ياما بكيت عليها

يا ما بكيت عليها... وهي زاد تبكي ونا انودع فيها .... يوم السفر

مـاني نـاكــر................ بكايا عليها ف الصباح الباكر
وهي زاد تبكي ماسكة التذاكر.... امنين ما ايديا لامسن ليديها
صار الوداع مغير ماني فاكر..... مغمي علينا كل حد في جيهة

سـاعـة التـوديـعـة............... ومرّت اللحظة الخاطفة السريعة
اتقول لبعضنا انجددوا في بيعة ... نا لاورا نمشي وعيني فيها
وهي زاد جـلـّت عينها الوسيعة .... وجت راحلة في جرتي بيديها

يا ما بكـيـت انريدها......... وهي زاد تبكي بدمع وايدي فيدها
تمنيت يدّي امنيدها ما انحيدها .... غير التماني اتموت بأمانيها
بكـّا جميع السامعين غريدها ...... وانا مشيت وعبرتي كاميها

هـــي بـكــّايا..................... ونا زاد نبكي وضامها يالايا
وبين الدموع النازلات حكايا ...... مني ومنها دوب نسمع فيها
نحكوا علي لفراق والنهاية .........وفي أي ساعة ملتقانا فيها

بــكـا ومـجازف................ والدمع ينبض م العيون ونازف
مثيل ما يلامس في الاوتار العازف...اللي وتر عوده ريشته يبكيها
كيف ما يكسّر في القزاز الخازف..... تكسيرة قزازة خاطري نحزيها

بـكـيـت بـدمعـة ................. ذابت علي لخدود كيف الشمعة
جميع من ابكايا من اصحابي سمعه ...شاهد علي ما صار في وفيها
وكان صبح سبت اللي تكـفـّـا جمعة ... الايام عندي سبت نين انجيها

يـكـيـت بـحـرقـة ................... ونا ف الصعود وف السلالم نرقى
سيل م الدموع النازفة بالدرقة ........ بيدي انكفف غير واحل فيها
الله لاتعودك يا أيام الفرقة ........... امجرّب وغيري ما انودّه بيها

نوضن ببكاكن داوني ---مايرقد غير المتهني
-------------------------------------------
مشكور ياحسين عالقصيده
اختيار موفق
لك تحياتي

وين النوم ايعسل دوبه ...يخطر ونضو نشلوبه
انلايم في جفني عالنوم ..... وتخطر يا هاظاك اليوم
منامات العين امزاباه *** يجيبن غالي كي ننساه
غاب عزيز اتجينا بالك .... رانا يا نوم اعتزنالك
مشكور على المرور والاطلاع يا اسماعيل

صحيت على المرور

هـــي بـكــّايا..................... ونا زاد نبكي وضامها يالايا
وبين الدموع النازلات حكايا ...... مني ومنها دوب نسمع فيها
نحكوا علي لفراق والنهاية .........وفي أي ساعة ملتقانا فيها

كنك يا احسين شنو في اليوم
جاي متأخر وجايتك علي الاحزان ههههههههه
مشكور يا خوي وربي ما ايوريك سو ولا فراق ان شاء الله

ههههههههههههههه
مشكور على المرور والتعاليق مره هك ومره هك

مشكور يا غالى على ما طرحت

وين النوم ايعسل دوبه ...يخطر ونضو نشلوبه
انلايم في جفني عالنوم ..... وتخطر يا هاظاك اليوم
اشكركم على المرور والاطلاع