ما هو احتياطي ليبيا من الغاز وما هيا لحقول التي تنتج الغاز فى ليبيا

سؤال يتكرر هلبا في ليبيا وماشفتش حد جاوب عليه بطريقة صحيحة او حتى قريبة للواقع . الي هو:
قداش احتياطي ليبيا من الغاز الطبيعي وقداش ننتجو يوميا وقداش دخلنا السنوي من الغاز ؟
فقررت ندير بحث بسيط عالموضوع بما اني مهندس في شركة مليتة للغاز وعندي خلفية على بعض الحقائق .
تبي تعرف الاجابة عالاسئلة الي فوق وسع بالك معاي شوية لان الموضوع طويل . لكن يستحق القراءة .
اول سؤال قداش احتياطي ليبيا من الغاز الطبيعي وشن هي الحقول الي تنتج في غاز في ليبيا ؟
الاحتياطي الليبي المؤكد من الغاز يبلغ حوالي 54.6 ترليون قدم مكعب وراهو مش رقم كبير لما تعرفو ان ترتيبنا في العالم ال 21 وان دولة زي قطر احتياطيها ضعف احتياطي ليببيا 24 مرة .
باهي قداش ننتتجو في اليوم؟
, انتاج ليبيا اليومي من الغاز الطبيعي حوالي 2 مليار قدم مكعب , أكثر من 75 % من انتاج ليبيا من الغاز تنتج فيه شركة مليتة عن طريق حقلي الوفاء(550 ملييون قدم مكعب) ومنصة صبارتة البحرية ( 980 مليون قدم مكعب ) والباقي تنتج فيه شركة سرت للنفط والغاز .
باهي قداش تصدر ليبيا من الغاز يوميا ؟ وكيف يتم تصديره ؟
قبل الاجابة عالسؤال هدا ضروري نوضح ان الغاز الي يطلع من باطن الارض يطلع معاه حاجة اسمها المتكثفات حنتكلم عليها بعدين ويزيدو يفصلو منه في حاجة ثانية اكيد كلكم تسمعو بيها الي هي الغاز المسال .العملية هادي معقدة شوية وتحتاج لمصانع ضخمة وبالفعل عندنا 3 مصانع للفصل واحد في حقل الوفاء وواحد في مجمع مليتة وواحد في مرسى البريقة التابع لشركة سرت , وفي الاخير يفضل الغاز الطبيعي الي جزء منه يصدر وجزء يستعمل في الاستهلاك المحلي ( محطات الكهرباء وغاز الطهي )
كيف نصدرو في الغاز الطبييعي ؟
تصدير الغاز الطبيعي يتم عن طريق خط غاز يمر تحت البحر من ليبيا لايطاليا مملوك لشركة اسمها القرين ستريم , هدا بالنسبة لشركة مليتة اما بالنسبة لشركة سرت فماتصدرش في غازي طبيعي . انتاجها من الغاز الطبيعي كله للاستهلاك المحلي . لكن تصدر في الغاز المسال والمتكثفات الي زي ماقلت حنتكلم عليهم بروحهم .
قداش نصدرو من الغاز الطبيعي يوميا ؟
نصدرو في حوالي 800 مليون قدم مكعب اي اقل من نصف انتاجنا الي هو زي ماقلنا 2 مليار قدم مكعب . وللعلم ان الكمية هادي تمثل فقط 15 % من استهلاك ايطاليا للغاز الطبيعي , (في وهميين يحسابو الطليان عابيين علينا في الغاز بالكامل )
نجو للسؤال الاهم قداش سعر الغاز وقداش دخلنا السنوي منه ؟
بالنسبة لسعر الغاز , نقوللكم ان مافيش بورصة للغاز في العالم وسعره مربوط بسعر النفط .
في حاجة اسمها وحدة الاحتراق او BTU يجو يشوفو قداش في وحدة احتراق في برميل النفط ( حوالي 5.8 مليون وحدة احتراق ) ويشوفو الكمية الي تعادلها من الغاز الي تحتوي على نفس كمية الاحتراق , وبعد بحث مطول لقيت ان حوالي كل 5800 قدم مكعب من الغاز تحتوي على نفس عدد وحدات الاحتراق الي يحتويها برميل من النفط .
الخلاصة :
ال 800 مليون قدم مكعب يعادلو سعر 137 الف برميل من النفط لو ضربناهم في ال50 دولار وفي 365 يوم حيطلع دخلنا السنوي ممن الغازي الطبيعي حوالي 2.5 مليار دولار ( رقم عادي جدا ومش ضخم زي مايتصورو هلبا ناس )
للعلم الرقم هدا مش كله لينا لان في حاجة اسمها مصاريف التشغيل الي الي تفوت في ال300 مليون سنويا وبتزيد تنحي منها حصة الشريك الاجنبي ( شركة ايني غاز ) وبتزيد تنحي منها ايجار الخط الناقل للغاز الي مانعرفش قداش بالضبط حسب اتفاقيات المؤسسة الوطنية .
نرجعو لموضوع المتكثفات والغاز المسال .
قداش انتاج ليبيا من المتكثفات والغاز االمسال وقداش دخلنا السنوي منه ؟
للاسف مالقيتش رقم مؤكد لانتاج شركة سرت من الغاز المسال لكن درت حسبة تقديرية وجمعتها مع انتاج مليتة وطلعت برقم قريب مايفوتش ال 90 الف برميل يوميا لليبيا بالكامل .
حتى هو سعره مربوط بسعر النفط ,من غيرمانقول هلبا تفاصيل : الخلاصة ان المكثفات والغاز المسال يدخلونا في حوالي مليار دولار سنويا الرقم مش دقيق هلبا لكن قريب للواقع .
طبعا من المتوقع زيادة انتاج الغاز بشكل كبير في ليبيا في المستقبل لان في مشروع تطويري كبير وحفر ابار جديدة قبالة سواحل صبراتة وفي باطن جبل نافوسة عدة ابار تم حفرها وحتى اختبارها وفي الجنوب الغربي عالحدود الليبية الجزائرية تم حفر ابار غاز ذات جدوى اقتصادية , المشكلة الكبيرة في الغاز ان عملية معالجته باش يبدا جاهز للتصدير تكلف في ارقام ضخمة وتبي مصانع عملاقة وهد الي صعب يصير في وضع البلاد الحالي لذالك انا مش متوقع تصير حاجة في الحاضر القريب .
اخر نقطة في الموضوع : اغلب محطات الكهرباء في ليبيا تشتغل بالغاز الطبيعي حاليا وطلب ليبيا من الغاز في ازدياد بشكل مخيف .
تعديل .
مجمع مليتة ومصنع شركة سرت يستخلص في بعض البتروكيماويات الي ليها عدة استعمالات اهما الكبريت وتنباع بروحها اهم زبائنها تونس .



منقول عن Bin zahra

بارك الله فيك علي هالشرح الوافي ومنور إن شاء الله

بارك الله فيك على هذه المعلومات

شكرا للمروركما