مانك لي

من طرف **العاشق الصغير** 2012-08-01, 4:34 pm

مانك لي

ارهنتي ودرتي كبد مانك لي , , , ننزف وجرحك م النزيف ابري

مانك صوبي , , , ولا عاد دروبك من مسار دروبي

نا البخت كايدني وخلوة جيبوبي , , , م الياس وقتي مانهار اخلي
نا الياس في عمري وفي مكتوبي , , , نا الياس حثى في المنام يجي
نا الياس قاصدني ودوبه دوبي , , , تحلف رشاوي في غلاي اعطي

ياسمحة التمهيدة , , , ابريتي ونا جرحي اكثر تبديده

ينضّح وسايل من احذا الضميده , , , سطير نين جاري م السطير اوعي

ارهنتي ابقيتي ع المنال بعيدة , , , وياسك حصل ماعد يجيبك ديّ

بختك رايم , , , نا احصلت في جرحي وجرحك لايم

ابقيتي دواه ونا نزيفي دايم , , , ولا عد دواء غيرك يفيد بشي

جنيت جرح منك ياعيون الحايم , , , لا طب جابه لايفيده كيّ

ولا عد يهبّن من احذاك نسايم , , , ولا انظن في بالك غلاي اطري

وطوحة ديارك من لطوط قسايم , , , جايّات وغيابك مخلف فيّ

ولا قدرت كي ننوي نجيهن حايم , , , اللي قبل نمشي شورهن ونجي

مازهاك عدمت , , , ولا اخطيت في حقك نهار اجرمت

عليش هكّذي تقسي ونا سلّمت , , , لك كل شي ماسيبت عندي شي

واتعبت في شانك زهاي احرمت , , , وآمّنت لك وانت غدرت بي

نا قلت لك فيما مضى واقسمت , , , عندي الروح بيعتها فداك اشوي

ميّس فراقك يا امناي حتمت , , , وارضيت مقتنع والعقل بيك ابلي

وطاوي صفاحيّك غلاك ردمت , , , وناسي اللي منّك معاي اجري

ونغيب كم عام عليك لا مااندمت , , , ويوم جيّتي بكري ضناك يجي

اليوم انتهى وضعي معاك حسمت , , , لا نلوم لاعندك ملام علي

نلوم ع الصغا والوقت كنّي لمت , , , وع القسم وظروفي وخلو ايدي

خير مانموت بأي شي عزمت , , , نرحل بجرحي من بلادك حي

م ن ق و ل

من طرف حسين الخفيفى 2012-08-12, 10:02 pm

نهارك كيف حليب الضان .. كثير ادهان لذيذ مع تمر وقنان .. نهارك كيف حليب الشول .. قوى مفعول دواء شافى مافيها قول ..اللى ماتعرف شئ ميكول الا غيطان تقول اجنان امنين تبان وهو ريان عفا طرفة لام الحيران ..

بالله عليكم وصلنى مسج على نقالى من صديق عزيز عليا وفهمت بعضه ونبى تفسير كامل ووافى له ولكم جزيل الشكر والعرفان ..

هذى اول مشاركة ليا فى المنتدئ وللامانة انا عضو جديد وبالصدفة وجدت المنتدئ ولكن والله اعجبت بيه وبالقصائد وبفكرته مع انى لست على دراية كافية بالشعر ولكنى من عشاقه ..

وكل عام ورواد واعضاء ومتصفحى المنتدئ بالف خير وينعاد عليكم بالخير والبركة

من طرف **العاشق الصغير** 2012-08-16, 5:35 am

مشكور وبارك الله فيك انشاء الله تلقي الشرح في معجم القصائد

https://tamimi.own0.com/t97423-topic

مانك لي

مانك لي

رد: مانك لي

رد: مانك لي