح اقوا
ولا يوم يبهت معدني ويصدي .. معا صهدصيف ولا جمود اشتا
ولا يغيره طل الربيع ايندي .. خوغ م الندى يردي عليه صدا
وهي للمشاكل والحساي اتودي .. ما انتبع اللي في طريق مشا
وغالي علي الحق حتى ضدي .. نقوله وما نطلب عليه جزا
مازلت نا هو نا
مسّع لاكنت الغلب .. ولا عمر طيبني ابواخ الجلب
ولا يرد صيدي من نبيح الكلب .. ولا يعن قافلتي سطير اجرا
ومازلت كيف نزوم زومة ثلب .. هدير فرخها ينقص يعود ارغا
ومازلت نحمل في الجواجي قلب .. يفيض بحنان وعطف خير عطا
ولكن شديد عنيد قاسي صلب .. سريع يتحول كان لمر دعا
مازلت نا هو نا
نتناول احد الردود الرائعة على ملحمة مازلت نا هو نا .. وهو من الردود الرائعة التي نالت اعجاب كل من استمع إليها فمن منا لا يعرف الشاعر المبدع علي الساعدي الفاخري الذي انتشرت قصائده في ربوع ليبيا وهو أيضاًَ من الشعراء الذين اسهموا في إثراء هذه الملحمة والتي تدل على وعي الشاعر وتفتحه وثقافته والمامه بالتاريخ والاحداث السياسية المعاصرة وامور الحياة وادابها وتعامل الانسان مع اخيه الانسان
فتعالو معي لنقرأ ما يقوله لنا شاعرنا ( علي الساعدي سعيد الفاخري ) يقول :
مازلت نا هو نا .. على ما طرالي في الحياه وجرا ..نظيف معدني
ما زال في إحساس .. وضمير إيتعذب من عذاب الناس
وما زلت نعطف رغم حقد الياس .. حتى إن كان ما عقب علي نما
قلع غرستي مالارض مالاساس .. ونشرها مع الارياح في الصحراء
حتى وهي هشيم وعروقها يباس .. كي قبر حاتم مي أحساب خلا
والمركب أتضره كثرة الرياس .. أن سافر و جاته عاصفه هوجا
ونا مركبي منسوخ بالحراس .. وين ما علي شط النجاة رسا
واللي قستا ما قاسها تراس .. طاحناتني الايام طحن رحا
امغير للمصابي درت قلب أنحاس .. وعبرة عبرة اليابان للمأساة
وما زال قلبي ما علن الافلاس .. قاعد رصيده للهموم دوا
وما زلت متماسك مثيل الساس .. كيف هرم خوفو عل الزمان عصا
وما زلت صامد كي جبل لوراس .. رغم هزات الدهر الاقوا
و الله يقرضك با بذرة الدرياس .. ربيع وطنها ديما عفاه جفا
وهناك كيفه من البشر أجناس .. اصحاب الفتن و الحقد و البغضاء
والله يلعن الوسواس و الخناس .. اللي للمحبة و الاسلام اعدا
وتحسير المذابح هو جزا لجناس .. لكن جبيني فيه عرق حيا
وما زال فيا الشعر للدراس .. أدروس وتجارب موعظة وهدا
وما زلت داير للرفق مقياس .. مصافي انصفي في الرفيق بها
أصحاب المروة قرعة المنهاس .. اللي في النوايب يوقفوا بسخا
معادن كريمة كي أحجار الماس .. علي كل ما تقدم أتزيد غلا
أن جا الياس يلقاهم أشداد الباس .. وأن جاهم رخا صفوا وعطا واحما
ونكره الغدر ساقيني الغادر كاس .. من طبيب في سكرة عطش واغما
و الظلم يا من البست الباس .. لا اتكون لي ولا أنكون لها
وهو ذيب يوسف حاس والله داس .. والله أنظره من دم الكريم دو ا
ترايوا عليه وركبوه حساس .. وشال وزر يوسف نين يوسف جا
مالي وما الزير و الجساس .. وحرب البسوس وداحس والغبراء
أستوعبت درس الشنفرة حساس .. من أمته الموتى يفهموا الاحياء ؟
وان كنت ورا عمران في الكياس .. أنشوف في بصيص الجدي و الجوزاء
أنحط الرحيل ونلتقط الانفاس ... ونحدد مساري قبل كل اوتا
و انشق الطريق الموحشة بحماس .. ونكون للخلا عابي بكل عبا
يا عصر فيه طموحنا ينداس .. من أي الكواكب جيت وأي فضا
ثقب الاوزون أزعمه واستقراص .. و الصحن اللعين إيغيرن الاشيا؟
أنحوس في متاهه حايسه محتاس .. امراه عكس امراه فيها انا
أستنجدت و خفت وصارلي إلتيباس .. وردن علي صوتي ألفين صدا
وحاولت مسك القلم و القرطاس .. ونبلغ صلاح الدين قالن لا
و جا العم ( جنكيز خان ) فوق خماس .. ب امغلف العنقاء
و الصليب والقديس و القداس .. و حرب النجوم وهالة العذرا
من شرق يثرب لا مغارب فاس .. عليه نفذوا الاحكام الاشقيا
الموساد نصب كم صنم تفساس .. ايردد افكاره كي الببغا
وربطهم ( شوار سكوف ) ربط أركاس .. رموز العرب في املوك في رؤساء
رسالة إلي الفاروق وألتماس .. الاسلام طالب في الاسلام أفتاء
الإسلام عندنا غيله وطعن أمواس .. وردت جميل الطيبات أذاء
والاسلام في إنحدار وأنتكاس .. شيع وماع وهدم ما ابتنا
ويا عمر تما حجنا (تكساس) .. ودين من النصارى و اليهود إيحا
وياعمر مجلس الامن و الجلاس .. أكلاب رامبوا تنبح علي من شاء
نصح عمر بالحسين و العباس .. وثورة الحجارة واطلبو الفناء
وما زلت نا هو نا
ما زلت له مشتاق .. إللي هزني فرقاه من الاعماق
وسادل وراه أسدال ما ينطاق .. أستار ياس ما يجدي امعاه رجا
ويجي في منامي جية السراق .. ويحايي معاي امراض لي شفا
ونسبح وراه أنجول في الافاق .. خيال حلم ما يملى فراغ لقا
ويا تعس قلبي ما صفا لا راق .. ولا عاد يامن في جناب مرا
ودع زهاه مع غروب شفاق .. غلا بعده ما يالف حنان غلا
ويا حسرتي موعر سعير افارق .. أفراق جز مني ما امعاه نجا
إيكابر مع علة مرض ما تاق .. مرض سوس ينخر في حشاه دبا
كما غيض قهره و المرض عواق .. وعزايته شوامت فيه ما أشتكا
قلبي الطاهر ما عرف نفاق .. أمعاه الخساسة مي اردود اكفا
طموحه كبير وللعلا تواق .. ودونهم ضنا يعقوب قطع لوا
مصقول صقل السيف م الدقاق .. سابكاتني الايام عود شقا
وخليهن أن مالن ياخذن غنداق .. أساع ينصفن الايام يوما ما
ويبكي فيه نبل العشق للعشاق .. أبكا ما بكا في ضخرها الخنساء
وعلي طول ما طال الزمان الشاق .. نرثى فيه شعر ونثر واي رثا
وبجاه من عرج لله ع البراق .. أجعن من اسبب فيه دار خلا
مازلت نا هو نا

الجزء الثاني :
رد الشاعر ( حســـــن شاكــــر الهونــــي )
احد شعراء الجفرة وله مشاركات عديدة في بعض الملاحم وله مساهمات شعرية متعددة ولعل من اشهر قصائده .. قصيدة الاجواد التي يقول مطلعها :

لجواد عندهم عندي أقدار عظيمة .. ولنذال مالهم عندي شرف لا قيمه

نعود لملحمة ( ما زلت نا هو نا ) فيقول الشاعر :
مازال عندي همه .. ومازلت ما بين العرب نسَّما
ومازال كلمتي تجمع الشمل تلمه .. عندي الداني والبعيد سوا
ومعا الناس صاحب حق عندي ذمه .. ولد بيت ما نقدر ندير خطا
وبيت سر للصاحب وشايل همه .. وحكمة نعالج ف لهموم بها
وديمه على غيري مفرج غمه .. رضي والدي منه خذيت ارضا
ولو نقص عندي بالمديح انتمه .. امغير ذكر المبادي للشباب دوا
وكل شاب ياخذ درب بوه وعمَّه .. م الجيل لولي ناخذ دروب حيا
لنا سلف صالح والوفا في دمَّه .. لو يموت ما يرجع عالمبدا
ويهيج البحر مرات عنده جمَّه .. ومواج تلاطم عاليات اقوا
عندي على بو ميم ضافي كمَّه .. قصائد سماح امسجله ذكرا
غلا من مركبلي رجيف وحمَّه .. منه انطبب في جوح غلا
الجرح القديم نضمده وانضمه .. يعاود علي ينزف نصيب ادما
كاس الغلا في الجسم زرع سمَّا .. ما عد نافع في عزاي عزا
نطلب المولى يسلمهن من همَّه .. انظاري وعقلي في الظلال سوا
مازلت نا هو نا
ما زلت نا هو الاول .. صابر على جور الزمان امهول
وحظي امجرب في الرقاد يطّول .. ويمرن عليه اسنين ما يصحا
لو انموت لا نطمع ولا نسّول .. ولا عبد منه نطلبه الرجا
ثابت على مبداي ما انتحول .. وما يوم ملواجب طلبت اعفا
من غير ربنا ما حد عليه انعول .. هو اللي خلقني ملعدم نشا
والحاسد امفيت الحسد ايش ينول .. والحسد ثبت في قلبه امخلف دا
ما زلت نا هو نا
ما زلت في تياري .. الشباب في نما عقلي وبين افكاري
والكبر له اشاير غير انواري .. نص قرن كي دوبه علي مضا
وامجرب وراسم في الحيا مساري .. وعلى من ظلمني ما انرد كفا
كل شي محصي في اقلام الباري .. واللي تعمله عنا تنال جزا
وصادق وقول الحق له جهاري .. يالحق رافع ربنا السما
وامسالم وكاسب بالموده جاري .. متواضع وسالكهن ادروب الله
وأن كان م الزعل مرات تشعل ناري .. نسرع نطفيها بجرعة ما
انخلط انوازي وللشعور انداري وعايش حياتي بين ناس احيا
اوواخذ علينا الشعر نص نهاري .. هايم معا نفسي صباح مسا
ولعمار علم غيب اطول والا اقصاري .. وعارف الدنيا مش دار بقا
مفروضة عالنايم وعللي ساري .. رحلة نهايتها تكون فنا
مازلت نا هو نا
مازال لي كلام .. نقوله وما نخشى عليه ملام
نحنا دينا في لاشرع دين اسلام .. منزللنا تنزيل م السما
نجانا نشلنا من عهود ظلام .. وضيه دروب المومنين ضوا
حلل الحلال وحرنه الحرام .. عن فعل المعاصي ولفجور نها
حث عالاخاء والوصل في لرحام .. متعاونين في الشدة وفي الرخا
ايريد مجتمع مايهدمه هدام .. متماسك يهابو قوته لعدا
قابل للتوبة في حسن ختام .. دين يسر ياما ضالين هدا
ويحيي نهر البعث كوم عظام .. فيه يخرجو لموات م الوطا
انداد وعراة وحافيين اقدام .. للمولى ايهبو ملبيين ندا
ويرفع اقلامه ويصدرن لحكام .. ويندم اللي للنار راح هبا
ونحنا عليها دايرين ازحام .. الدنيا اللي ميمولها انتها
وفينا العاصي ومرتكب لجرام .. وفينا الغافل مابشي درا
عالجنب ليمن وليسار اينام .. يشخر تاركهن افروض صلا
وفيه ناس تفتن بينا ظلام .. اشيان لفعال اقلوبهم سودا
وفينا اللي شكار والذمام .. وفينا اللي للغير دار ولاء
شعب العروبة دارهم حكام .. والغرب ودارهم سلم عليه رقا
يبيعو لوطان يعلقو الوسام افعال مخجلة منها الجبين ندا
باعداد الصوابع مالهم احترام .. ان زالو حماة الشرف والمبدا
ونحنا وطنا قدامنا منضام .. من كمشة يهود وضعف وامريكا
ينظرو لنا نظرة قطيع اغنام .. ايهمها الا لوكال والمرعا
هذول يفهمو عابر لحدود وسام .. وجيوش زاحفة ما تلتفت لاورا
ومن دم ساخن نعملو حمام .. نهونو لرواح نرملو النسا
ونين العدو يطلب الاستسلام .. ابنا يعترف لشروطنا يصغى
مازلت نا هو نا
رد الشاعر : روفه دعبوب الرفادي ( رحمة الله عليه )
يا حاج فرقت نا .. من بو غثيث أتقول غيم أشتا.. رجاي منقطع
يا حاج فرقت حالي .. مع بو سوالف عل الضمير مدالي
لا عاد نشقابا ولا يشقابي .. حتى لو بكيت بدمع فيه دما
علي وين ما يخطر سريب الغالي .. ما عاد إيجيني نوم تحت أغطا
وناخذ الليل ونا أمغير أنشالي .. ويبقى قول حالتي هابا حفا ونقا
يا حاج دونك بررح .. جضر وياس متستاصل أمعاي امررح
لا أنغبت نشغل لا أنجيت أنفرح .. الدا كبر ما عنده هناك دوا
ولا عاد أزنادي من جدي إيجرح .. نين البحر ينزح إيعود ثرا
وتبيض الغزاله و الدجاج أيطرح .. أن صار هكذي ممكن إيصير رجا !
ويا حاج فرقت نا
ويا حاج نصبر صبر .. ألقيت علتي لا هي مرض لا كبر
حتى و الحجايج بين شكل أوبر .. ودك علي روحك أدير عزا
ألا أمغير جابرني زماني جبر .. و القل شين ما تنظر امعاه هنا
لام الميامي كيف ندع الحبر .. ربيع بغوها ماجروه عروق نما
وتريض في عفا لاقدع لاهي نبر .. ولا محاوفة لاهي طفيف عصا
ورافق اللي مالدهر واخذ عبر .. تنسابها ماضي شقا و كدا
صعيبة عل اللي جن أيامه غبر .. أتراود ثنايا شقا وكدا
أحلام كيف من بدل التبن بشبر .. عواطف أنخافن لا انموت بها
ولافات لاساحر و صاحب سبر .. ولا من أمخاوي في سما وطا
فتاح شبر ويتقز ويشبر شبر .. وما من أمشعوذ له أفلوس هدا
وفي الاخرة إللي سكن في قبر .. داير طويل الياس فيه رجا
يا حاج خذ مشحاطه .. غلا بوغثيث إيكيد في مشاطه
لا إيريد دموه ولا إيريد إخلاطه .. لعياله يطارد في عدا و عشا
وأعتاز باع بندقته وباع أحلاطه .. واحذاه يردن ما من أسراب قطا
وخده علي كفه غفر مرباطه .. سليم كان عاود وما خذا و عطا
مالقل عمرنا عدا حشاك سماطه .. وشيب الحسايف في الخدود بدا
ويا حاج فرقت نا
رد الشاعر : مفتاح الفالح
ما نيش نا هو نا .. أنحمل وين ما يحصل معاي خطا ..ونقول ساهله
ما نيش م الزعاله .. بعد طيش عاطني الله عقاله
أنحمل وين ما يحصل أمعاي فساله .. ما من اللي عدت بدون كفا
وأن كان ما رقالي في السما نرقاله .. أيام وانا مبلي أمتاع بلا
و اليوم كل حد فيا أمحصل داله .. أموانس علي كمين عيب لفا
وحتى من جفاني ما أنريد أنساله .. اليوم الغلا تما عليه أرضا
ما نيش ميس ياس .. وما نيش مقتنع بالياس مل الاساس
أنحب الحياة وأنحب كل الناس .. ومومن وعندي في الكريم رجا
إيجي من تساخيره إن جاني ياس .. إيجب الفرج ويجيب الدوا للدا
و اللي عليه إيعبا ما ينهاس .. إللي ما علي غيره إيجوز عبا
هللي خلق فيا رهيف أحساس .. أنسان عاطفي مالي عزوم أقوا
أن شاف الجمال إيصيرله ألتماس .. عندي العين من قلبي قليل نجاة
وكل يوم مسقي من الغوالي كاس .. زها في اوله واخر المطاف بكا
قضيت عمر جيد وأغلبه أنعكاس .. وشعرت بتغير في الحياة جرى
عندي العقل هالفترة زكا عل الراس .. وهو في ظلالاته عليه طغا
ما نيش نا هو الاول .. الانسان إيتحول كل يوم أمحول
موال الغلا وأحسن أنسان إيمول .. علي كثرته مادرت بيه نما
قضيت كم عام وانا عليه انعول .. ألقيته هبا كله ورزق اربا
وما عاد سني تو لي أتخول .. أندير الخطا وأنعالجه بخطا
و اليوم الكريم ورحمته نسول .. تايب أنكمل في النهار صلاة
وما عاد نبي عل النسا نجو ل .. في العام يـــــالله مره أندير غلا
مانيش كيف زمان .. اللي فات مات وبات ماضي كان
كذاب كان قتلك عل الغلا عصران .. جربت الغلا لمرضي فيه دوا
ونعشق أيام الصغر و النسوان .. فيه بينا ذكرى وملح وما
وعندي حنين كبير في الوجدان .. للصوب الشريف اللي بدون أريا
لكن اليوم خلاص مهما كان .. ما عاد يغريني أسلوب أغرا
الأيام و الضروف إيغيرن الانسان .. الانسان مستحيل إيدير ما يشاء
حتى لو كسنه يعتبر عريان .. إللي يقتنع الايام موش كسا
ما نيش نا هو نا
رد الشاعر : عبد الله بالروين
ما زلت نا هو نا .. حتى أن كان شيبي عل السواد طغا .. نشاد ع القدم
ما زلت نا القديم ... حذاي وين ما يطروا اولاف أنهيم
وبخصك وين علي المواهيم .. بانت وجابني لهن الخطا
إيسيلن كما سيلت دموع إيتيم .. أرقاق الغرض علي قديم غلا
ما زال لي أبعاد .. ومازلت ديــــــــــــما عل القدم نشاد
ومازال قلبي بالغلا وداد .. إيزيد فيه عطاه مع الخليل عطاه
وما زلت نعشق سمحة الميعاد .. وأنرايف عليها أن حازها الجفا
مازال في وجّاب .. ومازلت نلقى للسوال جواب
ومازلت كي يخطر نظيف الناب .. الأنظار يهطلن هطلت نزيل أشتا
ومازال عل الماقي إيحوس ضباب .. إحذاي وين ماعاشق اولاف طرا
ومازلت حامل في الكنين عذاب .. ولا تنكتب قولة أفلان شكا
ومازال في قلبي وميض شباب .. لولا الشيب اللي الراس غزا
فيا إيكر لجيهة الشياب .. كرة ضعيفة من أحذا الاقوا
مازلت رغم القهر .. أنحب الحواري و الطرب و السهر
فالسر عندي ينطرن والجهر .. لولاه ما رينا نهار زها
وبيهن أنداوي في كواين دهر .. قديمات في ماضي قديم مضا
ما زلت واسع بال .. ومازال عقلي للغلا ميال
ومازلت نعشق فالحياة الجمال.. إللي بعده ما نقدر أنطيق حياة
وما زلت نقدع في وعر الاجبال .. أنخاطر علي صيدي بدون عنا
وعندي شرك كمين ريم غزال .. أحذاه وين ما يبرم عليه لوا
ما زال عندي صبر .. ومازلت ننبر في الحجايج نبر
وعندي سهاري كي حساب الجبر .. أن سهريت من خده بنور ضوا
وما زلت نكره في السنين الغبر .. إللي قضيتهن بعد العزيز بكا
ونكره الناس ان عايرو بالكبر .. تمنيت ما عمر الشباب فنا
حكاية تريدلها أوراق وحبر .. وكاتب أنسانى فى العلوم قرا
وتمنيت بعد الموت ناجد قبر .. فيه نندفن نا و العزيز سوا
وما زلت نا هو نا .. حتى أنكان شيبي عل السواد طغا
نشاد عل القدم

رد الشاعر : احمد عبدالرحمن الشلوي

مازلت نا هو نا .. نصون الغلا ماني عديم وفا .ز ان جيت للوفا

مازلت صاين ودك .. ومازلت طامع فالزمان يردك
ندزوا وجاهه يطلبو في يدك .. يجيني بعد ياسات ومراجا
وانتي فالسماحة ما لقينا ضدك .. علي كثر ما رينا وجوه نسا
سماحة عيونك والغثيث وخدك .. عرش الجمال تصوقريه بها
ما تلوم هاللي ينحرم من ودك .. ان كان كمّله عمره عليك ابكا
مازلت فيك نراجي .. ومازلت كامي لوعتك ونداجي
يمكن لصوبي والغلا تحتاجي .. تجيني وتلقيني نظيف نيا
مع الزين نستانس يروق مزاجي .. والعفن ماعندي عليه عبا
علي شان بومضحك مثل العاجي .. نخش الخطر لو تم فيه دما
خطرها لقصقالك نعود ادراجي .. هو اللي مسببلي نصيب كدا
فيك وسط طايب حركته رجراجي .. ومضحك علي لون الجليد سوا
وما نظن نبقى من سريبك ناجي .. الله وعلم تبقى لي سبايب دا
غباوين في شانك نويت نقاجي .. لو يبقو جميع الناس لي عدا
ماولت وافي عهدي .. ومازال صوبك في مكانه عندي
ومازلت صادق في الغلا من جدي .. مجروح وانتي في غلاك دوا
وراه الخيانة عالبنادم تردي .. تدعي الناس يصيب فيه دعا
وشين النوايا عالعرب والحسدي لا بد ما يشقى ينال جزا
في الآخره وين الرحيل يعدي .. يندم على مادار فالدنيا
مازلت في جرناني .. ومازلت حاملهن هموم زماني
ومازلت في موج العزيز انعاني .. لا بان لامنه هناك نبا
حال العدو في غيبته خلاني .. مرايف وما عندي عزوم قوا
كنيبه بعد ياسات يبقى داني .. ويقسم ويبقى من حلالي نا
وننسى مع زوله جميع احزاني .. وما عاد يذّكر معاي شقا
مازلت نا هو نا للشاعر عبد الرحمن بو امغيّب الصنقري
مازلت نا هو نا ..ساس الحيا نبني عليه ابنا.. نظيف معدني
مازلت لك حمال
ومازال في عقلي عليك دلال
ومازلت واخذ في قولة قال
ومازلت مانخدم امفيت ابها
ومازلت تقلب كل يوم بحال
ومازال عندي فيك باب رجا
مازلت نا القديم
صاحب الجفا نقدر عليه انصيم
لاعيب لاسيات لاتحريم
لامعاتبه لاحس لاضوضا
ولا ليش لا كنك ولاتكليم
كثر الحديث ايسير فيه خطا
ولانريد نفتح باب سين وجيم
ولاخير ف الصاحب ان كان شكا
خزازين عقلي نين دارن ريم
من كثر السوايا طافحات ملا
صابر ونراجي في رجا الكريم
يمكن اللي دردي اتعود صفا
مازلت كي ماكنت
لابعت صاحب لاصديقي خنت
نظيف الصداقة كان نا قارنت
من غير عله خالصه بوفا
وننشد لوجه الله كان نشدت
علي صاحبي حتى ان كان جفا
ومازلت نقفزلك بعد ما تقت
لانريد شكر ولانريد ثنا
ومازلت نبذل كل ماكونت
ومازلت نفرح للغريب ان جا
ونضيف الضايف لو عشا شحتت
انبات في مسره كامله وهنا
مضغاتني ليام نين ابطلت
وعندي ملاها والفراغ سوا
وكثر رفق لجواد منها خذت
امبادي بدينا بالحياه ابها
رصيدي قوي ومازلت مسع لنت
وغنا النفس ماكيفه اهناك اغنا
وكلمة الحق انقولها لوكنت
بين المشانق والسيوف احما
متمسك علي مبدا وبيه امنت
حتى وهن اظروفي هكذي وكذا
واصحاب المظاهر والنفاق اكرهت
دساسة الدسايس والوجوه اقوا
ووجهم اتقول اكباس طول الوقت
من كثر المعاصي شايلات صدا
كرارة احبال كبار فيهم دخت
وقلة ضمير وفشخره وريا
وان سالوك ماليله هنيه بتت
وان سلتم ماعد خلاصك جا
وان طالبتهم تبقى اتقول اغلطت
تاخذ كريهه سنه رد اكفا
يغفرلي الله ان فيهم خضت
علي عد مامنهم لحظت اخطا
الله يبعد الشيطان واستغفرت
مغير للنذاله مالقيت وعا
الله ينعلك يا ابليس وين حضرت
واينعل اللي كيفك سوا بسوا
وصلي ع الهادي واقول امنت
رب الخليقه واطلبوا الهدا
مازلت نا هو نا ساس الحيا نبني عليه ابنا نظيف معدني
قصيدة اخرى للشاعر عبد الرحمن بومغيّب
مازلت نا هو نا ..علي كبر سني عفن في اخطا.. امغير بينا
مازلت موش تمام
ومازلت خاطي في بعض لحكام
قليل وين ماناقف ورا الامام
وقليل وين ما نوعا الفجر قرا
وقليل وين مانزعل علي الاسلام
وقليل وين دمعي ع الخدود جرا
شباب الحجاره جابهم الاعلام
الواحد اهدومه غارقات ادما
ولاجابني شايب كبير انظام
ولامشاعري حرك صريخ انسا
وقصة الدره فلم م الافلام
وواجد مثيله مانباهم جا
قاعد وانصنت انريد سلام
قابيتني جاهل وفي غبا
القدس راه مايجيبه مضيغ كلام
ايريد يوم دخانه اتقول ندا
ياربنا ياملك ياعلام
ان تنصر الحق الظلم راه طغا
امغير بينا مازلت نا هو نا علي كبر سني عفن في اخطا
مازلت نا هو نا للشاعر عقوب الشرمي
اسمعنا شريط وفيه قول* ارحومه
كلامه اعلاج وللمريض دوا
جميع من اسمع بوداد حط اختومه
لاايعارض لايقول خطا
مايطّلع الكلمة اللي مذمومه
بوداد زين اللفظ كان حكا
او كمان خوه من غادي ايعد اللومه
ماايرد ع الطالب بقولت لا
العمده شهير او سيرته مفهومه
الله يرحمه راجل قليل افدا
ان قال الكلام اتايده الحكومة
وفوق من قراره يختموا القضا
ان شاء الله في قبره هني في نومه
تدعيله العالم كل وان صلا
لاكن الدنيا ما عليها لومه
ما ادوم للانسان دار فنا
اومازلت مالي رده
اومازلت نفزع عند وقت الشده
او مازال في قلبي صفا وموده
وانحايل ع اليتيم كان بكا
ساس المحنه ماانريد انهده
وانحمل صاحبي حتى ان كان جفا
او عمر الجفا ماتم كي الموده
اوربك خلق لطباع موش سوا
اومازلت نا صبار
او مازلت نتقّى انريد عمار
او نبقى انطفي كي اتشيط النار
وانكافي اصحاب العيب بالحملا
او ياما اشربنا ف الزمان امرار
او ياما اضحكنا في ايام زها
هذا خبر ريته صحيح وصار
وارحومه حكابه ف الكلام بدا
ارحومه كلامه موعضة ووقار
ارحومه امعلم ما ايريد وصا
اومازلت ما نذارا
والضيف نعرف واجبه واقدارا
او نشكر اصحاب العرف والشعارا
في كل يوم وكل ليل مسا
اومازلت نا كي قبل م الصبارا
وبفعل العطيبه ما انريد اكفا
او مازلت صاحب جونه
او جاري انخاف عليه نوقف دونه
وانعامل العالم كل لون بلونه
او ما القيت كيف الصبر باب نجا
اولانقص عندي ف الرفق لاخونه
صاحب صداقا كامله بوفا
مازلت في معدالي
ومازال طبعي كيف قبل وتالي
اومازلت ع العايب انطّول بالي
كنيب ايتندم ويهديه الله
اهناك ناس هاديهم الله العالي
واهناك ناس من غادي اوجوه شقا
افيهم اللي مغضوب عقلا دالي
لايفيد صاحب لايكيد اعدا
اوفيهم اللي تلقاه كي الهلالي
يخبربك طريق الخير في الظلما
مازلت نا كي قبل
او مازلت ماودي انكر الحبل
او لاخير ف اللي يعتبوا ع الهبل
واللي لااجوّل لامشا لاجا
اللي مايبانوا يوم دق الطبل
فزعهم امغير اعياط كي النسا
منحاش** جا بولبده ابتاع الزبل
علي وطنا عيط وادير عزا
نفسي انشوف الخيل وامراح ابل
او نفسي انراعي وطن فيه اعلا
اومازلت كيف زمان
او نكره اللي كذاب والفتان
وانصاحبت صاحب ماعليا هان
اوكل يوم في قلبي ايزيد غلا
او لاخير في راجل طويل السان
وجابد سريب الناس كل ضحا
غالي علي البر والوديان
او نجع البوادي في اوطان خلا
رجاله عصارا صيدهم غزلان
والله طير الحباره امعا قطا
لاعندهم ناموس لاذبان
او اديوك م البيضا اتجيب الدا
وانجاهم الضيف ايذبّحوا خرفان
هاضول ناس من غادي اصحاب عنا
وسلامي علي لجواد والفرسان
اعداد ماقرا قاري كتاب تلا
واخيار الكلام صلاه ع العدنان
وهي الفايده نختم القول ابها