راجيت ماجيـت مليـت

راجيت ماجيـت
راجيت ماجيـت مليـت * واجـد وطـول رجـاك
واريت داريـت هديـت * دمعـي ودمعـي فـداك
هويـت غفيـت نطيـت * كي جاب المنـام مدعـاك
سميت صليـت ودعيـت * تصفـي يالغالـي سـمـاك
كفيت جميـت وبكيـت * مااقدرت واعـر خطـاك
صبيت هميـت جضيـت * مااقدرت نتبـع اخطـاك
نابيت و اوميـت مابيـت * تجـاوب جريـح نـاداك
كويت داويـت ماابريـت * علل اللـي انسيتـه وراك
عديت جبيـت حقيـت * مواهيـم شينـة بــلاك
حنيت هفيـت وغفيـت * من بعتـه بعدمـا شـراك
اتكيـت تمنيـت ياريـتن * لقى عزم بيـش ننسـاك
عطيت وخذيت وارضيت * بما غير كنك عطـاك
شديـت قويـت رقيـت * العزوم كي ايست دنـواك
عزيـت رديـت لاقيـت * ياسـك موكـر هـنـاك
شقيت حاييـت وهفيـت * من نـار ياجميلـة غـلاك
ظليـت انتهيـت تهنيـت * تريحت رقت مـا اقسـاك
نسيت كي اقسيت وسقيت * حرفين خاطري من اسمـاك
واطيت دقيـت فكيـت * يابيت ماصار مـن ابنـاك
ادليت رقيـت ماامتليـت * يادلـو قاصـر ارشــاك
غنيت ضميـت طقيـت * على عقل شلتـي معـاك
شتيت والقيت وحكيـت * للنـاس نشكـي بـداك
راجيت ماجيـت مليـت * واجـد وطـول رجـاك