مجرودة لباس الخايل...(لواخدة الخلا)

لباس الخايل مرحب يالباس الخايل
أقرب يابوعيون ذبايل
نحكيلك عن شوق مسايل
عن جرحاً في جوفي طايل
وإلا بختي أللي متمايل
منك ليلي تما طايل
وأخرى دمعي فاض اجمام

دمعي فوق اخدودي جاري
ننصب نوع ايحوس مداري
إيجيب نبايا سابع جاري
نبكي ورااني مانلتام

نبكي عـ اللي صاير فيا
عالنار أللي فجوجي حية
تاكل فـ افّادي بشوية
نار عرب راهم بيتية
فزاعـين ان صار الطام

فزاعين ان صارت ميله
شيالين احمول ثقيلة
منهم ريدي فايز جيله
إن شاءالله ايواتنّا لقسام

ادعوا قولوا إن شالله إدعايا((إن شاء الله))
يقبلهن مني مولايا
ايقرّب زول عزيز احذايا
وغيره ماااااااانبيش غرام

لغيره مايردح ميزاني
هو خيرة ماجاب زماني
وياسامعني ماتنهاني
انريد إنعل إشوي كلام

إريد إنعل سريب غلاهم
ثلت اسنين وني نرجاهم
حالف بالله ماننساهم
حتى لو خانن لقسااام

ثلت اسنين انجض وكامي
جرحه في مكنوني دامي
وعقلي متسوته في اوهامي
منهم ماااااعاد فيا اعزام

فاتن لسنين وماريته
صدفة ياحضّار إلقيته
جاني متلهف لاقيته
اعيونه مليانات كلام

بشوق ولهفة قال نصيبي
يالايا خليك قريبي
نزهابك وانتي تزهيبي
اف بيت غلا واثق لرمام

قتله إنت احدود أمالي
دونك لي ناسي وعقالي
بإذن الله المولى العالي
تقسملي وايروق مجالي
ياجلاي دفين آلام

قالي اريدك غصب وطوعه
شاقي بـ مشروعك ياشوعه
بعون الله تبرد هـ اللوعة
وتقسم ياكاحل لميام
وتقسم ياكاحل لميام


عابي يالقسام عليكن,,,متحزم فالشدة بيكن

بقلمي.....واخدة الخلا.....