زول جميل يانا اليوم هـاوي

زول جميل يانا اليوم هـاوي** قاســـي كنت خــلاني ضعيف
شوف الريم خزرات النداوي**من للعيــــن من غيره وليــف
ضاوي الوجه لوراه ضاوي**كيف الشمس في المزن الخفيف
دوره ماح في طوبه سماوي**كي الجريد في النو العصيـــف
فــوق النحر سلسلته اتهاوي**كاشف فوق مرمارة رصيـــف
ريق لذ من شرب القهــاوي**ريحة رق من نسمة الريــــــف
يســحر في بسماح الحكـاوي** وبترديع الاسلوب اللطـــــيف
ا نطاقش فيه في اركان الخفاوي**اطقاش الريم للعشب الرهيف
ناره في تطــــــلق في شظاوي**تشــــــكع نين في عين الكفيف
شوقه ري عرق القلب راوي**هيل وكيل مو نطق ورشيـــــف
نقرا فيه في لحــــن الغناوي**ونكتب فيه عاللــــــــــوح النظيف
فارح بيه طاير بيه اهواوي**فرحـــــــة وطن برجاع الخريف
اللي لرياح واشموس الضحاوي** يصلن فيه لاهفاته لهـــــــيف
لا فـــــرقان فيه ولا حذاوي**خالي خلو مقطــــــوع الخليــــف
ياخد الليل فوق روس العلاوي**ذيبــــه شين عواي ونحيـــــف
حـــــــن الله داواه المــــداوي**وجـــــاه اللطف من عند اللطيف
بغيت ارجاع موعاطي جهاوي**ايـــــــدخن بات لبروقه خطيف
انفلـــــتن فيه عازقات العذاوي**زغــــــراتات في النو الكثيف
نشابات في عوص الحنــــاوي**قلاعات للـــــدرع الكنيــــــف
طواحات تفلة على الكــــداوي**بين حيـــــــوط وتراب ولفيف
هضا شيء من جد اوحكــاوي**مبداء ســــــرد مو كله طــريف
عندي عقل يلــــوي فيه لاوي**حــــــزنه دوم للطـــــربه رديف
فواهق غر من كل الجــلاوي**اتغــــشم كل عــــــراف وظريف
يطير نوم حلــــوات الغفاوي**بكا بغداد والقــــــدس الشريـــف
تحشد مال ورجال وتقـــاوي**اقران الشرع والديـــــن الحنيـف
واحن غير تطبـــيل وادواوي**وعرض اجيوش وخداع ولصيف
كيف الراي معندي فتــــاوي**وكيــــــــف اندير منعلام كيـــف
روحي روح نكارة شهـــاوي**وراســـي راس ميقعد بكيـــــف
عقلي عقل يرقالهن سمــاوي**قسو الحرب والشوق العفيــــــف
لاني كيف لقاقت اللهـــــاوي**مظلل تحت من مزنة الصيـــــف
لا نعتز بسماح الكســــــــاوي**وعلو الجاه ومعيشة الهـــــــــيف
ما من ملك خير منه رعـــاوي**وما من حر خير منه وصيــف
غير الحظ وين ايكون شــاوي**ايكبل يد الانسان الحصـــــــيف
لا له قنو ضمار الصهــــاوي**ولا له مال للــــــزين وظيــــف
ايبدل فيه خيبات السعـــــاوي**طراد المجد بطــــــراد الرغيف
يلاوي بين القيود المطــــاوي**قبـــــل الي مرباعه يصيــــــف
عليــه يشوخ كم قالت ارباوي**دابــــه نح واتكـــبر وزيـــــــف
في سباه يرضــــــا بالدناوي**جمــــــع المال وجه مو كســيف
كي بندير نقاحت الجـــــاوي**هلي دوم طايب عالرجــــــــيف
كيفه قال كلني عالشهـــــاوي**ايروعــــــــك يوم تلقاني حليف
وهو بطلات في داه العزاوي**لو مرباع لا يبـــــــقى امصــيف
مع العدوان ابجود ايجــــاوي**وعالصـــــحيب جبار وعسيف
نخاف علي تستاســع فجاوي**لساني مر وخطـــــــابي عنيف
يبقى خير تقصير الخــطاوي**امفيت الصبر ما حاجه انظيـــف
لغير الله ما عندي شكــاوي**ولغير اللـــــــــه مانبي نصــيف

بارك الله فيك على المشاركه

مشكور على هذة المشاركة الجد قيمة