الأم..

من طرف الفهد 2010-10-16, 6:30 pm

لا قبل قالوا لا حنان بعدها تسمر علي شانك الليل وحدها

لا قبل قالوا لا هناك مثيلها ولا فيه ف الدنيا حنان بديلها
تفرج عليك الهم كي تحكيلها وما من دبارة خير كي تنشدها
تمسح دموعك وين ما تشكيلها وكان قلت يام اتنوض من مقعدها
وبيتك هذك حايس ايحير دليلها ليلة رقاد الناس ما ترقدها

هي المحنه وهي العطف كله من اخلاف امنه
ان غبت تسمعها افلين كنه اتكابي بطول الليل في مرقدها
وهي اللي رضاها من رصيد الجنة لوما الشرك انقولك تعبدها

مي منانة وهي الود كله ومنبته ومكانة
وهي اللي معاها ما تجيك خيانه رضاتها رضاك وكل شي يسعدها
تفرح مع فرحك وهي زعلانة وتشكر نباك وشينتك تجحدها

هي العطوفة علي كل غايب لاحقتها خوفا
وهي اللي تمشي كل حد بضروفة كي زوجها والبنت كيف ولدها

هي اللي لو ريتها اتقول مرحبا ع الحال لا لاقيتها
تواطي علي شانك طرايق بيتها يوم ميتك والناس ما تنقدها

هي اللي صبايا حتى ان كان تزعل للخلا بكاية
كان حقت العيب اتقول عنا هايا ويجن اوقات ما تلقى اللي يسندها

هي اللي لولاها مايصير ف الدنيا عمار بلاها
يلتمن ادموم الناس من سباها وما من بعيدة بالنسب تعقدها

هي الحنان وهي مصدرا في كل كاين كان
وهي اللي خلقها ربنا سبحان من ضلع آدم ف الكتاب اكدها
وهي اللي عليها حرضن لديان رضاتها ارضات الله كي تاجدها
كي ذكر مريم بنت بن عمران الخالق الباري بالعذر مجدها
باتت اعجوبة سر ها الزمان جابت غُلام ومن الدنس باعدها
وموسى عليه اعطفت ف الميدان مرة الطاغية كيف الكريم رشدها
وحنة حليمة حن م الوجدان ع الطفل اليتيم وجوزها حودها
حتى وهو فقير الرزق من الرحمن ذكر الكرامة ف الكتاب خلدها
وباتت خديجة للوفا عنوان مع زوجها صبت بحيل جهدها
وما من امثال تجيك في الأديان تبين مواقف الأم كي نجبدها

ما فيه والي كيفها ولا فيه هيف يجيك يشبه هيفها
حتى كيف تلحظ في منامك طيفها تصبح سعيد وعيشتك حامدها
مهما يزيد الشعر في توصيفها وتجمع جميع الناس وتمجدها
ما يقدروا ضني علي تشريفها شيالة عمار الكون في مزودها

لا قبل قالوا لا حنان بعدها تسمر علي شانك الليل وحدها

من طرف المارد الأصفر 2010-10-17, 7:18 am

كلمات سطرت بأحرف من ذهب بارك الله فيك أخي الفاضل على النقل وفي الشاعر حسن بودردية

من طرف جلنار 2010-11-25, 12:08 pm

الأم..

الأم..

رد: الأم..

رد: الأم..