اصحاب واجدين و فى الوسع مكثرهم

اصحاب واجدين و فى الوسع مكثرهم ***وفى الضيق تشتهى يا خوى ما تنظرهم

امغيـــــــــر مناظــــــــــر *** ويوم عازتك ما زول منهم حاضر

وتبقى وحيد ومن كسادك جاضر *** وتنشد على لصحاب ويش صارلهم

واصحابك اللى ما هم تريس محاضر ***يغيبو اوقات الكرب كى اتدورهم

****

فى الوســــــع حضـــــــاره *** وان لاقوك تاجد مرحبه وحراره

وان ميعدو الرواحهم شكاره *** وهم ع الخيا مبناه ساس حجرهم

وديما لفعل الخير له دواره *** يتعجب اللى يسمع ومو خابرهم

عشرتهم معاك يا خوى غير خساره *** صحبة مصالح مو بعيد نظرهم

لو تنتصح منى خذيت ادباره *** خلاص صحبتك تقطع اليوم جررهم

*****

امغيـــــــر انساهـــــــم *** اصحابك اللى كاثر اليوم خطاهم

ان عاشرتهم تبقى امغير معاهم *** اتداجى ومانك ع الخطا حاجرهم

ولو تنتصح تسمع كلام الفاهم *** وتاخذ خبر لصحاب وموايرهم

اللى وينما تبقى نزيل احذاهم *** تعيش فى دلال وبالفخر تذكرهم

طعامة الجايع وين قاصد جاهم *** وقولة ايسارا حجة اصغيرهم

ويحمو الخايف وين جاء لجباهم *** فزاعه ايفكو الواحله موعرهم

على اثر العصر ربى الجود عطاهم *** على كل حد صاعب خشوش بحرهم

عديم راى هلى بصحبته خاطاهم *** متباعد على لجواد ومهاجرهم

واختار النذال برفقته داناهم *** وهم بالخساره ما اربح متجرهم

صحاب واجدين و فى الوسع مكثرهم *** وفى الضيق تشتهى يا خوى ما تنظرهم

اخى اشرف ادريس البشكية لو سمحت ان تزودن بماعندك

مشكور على هذة المشاركة الجد قيمة

خود الوسع ...وزيد عليا غادي ... نويت باقي العمر بنقعد هادي لاعاد نبي دوشة ...ولا كلمة السو بالعسل مرشوشة واللي ينبش عالشر يلزم حوشه بنقعد مرتاح غايتي ومرادي لاعاد نبي نصارع وفي كلام السو ماني بارع وكل حد فينا بيحصد هاللي زارع وزرعي نا بنحصده بذراعي ولاعاد نبي دوة واللي ناوي السو يرفع سوه وفاعل المعروف نصاحبه و بمروه ونود الخير للكل كيف اولادي خود الوسع وزيد عليا غادي وصلوا عالنبي الهادي