يوميات ليبي***

من طرف الصياد 2009-04-26, 5:07 pm

انوض الصبح نحاول نقنع نفسي بأن الحياة حلوة وسعيدة

وبما أن نفسي درويشة وعلى نياتها نصدق وانوض فرحان

واني طالع للعمل يلاقيني واحد يقولي بالله ولعة لو سمحت / نقولله لا ماعنديش / يقولي شنو ماادخنش؟؟ مش عارف شن دخله فيا .

مانبيش نحكي عاللي يصير في العمل

واني مروح نخش نلقى بوي جايه ضيف / نخش نسلم عليه ويبدا في رحلة القصقصة وين تخدم ومن وين متخرج ويختمها بسؤال صقعوني / كم معاشك ؟؟
مش عارف تقول إلا بيزيدني ولا بيقسم معاي .

انوض بعد القايلة نحس في أيدي توجع فيا / يقوللي خوي : يدك اليمين ولا اليسار ؟؟ / تقول إلا كل وحدة ليها علاج بروحه .

نطلع للشارع نلقاهم مسطرين في الشوكة تقول بالوات ضي / تقوللهم السلام عليكم يقولك واحد منهم شني كنت راقد / وللعلم السؤال هذا يطرح فيه عليا نفس الشخص من أولى ثانوي .

يرن تليفوني / رقم مانعرفاش / انرد ، ويطلع يبي عماد / نقولله غالط / يقوللي باهي أنا كيف أ نحصله عماد أهوا ؟؟ ديرله قهوة هذا .

نفتح التلفزيون ونتفرج على MBC 2 يخش عليا خوي ( مش اللي بكري واحد تاني ) يقوللي شنو هذا فيلم ؟؟ / على اساس القناة هذي تنقل في الدوري الإسباني .

ماعادش عرفت روحي هل أني ماعنديش وسعة بال ولا الشعب يستعبط عليا

وهل الحياة حلوة غير أني متعقد .
Very Happy