صبرك عل بلواك راه شجاعه ايقولواولايصبرعليك الغير

من طرف **العاشق الصغير** 2011-12-15, 3:29 pm

صبرك

صبرك

صبرك على بلواك راه شجاع---ايقولوا ولايصبر عليك الغير
وطاعة الله ماخير منها طاعة--الخالق اللى بالخافيات خبير
وعيش كيف ماتلقى بكل قناعة-وعلى مهلك ديمه فى طريقك سير
عزيز نفس لاتبقى من التباعة-ولاتخش فى مسرب ايكون خطير
ورفيقك ان ريته تم مالخداعة-قص رفقته واترك طريقه خير
ان ماهضا تاخذهن جميع اطباعه-واللى دايره كيفه اساع ادير
واسحا مالتهور من اريا الجماعة-يرخوك وين ماتوصل لقاع البير
ولاتخالط العفنين والدشاعة-ارقاق الغرض فيهم اساع اتحير
واحذر وخوذ الحذر مالطماعة-امفيت المصالح مالهم تفكير
ولاتصدق اللى ردّدوا ليشاعة-نقالة كلام ايشهروا تشهير
ولايرهبك سفاح جاب اتباعه-ان تمه إمانك بالعظيم كبير
واللى تفقده تبقى حتمت اضياعه-وتريد عطوته موحال كيف ايسير
وان تمت اميّة جدولة دفاعة-الوادى امحركله اشبوب غزير
وكل يوم تلفى عالبلاد ابضاعة-والشاطر القى لبضاعته تدبير
ويطيع الذكير الصلب للصناعة-واللى هضا بافكاره اشكال ايدير
ومعروف كل حد يشكى بضيم اوجاعه-ويسمر الجرح ان دال بيه سطير
ويقولوا خطاها جيهة الزعزاعة-والطير مايجيبه كان طار صفير
ودارك ان تمت ريحة بوزاعة-واجب عليك اتعول فالتغيير
وحتى النمل يبنى بيت طرح القاعة-تقصير للتعب ياجد احذاه المير
وبيتت ضنا جاره احذاه جواعة-يرضابها امفيت اللى عديم ضمير
وخاصة ان تمن باهيات اوضاعه-ميسور حال متفرش فراش حرير
والمال راه مايشفع نهار شفاعة-ولايحول دونك ساعة التقصير
مهما كان واجد كاثرات اوضاعه-ان خشّه اربا رزق السطير ايطير
وتجرك الدنيا شورها تداعه-وتجى معاك تزهالك تعيش امير
وتخليك سيد كلمتك موطاعه-وتزيد ترفعك يبقى نباك شهير
واللى قبل هايب دعكته وصراعه-ايطيع ويبقى فى ذراك اجير
وبسبلة انك داير خطوط زراعة-اتضيّق بيّاح الله بالتحجير
وتنساه ثوب الفقر بورقاعة-وتنسى جميع الحزن والتقهير
فالخير والنعيم اتغرق للقباعة-ظلام الحياة ايردلك تنوير
وان لطت امعاك اتضيّعك فى ساعة-بالهم والكدا غفلة عليك اتغير
رباية مصايب للشقا وزاعة-تقنيد كسره ما ايلايمه تجبير
وبوعقل مالساهل عليك اقناعه-ولاهو مستحق الشرح لاتفسير
وهالوقت حتى الطفل بو رضاعة-واقض لكل اللى حذاه ايسير
انكان مركبك تمه قديم اشراعه-مانك اللى مجبور عالتبحير
اذكر اللى قبلك حضرت اوداعه-وكيد المعزّى جاى عالتصبير
وراهى الناس بطبعها شناعة-بسرك ايعولولك على تدمير
بين الحبايب للفتن زراعة-خرابة ايزيدوا فى العلل تطوير
مواقف ايمرن فى الحياة ابشاعة-الميت امسجل حى بالتزوير
وحق اليتيم أوكل أبكل جشاعه-وهو مهلكة يفتح ابواب سعير
شافقين تحلف واحيين مجاعة-ايريدوا زها زايل مداه قصير
الناس كى اللى نسيوا قيام الساعة-وناسيين ضيق القبر وتغسوير
يوم فيه تفشل فزعة الفزاعه-باستجواب منكر عالخطا ومكير
وياعون من وفّى العمر بطاعة-يستبشر بخير وهن اعماله خير
ومسك الختام ايكون للسماعة-نصلى عليه رسولنا البشير

صبرك عل بلواك راه شجاعه ايقولواولايصبرعليك الغير 944316