واحد حضر فرح حبيبتا&ملحمة المشروب قويا

من طرف سمر ليبيا 2013-04-09, 10:26 pm

واحد حاضر فرح صاحبته بعدالعشا وزعوا عليهم مشروب قالوله تبي سعاده والا مراده قاللهم....

ماعد هناك سعاده.....من يومن خذوا ريدي كحيل هماده.....صب فانتا

قال محمد السياف قال/

صبلي ليمون........غاب الزها من غيبت المرهون
ملطوط القسامي حالتي بالهون.....وعايش معيشه في صغا مرماده
اطريلي كما عيل ابقي قزون.......قدام كل حفره دمعته بداده
مشكاه من اظروف وغيبت الواشون.......كواين مع عمره تزيد ازياده

رد عبد العزيز محمود/

صبلي م الشاني.......متضايق وعقلي م الهموم ايعاني
توا حتمت انه عزيز نساني.....وخان الغلا عني احرم ميعاده

رد /ادهم ابن اجدابيا

صبلي م الشاهي........بطلت مشروب العصير الباهي
لي وقت متخدر وعقلي ساهي......وحارم عيوني من لذيذ ارقاده
غايب عليه عزيز ماهو زاهي.......دمعه تحدر سيل ياوداده

رد خالد الزول/

صبلي م الدايت........منحاشن عزيز اليوم عهدي فايت
من يوم فقدته ناره معاي تحايت......ومسع القيتلها ولا براده
رخاني كما زامق طعامه بايت.....قدام الفريق وربنا واعباده

صب طاسه مره......منحاشن خذوا مني هذيك الغره
نا ابطلت من ياسه ونا انتبرا......وعاند معاي القسم ضرب ازناده
خلت علي الساكته منضره......من يوم حجرت عني وهي بداده
لوكان ياعلي شحات تنفض صره.......معاي واجد ساينصبوا ميعاده

صب امصير........منحاشن الغالي ف العهود تغير
معاها زمانا حلو راح امتير......وابروحي ابقيت تقول وسط حماده

رد محمود زايد/

صبلي ميرندا.....منحاش بختنا بالهون مابا يندا
راه خوك ف الشربه غرض ماعنده.....لوكان صاد ماينصب الا ميعاده
علي بوخجل مايح اطناشر قنده......امعطب نهار المشط والكداده
ايزنكل وسود وكيف جيش اوغندا......مغير هذا قاهرني لميع سواده

رد ننشد ومادلوني سليمان

صبلي م الزرقه.......كنيب تنزل لهاليبه وماعد ترقا
افراق بوحداحه لي ملا حرقه........كي حرقة المحصول يو احصاده

رد ابراهيم الليبي/

لاتصب لاني شارب.......ولاهناك نيه راه عقلي خارب
رخاني عزيز اليوم فات القارب.......وكسر مجاديفه وفك اوتاده

رد كمال عاشور/

صبلي م اليوقا.........راهي الكبده شايطه محروقه
ملي تركني في صهايد شوقه......الله يجعله محتار دون انداده

رد ناريمان احمد/

صبلي م القهوه..........فقدة اعزازي جايتني سهوه
باكيه عليهم مانريد النهوه.....وبقول اسكتي دمعي ايزيد ازياده

رد علي شحات/
صب شاهي مره...........وخلي الغلا برضه يموت بسره
هالوقت ماعد شي هناك مسره......طعم الحياه اليوم علقم صاده
الا الحلو تلفالي معاه مضره......لوكان نشربه يرقى الضغط ازياده

رد قدوره العجني/
صب شنينه........خير من مشاريب الخليط الشينه
وتكون قارصه تبقى تمضمض فينا.......ياك خاطري ينسا افراق مراده
وسيبني انشيل الصوت في تركينه......تهوين في غلا غالي اذهب ميراده
سبلنا غلاه ومات بين ايددينا........لاغسل لاتكفين لالحاده
غلا بلاش ياخالد مشا طانينا......لوكان في ملاطم رقبتي سداده

رد جواهر ليبيا/
نا انريد اميه........ترا صب يابو الزول حتى اشويه
ونرقا انبارك للعزيز عليا.......هذي فزعتي في ضيعت القسميه

رد تاج النسا محمد
صبلي سبرايت.......منحاشن اليوم عزيز صوبي فايت
خان الغلا خلى العقل شتايت.......التمن عليا جفوته ونكاده
والخاطر استوطن في اوهامه بايت.......حرم علي قلبي لذيذ ارقاده
ودعاي يامخلي الجروح تحايت.......نهار ميتك ماتنولها الشهاده

رد وسام السياف/
صبلي م السفن........في ضنك بعد فرقاه يغمض جفن؟؟؟؟؟؟؟
لدموع جفن والعيون اتلفن........نشلي عليه ودمعتي بداده
تماصا شرابي والعروق انشفن......قريب م الكفن تميت للحاده
نستاهل علي فرقاه موت ودفن......ويشلن علي وينصبن ميعاده

رد محمد الحاسي
صب يابوخال.......بختي عطيب وهقني هالحال
مشتاق الغوالي قسمهم مازال.......امذيبلين حالي دمعتي بداده
وناملتهف تاعب وراني مال.......طال الرجا والحب زاد ازياده

***والحقيقه هناك العديد من الردود التى لم اتحصل عليها رغم ان بها ردود قويه
منقول