نار الغلاء يا دلع شبت فيا.....من يوم قالولي إنك ليبية

نار الغلاء يا دلع شبت فيا.....من يوم قالولي إنك ليبية

نار اللوعه

شاطت ومنها كبدتي مليوعه

والصهد راقي فوق يا دلوعه

ماعرفت كيف نصارحك يا بنيه

بنبوحلك عن سر نادر نوعه

صدق المشاعر مع صفاوة نيه

ليهم زمان مغيبات وروعه

إن الإتنين اليوم تمو فيا

وما نفكرش يوم انذيرها الممنوعه

كله برضاء ربي ورضا ولديا

أنا نريدك على سنة الله وطوعه

وكان تقبلي في التو قولي ليا

وقولي لبوك وجهزو المربوعه

وقوليلهم ناوي بطلب إيديا

ومانيش صايع ولاني من البيوعه

ولد أصل ولد ليبي ولد ليبية

وندير عرس يكون نادر نوعه

وكان بوك وافق وقال إنك لي

وباب الخطوبة نسكرو موضوعه

نتفاهمو ونحددو الجيزيه

ولي تركيا نشيلك شهر بإسبوعه

ونتفسحو ونكثرو السهرية

ونرجعو لوطنا اللي نحن لرجوعه

ونبدو نعيشو في حياة أسرية

ونعيشو تحت حكم الله وطوعه

نجيبو ولد من أحسن الذرية

يحفظ كتاب الله بين ضلوعه

ومن الطب يتخرج أحسن كليه

ويدور على بنية تجي في طوعه

تكون كيفك إنت يا دلع حقانية

نار الغلاء يا دلع شبت فيا.....من يوم قالولي إنك ليبية

الله الله .. من أجمل ما يكون سلمت يمناك وصح لسان قايلها