اللى قبل ياصاحب اشداد اعزومة

من طرف ادريس امراجع 2013-08-21, 1:58 am

اللى قبل ياصاحب اشداد اعزومة/ للشاعر الشريف الشارف الحرنة

اللى قبل ياصاحب اشداد اعزومة .... عليه دنيته ضاقت شكا بهمومة.

ياما فوّت .. وياما خذا ليلة وهو ايتكوت

واليوم وينما ما ناره عليه تقوت .. شكى لناس ما تعرف أُصول اللومة
وفيه ناس من هم الحياة تموّت .. وفيه ناس تاخذ عا لصغا واترومة
وفيه ناس ما وجبة لضايف سوّت .. قولة ايسارة عندهم مردومة
وفيه ناس لامدت صدايق شوّت .. ومالهم مع لرقاب داير زومة

شكا وتكدّر .. وحاس خاطرة نين الحجايج ودر
وهو كان بالقول السديد ايبدر .. وجابه ايسكّت فى تريس اقرومة

واليوم جملة له اللى ناض له متصدر .. ما ساومة شرّاى راقد سومة
جميع هبل دار اقروش تم ايهدّر .. خصيص لا ايثمّر لاايفض خصومة
ولا ايحض قولة شيخ لايتقدر .. امغير الهفاك ايكنبلوا فى البومة

ياما هلّب .. وياما خذا ليل وهو ايتقلب

الجرف الكبير ايكيد من يجلب .. حتى وهو خبير واجدات اعلومة
ولو امغير يصبر عالبلا ايتغلب .. ايزولن ابعون الله كل اغمومة
إيموت العفيف ولا الناس ايطلب .. حتى لو اقصر عن بلة الحرجومة
وفيه ناس لادارت نما اتكلب .. ما اتقول كانت بايسه محرومة
ومرات الملمّ ايساند المتصلب .. وينكر الحق الواضحات ارسومى

باح ابسرة .. خزين هم لو طول امعاه ايضرة

وبانت اللى عالناس ما اتورا .. بركانها ايزلزل هايجات احمومة
اتجيك مرّ منها تجبرك عالمرة .. اتزيغ نفس كانت عالخطا معصومة
واللى قبل تشكر فيه يظهر شرة .. ابصِيت شين مشرافك ايوطى كومة
حتى وين مامن فعلته اتبرّا .. اتبات من اجرارة ليلتك مقسومة
واتطيح قيمتك داخل احاك وبرة .. عليك كل متسبل ايشن اهجومة
شوامت وفيك امواتيتم زرة .. وفى كل عين ايقطرولك ثومة

شكا وتحيّر .. وداله ضعا كداه نومة طير

وليل الهناء اتحازيه ليل اقصير .. إيزهن الجاضر نسمته وانجومة
وليل النكد يطوال ما ايتغير .. امظلم وريحة خامدة معدومة
ولو نصبروا عون الكريم ايدير .. إيفرج وهى مطبقة امغمومة
امغير عقل لبنادم ملول امتير .. ديمة امعجل ضايقات اعلومة

شكا بأوجاعة .. وسلم ورام اطباع موش اطباعة

جبل خشن فى عرضة وفى ارتفاعة .. تخلاق ياقرينى اتهدمة قادومة
أساوة مع وجه الوطا فى ساعة .. ثوا ثويت العيدان فى المفحومة
ومركب جنح كسر عمود اشراعة .. مشا اطلوم يطافر على ديمومة
يزهو اعداك لو يلقوا عليك ايشاعة .. يابال حاجة واكدة مختومة
واللى وين ما حق اللطيف ادّاعة .. لِيهانة وطيحت قيمتة محتومة
وان جاه نصح يسابه ايحل اسماعة .. العارف ويغسل مالشواه اهدومة
وناس واجدة عند البلا خناعة .. ولهم عند ساعة الراحة هير وزومة
أمنين الفلسطينى لوا مقلاعة .. ابحيطة ايعاند فى جيوش حكومة
وفجّر عبوّة للجسد مزّاعة .. بعد شاف اّمالة خاضعة مهزومة
ألقى افزاع جيرانة طفير إذاعة .. وخدعة سلام مالعدو مدعومة
لاينهضوه ولا ايجو فزّاعة .. نين بالعوينة تثمر البطومة
طلبنا الله ايعينا ع الطاعة .. وإجيب نصر يحيينا اهبوب نسومة
وبأذنه انّالوا مالرسول شفاعة .. نهار والخلايق بالعرق ملجومة

من طرف **عبدالحفيظ عوض ربيع** 2013-08-21, 8:18 am

لك الشكر على هذه القصيده اختيار موفق

اللى قبل ياصاحب اشداد اعزومة

اللى قبل ياصاحب اشداد اعزومة

رد: اللى قبل ياصاحب اشداد اعزومة