نلقالك العذر أمنين ويوم الخطا تشهد عليك العين

نلقالك أمنين أعذار
ويوم الخطا شاهد عللي صار
ريتك بعيني مايفيد أنكار
ريتك وأنت مسلمه الأيدين
ريتك وريت حبنا ينهار
وريت الشك ينتهي بيقين
كيف وليش بالله ياغدار
هنت عليك وبعتني بالدين
أحسبتك حنون أتصون الغلا بأقدار
أحسبتك حنيني أتكافئه بحنين
أحسبتك رفيق معاي في المشوار
أحسبتك مسكين ماحسبتني المسكين
هديتك قلب كل حياه وأنوار
عطيتك حب يكبر مع السنين
درتك حياتي المغلفه بأسرار
وحطيتك بكفه بعيد عالخرين
أمنتك علي وقتلك تعال أختار
بين الروح وبين المحبه وبين
العقل،وقتلك لاتعجز ولاتحتار
أنكنك دخت أملكني بلا تخمين
وهبتك الفرح وكافيتني بامرار
جنبتك الحزن وأصفيت نا الحزين
حوطتني ياخاين بفعلتك بالنار
وبدلت ضحكي دمع وعلمتني الأنين
الله يسامحك يلي زورت في الأقدار
خلفت فيني جرح مايبرا مع التهوين
الله أيسامحك يلي سلمتنا للعار
بين العشاق أسمانا المنبوذين
أسوء قصص الحب نحنا لهم تذكار
وأنجابو سريب أضحوكه نحنا المعنين
صرنا في عيون الاصغار أصغار
صرنا أتفه شي يمشي وله رجلين
بعد كنا للحب موقع ومضمار
شوف كنا وين وأنتهينا وين
~~~~~~~~~~~~~~~~~~~~~~~~~~~~~~~~~