قصيدة للشاعر مراد البرعصي بعد إحالته للعمالة الزائدة

من طرف c.ronaldo 2010-02-26, 3:13 pm

زدنا عللي الوطن قالوا عزلنا ..
أنسى فعل هلنا ..
الغالي اللي فيه ياما بذلنا

زدنا عللي الوطن قال الشريف ..
الجنب الضعيف ..
اتزقه وتلقاه ساهل خفيف ..
وناسي علي فعل مقدر عسيف ..
اطمع في سهلنا ..
تمل المناديه هزوة جملنا

زدنا عللي الوطن وانكان زدنا ..
المقعد وحدنا ..
لنا ايريدوه يانا قعدنا ..
نربوا على حب وطنه ولدنا ..
امتورخ جبلنا ..
سطور التواريخ فيهن شملنا ..
ولانا اللي وين ضاقت لهدنا ..
على من قبلنا ..
انهدوا بلا قدر تكثر سبلنا ..
ولانا ورا كل ثائر انقدنا ..
انخلوا عللنا ..
امشوهب انردوه وقتا حصلنا

زدنا عللي الوطن ثقلن حموله ..
اساهل انزوله ..
ينزل ولا طاع لرمام حوله ..
يكرب على جنب ولاى يولا ..
عماير جدلنا ..
لهن في جوازلهن إمراض فتلنا ..
انساتروبهن في بيت خايل زوله ..
حولهن عدلنا ..
يردن مع الطل فيهن اوحلنا ..
وتصلى ويالاك مربط ابغولة ..
صلاتك كفلنا ..
جازت ولا فوق فرده بغلنا

زدنا عللي الوطن قالو جماعه ..
اللي زاد باعه ..
ويمسك اللى فيه واثق اكراعه ..
ولانا غواطين ماليين ازراعه ..
ولا عاد صملنا ..
ولانا اللي عف الأنفس قتلنا ..
اربينا علي زين شايب اطباعه ..
أتشاور هبلنا ..
يدلك ولا عمر صاحب خذلنا ..
ولانا اللي وين صارت نزاعه ..
ايغث امغزلنا ..
ونرموا علي الظل يا سيد قلنا ..
وان جانا فحل ظلم صايل اذراعه ..
وروسم فحلنا ..
أتوقع جماويل جوشة نحلنا ..

زدنا عللي الوطن قالوا اكثرنا ..
عليه ودفرنا ..
وماعاد على عقل والى خطرنا ..
وحتى اللى كان رايم نفرنا ..
وكاره عللنا ..
وداير طوابير واحنا هملنا ..
وجدن مفاعيل منهن سمرنا ..
اسمور وذبلنا ..
ولثنا علي لرض شايط بللنا ..
وحتى اللي كان صاحب نكرنا ..
وخيب املنا ..
وسكر البيبان ما فيه طلنا ..

زدنا عللي الوطن قالوا عزلنا ..
أنسى فعل هلنا ..
الغالي اللي فيد ياما بذلنا ..