ياالله دعاء لي ليبيا

من طرف **العاشق الصغير** 2011-12-03, 6:43 am

يا الله يا عالم بكل خفية .. يا الله يا عالم بكل اسرار
يا اللي تجيب الفارغه مملية .. يا كريم يا قادر ويا غفار
يا قابل دعا الداعي بجد ونية .. سميع المنادي في سحر لفجار
تجعل بلادي زاهية وهنية .. وتنعم عليها بصحبة الاخيار
تزها جديد وفي اثياب هدية .. ترمي القديم واتغيير المسار
تسلح قديم الثوب والمبلية .. ما اتخللي منها خرقتاَ تذكار
اللي مرقعه ترقيع بو سعديه .. واللا كيف لبساته البو منيار
تلبس جديداَ ما عليه غبية .. كيف الذهب صافي يزيد اعيار
وتنسى اضغانا ما لها عدية .. صعيب عدهن بالحيل عالحضار
كان ودنا يجتمعوا الليبية .. على كلمة الحق اومالها نكار
على راي واحد كلهم جملية .. ما يصيرحتى شي ماللى صار
خش بينهم واحد بسوء النية .. شيطان غايته بينهم يسبب ثار
الله يلعن الملعون دار قضية .. بعض المداين فيه شيط نار
في سيرة الماضي الهلالية .. اللي يذكروها ويحفظ الذكار
راه عمّر بلاده وسوانيه .. لو كان بوزيد عمار
على الله تصبح حماده صحريه .. من حاش بوزيد دمار
وعاد الكتايب من اخباث الفيّه .. معا المترزقة في نشرة الاخبار
وعاد يقصفوا باجراد عنقودية .. سكان ليبيا الامنين احرار
ومصراته اللي ظلت بلاد عصية .. تمت جهنم لا ابعاد الدار
لا تعتني باسلاح صاروخية .. ولا بالمدافع من ثقيل اعيار
ولا بقنابل قالوا انشطارية .. ولا بجنودا في جلبهم عار
فراسين كسر كلهم ثورية .. ايحاموا احما دون جار الجار
واجدابيا العنيده راسخة وقوية .. بوابة الشرق اللي خذت لافخار
انشدوا الطليان منك عليهم جيه .. عند قصر اجبيل وبير بالعيزار
ويوم الكراهب هاللي مسمية .. وبير ابلال و موقعة الابيار
ونالوت والزنتان ويفرن الامازغية .. فدوا ليبيا ما لحقهم عار
رجال بالصحيح وكلهم همية .. يفكوا اللي توحل انصار نهار
عطبك عللى جابهم من جيه .. ايريحوا ذوايح كمشة الاشرار
البيضا ودرنه وطبرق الشرقية .. مع بنغازي العتيده كملوا المشوار
قادوا ثورةَ عالظلم هي سلمية .. كانت بدايت ثورة الثوار
الله يكمل عليهم بالطرابلسيه .. هلنا بلاهم ما انعمر دار
هم هلالنا في الليل يضوي ضيه .. قريب تنفرج عليهم من الحصار
رجالهم ارجال فكرا ومفهوميه .. وزادوا العلم ووسعوا لافكار
ويلتم شمل ليبيا جمليه .. ويطلع عليها بعد الغيوم نهار
ويجيك طفل شايل معاه هديه .. بدل بندقه شايل اكليل أزهار
هاناك يتهنى خاطرى طاريه .. وتصبح بلادي من نعيم اديار
نرجع الماضي في زها او حرية .. وتبقى مخضبة تخضيبة النوار
ونختم كلامي بالصلاة الزكية .. علي شفيعنا يوم صهد النار