مرايف علي وطن

مرايف علي وطن منبوت قزاح ... وعقورا اسماح ... خلا تحلف عليه مسكن اشباح



مرايف علي وطن سمح الخلا .. ونسومه شفا .. ارقابه امحلا صيدهن في المسا
امشرق بعد فات طبرق رقا .. تلقي اجباح .. اتفيض مالعسل نين نقط وطاح


امرايف علي وطن صيد ليل .. ومعايا دليل .. خبير في الجدي ونجمة اسهيل
وكروزر انقدعبها نهارا طويل .. عجلها املاح .. ترقي وتنزل امعا كل مطراح


مرايف علي وطن وليال سود .. ومعايه اوحود .. رجاجيل قنصهم لز موش بارود
اجواد يخبرو بوشيص عند اطرود .. عقال وركاح .. سريعين الطريد كيف طلق ارماح


مرايف علي وطن نرتاح فيه .. وين ما انجيه .. ونشوهي علي نار الحطب في خلاويه
اللي النفس تطراب كان جبت عليه .. والعقل يرتاح .. ونسهري بلا مل لاعند ضي الصباح


مرايف علي وطن سمح اطلوب .. انمطرت اشبوب .. يخضارن جميع شفاريه ورقوب
الطوقه امعا لغره وان الغروب .. تسرح اركاح .. وتريض في ربيع صابا ذباح


مرايف علي وطن ماريت زيه .. ويطلق النيه .. ندهور امعاه كل صبح وعشيه
ومحلا الشراب من فم قربة امياه .. ونبقو فراح .. نا والرفق في صيد مسبول الجناح


امرايف علي وطن سمح الملز .. وطيرن زكز .. شاهين فوق مركازه برز
ونقنص به وحال غايتي نقنص خزز .. ونجي في سماح .. وندير عشوتي في رق سمح مشراح


مرايف علي وطن سمح ارقود .. وريحن خمود .. وننسي جميع التفاكير والنكود
وطلق النظر في نجم ماله احدود .. ولفراش نطراح .. وننعس نعس سمح مبسوط مرتاح

سمحه القصيده لكن لوكان اتورينا من قايلها .........مشكور ياليد