غناوي علم وشتاوي ع الشيب والكبر والعمر

تذكير بمساهمة فاتح الموضوع :

الخاطِر شباب العمْر بَقَّى عَلَيْه بالخَيْر وهَلَب.
"زقلام العَبِيدي"
ـ ـ ـ
فَضْلة شباب يا الجديد عَقَّب قدِيْم داجِيْها اشْوَي.
"عبدالعزيز العوّامي"
ـ ـ ـ
غَلاك وشباب العمْر ضيُوف جَوْك يا عَيْن ومشَوا.
"منعم سَيْويد"
ـ ـ ـ
عَدَّيْت والغَلا يا عمْر يَومِي لَك وما بَيْت تلْتفِت.
"عبدالفتّاح العقِيبي"
ـ ـ ـ
العمر ما مشَى عَ الحال لُو كان يا غَلا جِيْت فَ اوّله.
"سليمان الشرّيمة"
ـ ـ ـ
متْواجلات شَوْر ضياع يزّابَنْ غلانا وعمْرنا.
"فتحي إدريس"
ـ ـ ـ
جَبَّيْت والغَلا مازال بَدَّرت شِي شوَي يا عمْرنا؟
"عبدالفتّاح العَقيبي"
ـ ـ ـ
قَمْراه زاهْية بربِيْع العمْر في امْبادِيْه يا عَلَم.
"حسن بومعلومة"
ـ ـ ـ
مابَن أيّام العمْر يواتَن ونا عازتِي بْهِن.
"خليفة الشلماني"
ـ ـ ـ
بكَيْت يا شباب علَيك اهْلبَك يوم نبِّيك تحضْرَه.
"عبدالعزيز العوّامي"
ـ ـ ـ
مسافِر وعَيْنِي فِيْه العمْر يا غَلا خايَل لنا.
"عبدالله اردانو"
ـ ـ ـ
يا حَسايْفي يا عمْر جَبَّيْت بِي ونا نَوْمِي لْهم.
"عبدالفتّاح العقِيبي"
ـ ـ ـ
متْباوِع شبابِي كبِر تقُول ما نظَر يَوم عَنْطزة.
"عيسى بوالقوّالة"
ـ ـ ـ
ع الشَّيْب يا شباب أَشْرَفْت في دَوْرة الغَلا نَيْن غَيْهبَك.
"عبدالعزيز العوّامي"
ـ ـ ـ
بكَّيتنِي ونا شايب حْدودَك تعَدَّيْت يا غَلا.
"عبدالكافي البرعصي"
ـ ـ ـ
جميع من تجيب الشَّيب منصح اسعَدي جَيّاباً لْها.
"فتحي إدريس"
ـ ـ ـ
كابْرِيْن نا وعَزيز تلِيْق يا غَلا ماعَدْ بْنا.
"عبدالكافي البرعصي"
ـ ـ ـ
حاسِب حْساب العمر كَنِّيْبه ايْجِي دُوْب الغَلا.
"مرعي الفاخري"
ـ ـ ـ
مِن نِيتِي نوَيْت دناه العمْر هُو اللي حال بَيْنّا.
"عبدالفتّاح العَقيبي"
ـ ـ ـ
اللي زدتّا في العمْر عَلَيْ عَزيز هو زادها غَلا.
"أبوبكر الصعقار"
ـ ـ ـ
بَيْنِي وبَيْن دناك الكبْر يا عَلَم تَوْمَج لنا.
"عبدالله اردانو"
ـ ـ ـ
طعَمة يا عَزيز العمْر اكْمَلَت في مْراجاة باسلة.
"عبدالكافي البرعصي"

ظلمت خاطري يا كبر ****فى نيتي غلاء غير هايبك

جبيت ياشباب العمر والعين ماغلا فيك سوقرت

يالوكان صغير انرد..... ونلعب فالشارع حفيان....... ونضحك مانعرفش نكد....... ونقعد طارب كيف زمان...... وعايش مايشغلني حد........ وانجي نجري لأمي جيعان....... ناكل نشبع لين انفد...... ونرقد من لعبي تعبان...... صغير يالوكان انرد...... لانكبر لانشوف احزان...... كبرت وهمي مالاحد...... وريت مصايب ياسبحان...... كبرت وحيلي لين انهد...... وفالضحكه ماليش مكان....... وخوذي روحي كان اتسد........ ويادنيا ماليك آماااان.

معشوق نا عاشق اليل عشقتونى على مقعدا اوهواه ولفتونى معشوق نا عاشق عشقتا حتى كيف جانى الصبح مافارقتا عاشق اليل من بوعيون سود بوسالف طويل وصفة على وصف ريم الحطية إخيل امخلى النوم فى عينى قليل تحيت سعد القطعانىىىىىىى

جميع من تجيب الشَّيب منصح اسعَدي جَيّاباً لْها.

الله الله يافاضي عدا العمر ماجيت فاوله

الله الله يافاضي عدا العمر ماجيت فاوله

مشيت يا شقا بلعمر *** اتسوق فيه ما صاد يلتفت

مقسومه الكبد عالثلاث *** وثلاث هن اللي فيا خلفن.Ah.Ed