راحن ايام النجع ، قصيدة لشاعر اشلبي بو ابصيص من مدينة البريقة

من طرف لاجواد نا بنتهم 2016-10-13, 11:39 pm

راحن ايام النجع والبيجو ... وجدّوا جماعة ينشدوا ع الجو
راحن ايام البوادي ... ماعاد تنظر نجعهم متقادي
وجدّوا جماعة يطلعوا الزرادي ... في كل علوة يقابلوا يشووا
يريدوا ربيع وجو يبقا هادي ... مو شاغلهم لا مشوا لا جوا
ولا عاد تلقا فالوطاه ازبادي ... امفيت ما حطب مجدب اذيابه حو
من كثرت الظلم اللي بقي متمادي ... اديّر وما تمطر عليك بنوا
..............
راحن ايام النجع والسياره ... و غابوا اللي كانوا اجواد عصاره
كسابين لطوقة وللخواره ... عليهم الملح الخيل لا اركبوا
ضرابين للعايب علي منقاره ... يطيح المقابل كان فيه رموا
اكرام يعزموا عالضيف بقول يساره ... حتى صغيرهم منهم عليه ربوا
وحفرة المقدم نارها وهواره ... عليها نصب شاهي بعد وعيوا
وشدوا مشوا للبير بوسكاره ... براميل جابوا وين ما اعطشوا
الدايم الله ماعاد منا ماره ... مكان نجعهم ما تقول شي انزلوا
وجدوا جماعة حيلهم سكاره ... ضنوة عطيبة ريتهم ما جو
بسيوفهم وامواسهم دهوارة ... في وجوهّم قاعد شرار السو
مع كل واحد طالقين ثغبارة ... وكل يوم تسمع جارهم اسرقوا
...............
راحن ايام النجع هن و طرفهم ... ما كل واحد يا ولد يعرفهم
يرقن عزامي وين ما نوصفهم ... ويحوسن افكار العقل لا اخطروا
هل نجع عامر يكرموا ضايفهم ... ويحاموه لا منهم طلب اللجو
يهونوا عليه الروح كيف شرفهم ... ولا يقربا بيناتهم العدو
فرسان كانوا موش شر سلفهم ... راحوا ذهايب عالمدن احدروا
يزين العمل ما انكملا صايفهم ... جيلهم لول خير م اللي تو
و جدو جماعة بايخين مسخفهم ... قليل عهدهم ماعمرهم وفوا
عرايا الروس يمشطوا في اغففهم ... ان كان رقدوا ماقبل شي يوعوا
غامض عليك ما تعرفا موقفهم ... امفيت المشاكل خير ما يجيبوا
............
راحن ايام النجه وامواهيما ... حلال البكا ديما عليهم ديما
عليهم تحوش اللي اسماح السيما ... بها كلعافي ينطرا ياكلوا
ان جيت قاصدهم يعرفوا التلويما ... بحيل الجهد بيش يقدروا يصبوا
عالجار والمجاور عندهم تقسيما ... عليه من اطرفهم وين ما جابوا
وفي كل موسم عندهم له قيمه ... ان جاهم ربيع افطامها وازوا
ويحوش الرغث فالليل في التظليما ... يزروا وما تنظر امعاهم سو
موش كيف توا مالها شي قيمه ... علي كثرتها ما قدح يملوا
ولمت هذاك النجع والتجليمه ... قدام عيني تقول ساير تو
فيهم اللي طوار ديه سقيمه ... كم كبش قارح بالجلم اجلموا
ماعندهم لا غبن لا تخميمه ... تلقاههم طرابة كلهم هاجوا
................
راحن ايام النجع ماله طاري ... ذرا علبه الوقت تم سحاري
مكان نجعهم هذاك مو متواري ... منا امواير قاعدة لاتو
تريسه اللي كانوا اسماح الطاري ... قريب يكملوا تحت الوطا دفنوا
عليما جنهم من سنين قهاري ... ماعمرهم رزق الحرام كلوا
اعزاز نفس من عند الكريم الطاري ... ايلين الحديد ولا لها لانوا
عاشوا امعيشة عز موش سهاري ... كيف وقتم عدا وهم عدّوا

من طرف **STAR** 2016-10-14, 8:03 am

انعم انعم

راحن ايام النجع ، قصيدة لشاعر اشلبي بو ابصيص من مدينة البريقة

راحن ايام النجع ، قصيدة لشاعر اشلبي بو ابصيص من مدينة البريقة

رد: راحن ايام النجع ، قصيدة لشاعر اشلبي بو ابصيص من مدينة البريقة