قصيدة كميتا قلبي جض معاه .. للشاعر علي الساعدي الفاخري

من طرف محمد الشيخي 2012-11-09, 1:44 pm

[b]

الشاعر على الساعدى يقول :

كميتا قلبي جض معاه .. عزيز خطاه .. غضب نازل من عند الله

بلا رادا منا جضـيت .. خطـاهم ع اللوعـة يقهـر

شكيـت بحالاتي وبكيت .. وما حـد بهمومي سامـر

الخونـة م الصاحـب ثاريت .. جناية مافيـه امغفـر

صبرت وكافحت وضحيت .. حرمت وصبري راح هدر

وياما في لامـاك سعيـت .. جريت وربي ماسخـــر

كتب ياسك ومر ورضيت .. أنطيع احكامة ما نكفــر

خطا مومني فيه وطيـت .. نصيب ومو مـلح وقصــر

الحاصل مليت وكليــت .. الياس مع عمري استمـر

على الغيـة والياس خذيـت .. امهول ياماني ناظــر

محنكبة من يوم وعيــت .. الحـب ومالي فيه زهــر

ولا بولافي يوم زهيت .. نطارد في الصوب وخاسـر

على إيدي كم مره كويـت .. مجرب ظيمة ومذعــر

وجابـني لقسـام وجيـت.. بروحـي في قبري نحفـر

بزولك مصرع ما نعميــت .. بشاعا يرما الراس مجـر

مرار افراق اللي غاليت .. نسيـت ودرت معاك جـرر

بلاني ربي بك وبليـت .. غلاك على الـروح اسيطـر

ركبـني من شورك عفريت .. ملك لا يقتل لا يظهــر

نطقلي بسمك وين قريـت .. اجوشن من يالاك اكبر

اتقول ابجنيه خاويت .. سحـني زولك ما نصبـــر

نهار ولاخر كان بطيـــت .. انجي كيفني لك طاير

انريتـك كيفـني حجيـت .. انريـح بالي والخاطـر

بعدما برمـت وعديــت .. لفالي منك مشـغل سـر

اضايق علمـي ونغميـت .. غريب وطالب ع الموكـر

الحاصـل مايوم تواريت .. ان عديـت انـجي لمبـاكر

معـاك الثاني بر مشيـت .. انسيـب وطـني ونهاجـر

وراك عل المالح خشيـت .. سوا نربـح ولا نخســر

ونا حاسب روحي من بيت .. افراس وهل تقوى وعصر

اخضيري ولعيت اشليميت .. افواخر لصل امشيبي حر

نقـابة قولتـم خفيـت .. معاهـم قانـوني يصغـر

برمتي بي فيدك تميـت .. مثيل الخوصـة فالخنصـــر

ولا عاد النومي استحليـــت .. مع ذكرياتك ساهر

ايجن قدامي كان غفيــت .. شريط مسجل ومصـور

ولا عد من ناسي استحيـت .. ابنارك وسماك نجاهــر

شعـرت ومجـردت وغنيـت .. قبـاله مانـي متعـذر

مدحتك خـذتي مني صيـت .. امنبى في لوطـان أنشر

غلا متبادل هـاك وهيــت .. اقدار وثيقـة نين عمـر

ولا فيك امحـرم مسيت .. شريف وحـبي لك طاهــر

ولا في نيتي يوم نويــت .. النقـص ولو كاري نغـدر

حرثني ياسك ونغريـت .. اطامنت وهو خـذني غــر

اسقاني علقـم نين رويت .. صدرت ومانحسابة مـــر

كنسـني سيـلة ماناييــت .. اربد بحمـورة يطافــر

اشتت شملي وشاضيـــت .. امشاضـة ماضـني تجبـر

الليل على طوله قضيــت .. حسايف ع الماضي الغبــر

امعـاكم خالطـت وازيت .. بلا رادا مـولاي آمـــر

انظاري ياخـاين خلـيت .. وراك اينوضـن ماتنغـــر

كباية مابن للتسكيــت .. ايتاما في غربة وعـــذر

معاهن حتى نا انطويـت .. ذبل عود أثماري الخضــر

مريض طريح وساد ابقيت .. جنازة تسمع وتخبـــر

اسقم مشواري لطيـت .. خرب ممشاه .. فسس في عز أيام زهاه .. كميتا قلبي جض امعاه

كميتا مانبيه إيبـان .. اضعف ليمان .. ايسكر خانات الخــوان

كواسم يجاروا بفتــان .. علي فرقــاه .. قرايب لنا نا ويـاه

انكان اتعدوني غلطان .. علي سبـاه .. اناكر ناسي سطر اجبـاه

رخاني وانا به مطمـان .. علي مبــداه .. تراجع عهده ما وفاه

طلع خاين وانا عصران .. نـرد أكفـاه .. نسكر تاريخه ننساه

نعده لا صار ولا كـان .. ولا رينـاه .. ولا صاوب لا عاهدناه

ولايل ع القول وجضران .. وقلبي جـاه .. نكب طايل ليله خلاه

نهون ع القلب الجضران .. اللي بصغاه .. يترع من كل اتجــاه

اللي خرب خفيه وبيـان .. ونـا يمنـاه .. خذاته للغير مغـاذه

انكان جدودي هل برهان .. وفيهم جاه .. وشان وخاطر عند الله

ادعاي إن يبقاله ركبان .. طويـل مداه .. يطارد في ماله اوضنـاه

...................................

خاهم لافي لي ابنسيس .. مراض اتهيس زهاي .. معاود بيه نكيس

صغير ولي يوم انقيس .. نعيش بـلاه .. الغالي صبري راح خذاه

الدنيا قدامي دلهيس وضاق سمـاه .. العقـل ومابا ينـزل مـاه

اطريلي كي حال الراييس .. اللي ارفقـاه اتفقـوا بنقلاب وراه

...............................

خطاهم من غير تسابيب .. مرض توكيب .. الله لا يصعر به صاحب

انزازيبه ما لقيت طـبـيب .. يداوي داه .. يهـون كاينته وبلاه

اغفرلي ياعالم بالغيب .. كلامي راه .. عتب ومرك راضي بقضـاه

بشر خالقنا للتـعذيب .. زهــاه الحياه .. سراب ايتوق اوما طلناه

خلقت الحب اساس ايجيب .. قلـوب معاه .. ايديرن ولفة ومخـاواه

ولكن داير له تـرتيب .. عليه وصاه .. حكومة تجارة بضنــاه

الموح انكان القيه قـريب .. يجيب أوتاه .. يباعد بين امنا ومنـاه

الغيبه هي زاد اتغيهـيب .. اتعكـر ماه .. اتخالف راياتي ترجــاه

ولط اقسام وقطع نصيب .. أعـداء تبلاه .. تسكر باب آمال رجـاه

ولا ياس وحكمه الرهيب .. بلا ماواه .. السيف ايقصه من مثنـاه

وحط معاهن خلو الجـيب .. اللي لولاه .. اتسير عداله ومسـاواه

اتعيش بلا دمع وتسكيب .. يفيـض هناه .. العالم برجاله ونساه

مخلينا كي المكاليب .. غلا درناه .. وفي عقباه ... فراق مفطم وموازاه

وليش خلقت الصبر ايغيب .. علـي بلواه .. اندور صبري مانلقـاه

اويا موعر فرقا الحبيب .. اللي اتحضاه .. اوما تجفاه .. ايسير فراقا بمفاجـاه

.............................................

كميته ركبني لمــراض .. العقل اختاض .. اضايق نين ابهمه فـاض

رجاكم عام اطوال اعراض .. وخاب رجاه .. اقسامه لطن بملاواه

معا ماصابة هم اوناض .. علـي الوطاه .. برك متغلب في مصباه

من طرف اسماعيل ادريس 2012-11-09, 4:21 pm

شــــ

قصيدة كميتا قلبي جض معاه .. للشاعر علي الساعدي الفاخري 999507

ــــــكرآ وبـــــــــــــــــــــارك الله فيــــــــــــــــــــك

من طرف فرج احميد 2012-11-11, 12:03 pm

كلام طيب تسلم اخى محمد

من طرف انيس امراجع العرفي 2020-09-06, 3:24 pm

بارك الله فيك.. علي الساعدي كان صديق جدي رحمهم الله..شخصية محبوبه و انسان شفاف و صادق وصاحب فكاهة.. و مفيش داعي نشكر اشعاره لان شكري لا يزيد لا ينقص منه

قصيدة كميتا قلبي جض معاه .. للشاعر علي الساعدي الفاخري

قصيدة كميتا قلبي جض معاه .. للشاعر علي الساعدي الفاخري

رد: قصيدة كميتا قلبي جض معاه .. للشاعر علي الساعدي الفاخري

رد: قصيدة كميتا قلبي جض معاه .. للشاعر علي الساعدي الفاخري

رد: قصيدة كميتا قلبي جض معاه .. للشاعر علي الساعدي الفاخري