ما تقول حاشت ليلـــه للشاعر : عبد السلام بو جلاوى

من طرف **حبة مسك** 2010-07-15, 10:00 am

ما تقول حاشت ليلـــه ........ على نجع يطامن احذاه نزيلـــه
اخلى مراحها
ما تقول جت ملفوفــه ........... شايله غراير للعـرا مسفوفــه
ثنتين وصليبه فوقهن مردوفـه ...... تتايز ابهن مستهديه الخويلـه
الها أيام مدفوعه اتقول كلوفــه ...... اسبوع وايش من جالو بعد تحميلـه
لجارهم القاصر عادين الشوفــه ...... جايبينله فوق الحمول عديله
نصيح النظر ع الصلب وان اشروفه ...... قال الهوا والطبل صار يلـه
زغاريت نسوانا وصوت ادفوفـه ...... تجاوب حنايا لوديه لوليله
وتجى لنجع بانى مضيفه لضيوفـه ...... اسياده يجودوا والسنين محيله
شيخه برز في الوطن بين اصفوفـه ...... عليه تنطبق قوله ايعز قبيـله
حنون ع اليتيم إنسان صاحب روفه ...... وعاقب الدار ان صار شيل ايشيـله
ويساعد الفقير اللى اصعاب اظروفه ...... وعابر السبيل اللى رماه سبيلـه
حمال ووسيع البال مو جفجوفـه ...... ولا يرهبه طاغى بكثرة خيله
قاد ضد قوته سرايا حوفــه ...... وينما لفت ع الوطن قوم دخيله
واجوادى عفيف النفس رافع شوفه ...... ما لشهوته نفسه اتطيح ذليلـه
كاره الطمع عارف اميول احجوفه ...... يداعى شرابه في هوى
الرذيله وعارف اللى منه يسير جروفـه ...... حتى لو تندم ما ندم يقضيله
وين ما يطول الوحل في غضروفه ...... العوده عليه تكون مستحيله
اخسر م الكرامه والشرف تفتوفه ...... دفع ثمن غالى غير مو صاحيله
وعنقل ليوم البعث فوق اكتوفه ...... على اثر عار في الدنيا اذنوب ثقيله
بلا طريق مداعى مع حجروفه ...... اتقود للمهالك فيه عين ضليلـه
امعا وطن مريب مظلمات اكهوفه ...... تايه امودر مارته ودليله
يتهمه بكثرة دوته واكلوفـــه ...... اللى ع الطريق الساهله يوميلـــه
الذاهب قوى عرفه صعيب انكوفـه ...... عليه فعل عيب وهو صواب اصفيله
شين الصباح يحق في شقلوفـــه ...... تقول بدر في لونه وفى تعديلـــه
والمضحك اللى متساومات اضلوفـه ...... كيف وردة الربيان متهييلــــه
والقرد في عيون امه هميل ادفوفــه ...... ولا صقر بوع ويم جللـــــيه
الانسان له طبايع في الحياه مألوفـه ...... جبل صم ثابت مصعبه تحويلـــه
اهناك شخص ميزانه اخفاف اصروفـه ...... واهناك شخص في الميزان يردع ميلــه
واهناك شخص مو صادف عمل معروفه ...... اثماره بعيد يطيح عوج نخيلــــه
الخير افعله وانساه لك مضيوفــه ...... اللى تديرها منه بلا تجميلــــه
والعيب يلد عيب ودوم عيب زلوفه ...... وللزارع الشر الشر هو الحصيلـــه
جبنالكم معانى وامثله معروفــه ...... بهن تفهموا مقصود ما نرميلــــه
يقراه الفهيم وما فتح مظروفــه ...... عنوان الجواب المحتوى يوريلــــه
سريب خطره عصران صاحب نوفه ...... شريف وعفيف ومنسبه من عيـــله
مو امخلفه بغنوف من بغنوفــه ...... امصفى شريف النسب في تنسيـــله
ولكن الدنيا بالخطر محفوفـــه ...... اكحيله فنت والشيخ ساق رحيلــه
عزاى لضناه انقول هى امخلوفـه ...... وهو بالهناءا في الاخره ندعيلــــه
مكتوب امحسوب العمر لازم يوفى ...... والموت حق ما منها اتفك وسيلـــه
وداره عمار ابسمعته مسقوفــه ...... وزين الطبايع ورثه لعويــــــله
يخلى عذاه اكوام فوق احروفــه ...... ارجاع الخريف اتبان جرة سيـــــله
العام الكبير اتحول غله كوفـــه ...... وفى حصايده يلهب الحول قصيــله
والعام العطيب تنال من كركوفـه ...... انتاج ما يرد اتعبك في بنتيلــــه
وعكس الزمان الماضيات اسيوفـه ...... ان دالك تذوق الويل من تهويـــله
حتى وهو زماناً ما عليه حسوفــه ...... اتغوص تطق الطين في برميـــله
الدنيا جميع الوانها مكشوفـــه ...... طليس حيلهن والزاهيات قليلـــه
تردح لك رديح امصوحبه امخفوفه ...... وتنكر سريبك بين يوم وليـــله
وتقابلك بصحه وجه مي مكسوفـه ...... وتضحك مع اللى ناويه تغييله
وتغفك ومن يالاك مي مغفوفــه ...... ولاعد اتقيلك كان ردت القيله
من جيهة اصحاب المعرفه معيوفـه ...... مالهم على قصقالها تعديلــه
اتخلى قويهـا يتقـى بكفوفــه ...... بين المرض والكبر بارد حيلـه
ولكن نصيبك م الحياة اتشوفــه ...... ووان الكروب الصبر راه فضيله
كلام خطره واحد اشهر بوقوفــه ...... مع من زرابه ظلم جاء يشكيـله
شخصيته اللى بالمرجله موصوفــه ...... راحت امعا خلوة امراح اكحيله
اللى قبل كانت في وطا مرضوفـه ...... بكل نوع من صنف النبات هميله
منبوت بر لا قوسه ولا بيروفـــه ...... ولا فيه تنظر صفصفه وانجيلــه
بعيد ع البقر والضان لا مقطوفـه ...... ولا مدوسه داير ابهر زغليلــه
نوار لسلسه تحلف عليه حلوفــه ...... قماش اطروحه اتجار للتكييلــه
متخابل ايكيد الواصفين اوصوفــه ...... فيه تنعدل ذروه الناب الميلـــه
اتقول في الخريف وفى الشتاء معلوف ...... عليها سنام اتحير في تمقيلـــه
سيدها على لخرين واخذ نوفــه ...... لها باختيار الدار والتمويلــه
وين جلم الجلام عقد صوفـــه ...... وطاب الشعير وصاحبه واتيلــه
خذا مع المناجل والشبك مصروفـه ...... وخيشه تقام الشمس في التقييلـه
هاذاك وان حدرتا وهى ملهوفـه ...... لمنهل عقار الها قديم عزيلــــه
التبن الرقيق يزمها سفسوفـــه ...... قال من القول السمح هيل اعطيله
بعد الانتشار اتحقها مضفوفـــه ...... تجضر عليـه وعندها تشتيلـــه
واتجر شور منهلها القود ولوفــه ...... ان كان تبعوها ما تريد بديلـــه
تقابل على حيضانه مصفوفـــه ...... جيش منتظم بالجمع لمر اعطيلــه
وين ما عقاب الصيف جت صيوفه ...... لمو كـارها تشعربها تمشيلـــه
تغافله وتعمد جيهتا امحدوفـــه ...... مـا يعنـها عنـان التقبيلـــه
وجاد الخريف ابمزن دار اعطوفـه ...... اشكعت فيه براقه وذاب نزيلـه
ما من عقيره جابها منسوفــه ...... ولا في الشتا وقف الغيث هطيـله
وهاج الغديد الحجل بو صرعوفه ...... بدا في الحطب والحيط بدهكيــله
حشاش منطنى خصن عليه اكيوفه ...... متجوشن ايدور في بلا ورقيلــه
زرق م العقاب ودارها لفلوفـه ...... وين كا نظر مشيه نهار ضليلــه
ابقى اتقول يدرب على معزوفه ...... يزيد كل ما جرب الها تعديلـه
عنيف شعت ما يرحم وهى مهفوفه ...... ان ميزر وزام وقام بتبقليـلـه
لنيابه ان كثر م الغياض اصروفـه ...... مفيت شى واحد ما القيت مثيلــه
صفاره انذار لمنطقه مقصوفــه ...... تنبيه لاستناف القصف صوت صكيلـه
مركز على بغداد وارض الكوفـه ...... كمين حى عامر دمره بليلــــه
سموه وين ما داروا عليه ابروفـه ...... اسلاحهم ذكى للبشر في تقتيلـه
حصد ارواح في كابل وفى كوسوفا ...... ورفع وجنين وقبلهن شاتيــــلا
نين ثاركم عيل حزم شرشوفــه ...... باحزام يتفجر وين زر فتيــــله
جيش الاعدا في لرض حط انوفـه ...... وبيض اوجوه العرب بمفاعيـــله
واخذ قرار الموت دافن خوفــه ...... وغاضب وزاهد في الحياة الهزيلــه
ولاخر اباروده ومالتوفــــه ...... يصطاد في العدا نازل عليهم ويلــه
نسف كم تبوس اطرافهم واطروفه ...... خلاهم شمارى موش متغاضيلـــه
مطاويح ما من جمجمه مشلوفـه ...... اليهود قتلهم يشفى ارواح عليـه
وما من جريح اقتله قو انزوفـه ...... والناجى ابدال الرجل داير قيلــه
ولاخر اختار لطايرة مخطوفــه ...... اهداف جابهن فوق الوطاه دقيلــه
تجار وعساكر مريبين اجلوفـه ...... عجنهم معا الركاب شيله بيلـــه
خليك من امتاه الامن بو شلوفه ...... هياله يعن اللهب زاد شعيلـــه
ارقى لساس متصدع على هيفوفه ...... هوابه حدر في النار بتصلويلــه
اجثثم انشالت بالوسخ مقحوفــه ...... سلاك سمح في مقتل انساء واعويله
وبوش ما اقدر ينقض ارواح الوفـه ...... اشفق عن رفيق الذان والبرطيلـه
احدود فزعته صرح بقولة سـوف ...... نركز على الارهاب نين نزيلــه
ولكن الواضح بالكلام اهدوفــه ...... امحرش على الاسلام متعبيلـــه
له م اليهود الكونيه مدفوفـــه ...... على ما ايريد الكونغرس ما ضيلـه
وضامن جميع اخسارته مصروفـه ...... من شور الخليج ولمن لإسرائيلــه
عطوا حق قاذفته امعا مقذوفــه ...... والجيش نال مطلوبه بلا تعطيلـــه
وسكير ونكير ووفروا حلوفــه ...... وعلاج الجريح وغارمين قتيلـــه
وكوني عنان ومجلسه مكتوفــه ...... ايديه وقوانينه بعد تفعيلـــــه
وان دارت قرار ايبيد بين ارفوفـه ...... القمه على راى البشير عميلــــه
نظرها قصير ان كان مي مكفوفه ...... وفى سمعها والسانها تثقيلــــه
توافق سواء ترضخ سواء معسوفه ...... اتبع وصوت الشعب ما تصغيلـــه
وياسر اميسر سلطته موقوفــه ...... نين عينوا محمود لتعرقيلـــــه
سواء برغبته ولاعمد منتوفــه ...... اكتاف من ولايم لحيته مسطيلـــه
عصاة العرب من راسها معكوفه ...... وفيهم يقنجوا بالعصا الطويلــــه
يجاروا يريدوا م الوطا شنتوفــه ...... وشارون طالب م الفرات لنيلـــه
اشروطه عليهم ع الدبر مردوفه ...... وما حد يعارض خوف من تزعيلـــه
المهم يرض ما ايصير اعزوفـــه ...... على حل بوش وفكرته الجميلـــه
املطخ بدم المسلمين اكفوفــه ...... امجرب الهم مشهور بتشنتيلــــه
امغير كيف ما يذبح انسان خروفه ...... مع من اكبار احبارهـم تحليلـــه
من ايهودى لحيته غفوفـــه ...... وقلبه على الاسلام في غليـــــه
مليان نين متزردم امعبا جوفـه ...... حتى ع المسيح بحقد وامقويلــــه
وجورج ايفذ في امرهم بحروفـه ...... اللى امحرفين اسياسته وانجيلــــه
بجيشه على بغداد صار ازحوفـه ...... يحساب في نهار يطول مو ساعيله
لكن امعا وابل ارقاق ازروفــه ...... اعجز عن اوصول الهدف باساطيله
ايريد يتسلم ورده اعطى خرشوفه ...... وشوك مختلف لصناف في تشكيلـه
حموه ديروا دونه تريس اجطوفـه ...... شباب وطن من صفوة مخاير جيله
الحاصل العب ع النار بو شفشوفه ...... بذيله وهو في النفط غاطس ذيلـه
وسواء له تكون اللى مضت شعوفه ...... والاينتصر شارون في تغفيلــه
وتفضل امريكا ع اليهود عطوفـه ...... ماى حامله لدموعهم تسييلــه
اساع ينكسر وتجى على نفنوفـه ...... ويلقى هدف لنجاس هو تضليلـه
على الله تصبح الارض به امخسوفه ...... لقــارون قبله ما جر يجريلــه
ورمل الجزيره يردمه بسيوفــه ...... ردمه اللى سموا العام بفيلــــه
وان كان صفنا سلم امام اصفوفه ...... ظنــ ينو للكويت اكليلــــه
اترابه انداس وثروته امغروفــه ...... وشيخهم امقابل عاصفه بدفيلــه
شايخ عليش وجغمته مرشوفـه ...... ولالـه قـرار ولابيده حيلـــه
بلا عقل رابط جمجمه منشوفـه ...... بعقال به حلال بلربعه تعقيلـــه
سواء عمد عينه باصبعه مطروفه ...... والام الغشم يحسابها تكحيلـــه
الحاصل سريبه ع اليسار احدوفه ...... خير من دواخ الراس في تفصيلــه
خطرها الالصفر غليظ ادفوفـه ...... وسيده اللى مسع كمل تمثيلـــه
لاجل أفكارى في الكلام قطوفه ...... انريد السموح اغلبت في تكميلــه
واختام العلل م النار يوم الطوفه ...... شفيع امته صلوا عليه جليلـــه

للشاعر : عبد السلام بو جلاوى

من طرف **STAR** 2010-07-17, 1:33 pm

الغالى ما يجيب الا الغالى شكراً يا بركة على ما طرحت

ما تقول حاشت ليلـــه للشاعر : عبد السلام بو جلاوى

ما تقول حاشت ليلـــه للشاعر : عبد السلام بو جلاوى

رد: ما تقول حاشت ليلـــه للشاعر : عبد السلام بو جلاوى