مختارات من رباعيات عبدالسلام بوجلاوي

من طرف **dude333** 2014-05-06, 7:31 pm

مختارات من رباعيات عبدالسلام بوجلاوي

عطيب العرب لا تجاريه ***ولا تقارعه بالخساسة

راك ترفعه ما تواطيه*** إن كان درت راسك براسه

الناس مي سوا في الطبايع*** الفرق بينهم موش خافي
إن درت خير في العفن ضايع *** ويردوه لجواد وافي

العفة ورفعة الراس***الراجل يعلن مقامه
ما يسهفك مال مرطاس *** باع الشرف والكرامة

إن ضاق خاطرك قول يا رب*** بفضله يفك العسيرة
وصوقر رضا الأم والأب*** ما خير منه بصيرة

قصير النظر لا تعابيه *** إن دار في جنابك خطية
مرات شخص فتان ماليه ***خوذ غلطته بحسن نية

اصّرّف بحكمة وترتيب *** وكل شي راعي حسابه
إن جاك عيب ما ترد بالعيب ***عليه نين تفهم أسبابه

يقولوا الحال يتحول*** إن كنت غير بالمال راقي
تزول صولتك ما تطول*** يفنى المال والصيت باقي

اللي تديرها فيك تندار *** وما تلحقك شي غرابة
في بداية العمر تختار*** اللي ترغبه في عقابه

هناك مثل من قبل قاريه *** ونبيك بيه اتّوصّى
إن كان صاحبك زين داجيه***الحلو موش كلّه تمصّه

زين لصل حتى بتلميح *** يجي عند غاية ظنونك
ما يعوز للدّي توضيح *** يشوف مطلبك في عيونك

نوصّي بكوني مجرّب *** نقول في نتيجة تجارب
الخاربة انتاجك تخرب *** اللي موش من قبل خارب

في ما يجيبن أفكارك*** ناقش أصحابك وحاور
وإن كان دخت شاور كبارك *** ما يخيب واحد يشاور

كلام جايك م العرب نقل***لا تاخذه م البداية
على مشاعرك حكّم العقل*** تبات منتصر في النهاية

لجواد يحتروا في المحاضر*** بعقولهم وطيب المراضي
ما تقيسهم بالمناظر*** كمّين صدر وارم وفاضي

بلا أفعال زينات لقوال*** ما تنال منهن مهابة
ما يحجب الشمس غربال*** ولا الشكر يخفي عطابة