ماعد انريد غلاهم

ماعد انريد غلاهم
انكان بالممنه مانليق معاهم
اعزاز يربحو (ماعد انريد غلاهم)

انكان بالممنه..غلاهم اسّاع انقول حيدن عنا
... يانا الليله مايقولن كنّه
اعزاز ايسما نقدر نعيش بلاهم
و لاهم علي فروض لاهم سنه
انكان هكذي شانن معاي انياهم
ولنقاني صاحب غلا ومحنه
وصاحب مودّه يطمسه طرواهم
انرونق معاه ومالشقا انتهنى
ويبقى جميل وطيّّبه جفواهم
اقلال خير ما نالو الخاطر منه
الا الخير لكن قاصرات اخطاهم
وما يعــــمر ديـــمه الا بالـــقنــه
خسارة هضاك الوقت في مرجاهم

انكان غير اتكرب
غلاهم اعزاز انبوزعه وانخرب
وماعد ارمامه من جديد انكرب
انطيرش عليه ونتركه مدعاهم
انكان بالممنه مايريد ايطرب
ولا يجبرك تجري علي دنواهم
امفيت ما يباعد مايريد ايقرب
هذي الصادقه كريت من يالاهم
وماعد تجاربهم انريد نجرب
اقلال عرف ما بانو الا باخياهم

انكان غير اتسدّع
غلاهم اسّــــاع انســــيّبه وانــــقدّع
علي صوب ناجد مالحمول انردّع
ونلغب رحيلي ما نحط احذاهم
دوار عالغلا ماني عشيق اتبدّع
ولاني رميّه راميه لحماهم
صغير عمر مانبقى الا نجّذّع
نعول في غوالي غيرهم ننساهم

قطع اسنينه
غلاهم اعزاز اللي اليوم اخطينا
لا نسمرو منه ولا يشقينا
طــايبين من غــادي علي فرقاهم
حتى انكان في شانه اسنين رجينا
عقول غافله كانت اتسوق وراهم
ويانا بعد عيبه الذارف فينا
عرفنا اعزاز صحيح يا مقساهم
خلاص كل حد حرث في طينه
غناني الله اللي علي غناهم
وكي ما رزقهم رزقنا ياتينا
وكي ماخلقهم ناجدوه افداهم
معاهم بقلب ورب كان جرينا
مسامحين لو هاضا ردود كفاهم
جميع مالمواجع ماتخص علينا
اتجي من اعزاز وما علي زباهم
الفاهق اللي منه الريح تجينا
خلاله ايطقه سوهم في داهم
ومامن عزيز اليوم رافع عينه
ايريدنا احبابه كيف ماردناهم

لا حنيــــّــه
اعزاز عندهم لا عاد حسو بيا
كبود قاسيه ماهم نظاف النيه
علي وين ما تما طليب غلاهم
جميع القهاير بغض دارو فيا
ولا قلب غافل غيتي لاماهم
لوكان غير مالساعه ومن باديّه
استودن وبــشّر بالفراق سماهم
انقطع ارمامي ماتسير رجيــّه
ولا نقول عندي صوب نا وياهم
ونحمد الله وبالصلاة نبيـــّه
نقضتهن بدري خيوط سداهم
ومره جديده ماندير الغيـــّه
امفيت ما نوازي من اللي نسواهم
غالي عليهم غاليين عليــــــّا
ايريدو دفاي ونا نريد دفاهم
اللي من حمول الصوب حقـّانيّه
ايشيلو عناي ونا نشيل عناهم
وننسى جميع اللي جرى ماضيـّه
نعيش في حنان وفرحتي برضاهم
علي وسع هالدنيا اللي مبـــنــيــّه
مانريد فيت اللي عطيت نباهم
الا واخذه كامل رضا والديـــّا
وفي كل ركعه ربح من يالاهم
ويالله ياعالي وعالم بــيّا
اتسهل اقسام اللي نويت دناهم
ماعد انريد غلاهم
انكان بالممنه مانليق معاهم
اعزاز يربحو
~~~~~~~~~~~~~~~~~~~~~~~~~~~~~~

قصيدة رائعة تسلم اخى اسماعيل