شيلن صوت انشيل امعاكن

من طرف اسماعيل ادريس 2011-12-10, 6:10 pm

شيلن صوت انشيل امعاكن ــ حد عزاكن ــ يالنظار عليه ابكاكن

شيلن صوت انشيل إعياطي.. نين إنياطي.. يبقا مقطوع ومتخاطي

لرض إنزلزلها بخباطي .. كي نلقاكن .. منهالات علي مطراكن

شيــــــــــــــــــــــــــــــــــلن صوت

شيلن صوت علي غالينا ..منا فينا .. قرعتنا بين غوالينا

عنكن غاب وغاب علينا ..طال رجاكن ..غالي لا فارق لا جاكن

ناره في المكنون دفينا .. كان احذاكن .. غير بعيد اليوم جفاكن

شيــــــــــــــــــــــــــــــــلن صوت

شيلن صوت علي امعاهم .. نا وإياهم .. ميت ماني حي بلاهم

عنا ياس بعيد زواهم .. من يالاكن .. حايل بين وبين إمناكن

في دار البرزخ واراهم .. غاب دواكن .. تميت إنعاني في داكن

شيــــــــــــــــــــــــــــــــــــــلن صوت

شيلن صوت عليه وشلن .. نين إتملن .. موت اتموتن ياتنعلن

فيه افواهق لو ينحلن .. يامشقاكن .. جاكن يالنظار عماكن

كل إموازيني يختّلن .. في ممشاكن .. وانتن ملتفتات وراكن

شيــــــــــــــــــــــــــــــــلن صوت

صوتك شيلي يارقراقه . يوم افراقه .. طاح البيت وطاح ارواقه

جينا شور الدار زماقه .. كديناكن .. وين برمنا في مرباكن

ماضي من ماضي نقناقه . ما إيخطاكن . بكل نين ايجيب فناكن

شيــــــــــــــــــــــــــــلن صوت

شيلن صوت ابكاء متقاوي ...... غاب اللي ماعد يانسكن

غاب اللي فالجرح ايداوي ....... فازع وان اعلان فلسكن

كان كريم وكان ابجاوي ......... شيلن صوت علي فارسكن

فارس خيل ان نق الداوي ........ ما سو العادي يمسسكن

جضن كان ابكاكن شاوي ........ جضن نين ايريح نفسكن

نوحي ياام غثيث ثناوي ............. نوحن يالنطار ونسكن

غاب وحل وراه فجاوي ......... في داره خالي مجلسكن

عزمي رق وراح شماوي .......... نشلا عالنجع ورايسكن

راني موش عليكن ماوي ........ ما عندي بيش انسايسكن

ــــــ جيش الياس اذرراعي لاوي .. مر اسقاكن .. ضاع بلاش امعاه غلاكن ــــــــ

ـــــــ شيلن صوت انشيل امعاكن .. حد عزاكن .. يالنظار عليه ابكاكن ـــــــــــــــــ

شيلن صوت العقل اولافه .........غابو سمّرني في ليلي

تحجر غايبنا المسافه ............ من مدات وهو واحيلي

باعد ماعد جيت اصدافه ......... بيش علي حاله يحكيلي

صوتك شيلي ياغزرافه .......... كنيبه تشفيه غليلي

عقلي لاحقتا نصيافه ............ صايف من دونك ياجيلي

رحتن ياليام حسافه .......... عمري سابقني يوميلي

عقلي يلغب فيه اريافه ........... والميعاد امعاه إحليلي

سمح الزول وسمح اوصافه .... عدا قبل انسوق رحيلي

ـــــــــــ جر الخاطر في مندافه .. راح افداكن .. يالنظار عزيز ارخاكن ـــــــــــــــــ

ـــــــــــ شيلن صوت انشيل امعاكن .. حد عزاكن .. يالنظار عليه ابكاكن ــــــــــ

شيلن صوت علي غالينا ....... يالنظار علي غايبكن

فارقنا فارق غاشينا ......... فارق دنيتنا سيّبكن

ياليام صغا عانينا ..... ... واجد من هول مصايبكن

غايب سدّاد فجاوينا ........ باتع من بين حبايبكن

يالنظار رحل راعينا ........ سبتن للذيب اينيبكن

ـــــــــــــ ماالدنيا بات امجافينا ــ نازح ماكن ــ عطشانات وبات ضماكن ـــــــــــــــ

ـــــــــــــشيلن صوت انشيل امعاكن . حد عزاكن .. يالنظار عليه ابكاكن ــــــــــ
.......................................................................
واسلمتوووووووووووووووووووووووووووووووووووووا

من طرف نسمة حب 2011-12-11, 8:56 am

شكرا يعطيك الف عافية

من طرف **زهرة اللوتس** 2011-12-11, 5:39 pm

مشكور...صحيت على الكلام الرائع..وسلمتوووووووه..وفقكم الله

من طرف اسماعيل ادريس 2012-01-07, 3:37 am

مشكورات لمروركن الرائع

من طرف **العاشق الصغير** 2012-01-07, 4:04 pm

مشكـــــــــــــــــــــــور وبارك الله فيك

من طرف ارياف 2014-12-20, 7:45 pm

شيــــــــــــــــــــــــــــــــــــــلن صوت

شيلن صوت عليه وشلن .. نين إتملن .. موت اتموتن ياتنعلن

فيه افواهق لو ينحلن .. يامشقاكن .. جاكن يالنظار عماكن

كل إموازيني يختّلن .. في ممشاكن .. وانتن ملتفتات وراكن

شيلن صوت انشيل امعاكن

شيلن صوت انشيل امعاكن

رد: شيلن صوت انشيل امعاكن

رد: شيلن صوت انشيل امعاكن

رد: شيلن صوت انشيل امعاكن

رد: شيلن صوت انشيل امعاكن

رد: شيلن صوت انشيل امعاكن