يا بدر.... للشاعر عابد بوخماده

يا بدر ناظرني وناظر ريدي
جديد جيبلي منه وشيل جديدي
***
يا بدر شيل سلامي ..
واحكيله على ظرفي عيون الدامي
وقوله تخمم راقات عزامي ..
ولريد له الجوله غيرماهي فيدي
حتى وين نرسمها ايجن قدامي ..
عدة عوامل بالات وفيدي
المهم لخصله عكاس أيامي ..
وقوله علي معاودين عبيدي
****
يابدر وين تشوفه ..
سلم لي عليه وشوف كيف ظروفه
راهي عليه اكبيدتي ملهوفه ..
ومازال في قربه مثيل وريدي
حتى لو تباعد جميل الطوفه ..
مازال هو همي وبيت قصيدي
****
يا بدر تنظر فيه ..
وعندك اطلاله كل يوم عليه
سلتك برب الكون لا تخفيه ..
حالي عليه بلاه وتمرميدي
ومسامح عزيز انكان مو داريبه ..
ولو طايله منه خبر تنكيدي
وانكان يندري والوضع ما يعنيه ..
يا عزتي بالصادقه وغريدي
****
يا بدر ضيك ضاوي ..
على وعلي خزرة عيون الناوي
ازعمه كيف ما دمعي عليه سقاوي ..
هو زاد يبكيبي وشايل كيدي
وامرايف علي وفي رجا المهاوي ..
والا انسي مدعاي ومواعيدي
واموثق مع غيري عزيز رساوي ..
ونا يا قمر تما اصفار رصيدي
****
يا بدر جيب اخباره ..
وشيله اخباري م الرياف وناره
لها زمان ما جتني عليه ابشاره ..
ولا عد جواب القيت فيه بريدي
ازعمه هالي ناسي غلا بقداره ..
وناسي ايام العز وتمعيدي
والا اسمر كيف جار الجاره ..
بكايا عليه الشين و تودويدي
****
يا بدر شيل وصاتي ..
وقوله دموعي خارمات فتاتي
عليه ونتمنى في جميع اوقاتي ..
ملقاه وايبرد عزيز صهيدي
ما تعلم حتى في نهار امماتي ..
في جيت الغسال في تمديدي
لو بغايتي تحضر نديب خواتي ..
واتطبس علي تقول حيه فقيدي
****
يا بدر راني حاير ..
وفيك العشم منه اتجيب بشاير
مازال هو وجهه هضاك الناير ..
اللي البح فيه وفيك يومت عيدي
والا موايره ماعاد هي المواير ..
ليام بدلن مله وبايد بيدي
ماعاد نقطع للغزال جراير ..
ولا عد اتوقع صيد يا جليدي
****
يا بدر ما توارى ..
علي كل دولة مطلع بالحاره
سلتك ابرب البيت ويش اخباره ..
نظيف العضا مول الغثيث نضيدي
تذرف عليه العين مي صبارة ..
امغير نا اللي حارن على كريدي
لا اقدرت نصله لا انسيت اجراره ..
قليل الهنا سميت روحي بيدي
****
يا بدر نورك هادي ..
وريت في جمالك من جمال مرادي
ما كدرك دمعي اللي بدادي ..
ولا لااشغلك تقديدي ولا توديدي
نين يا قمر ترحم عقاب فوادي ..
واتجيبلي بشاره من منازل ريدي
اللي له سنين امحوسه ميعادي ..
مع الوقت ياساعد على تعديدي
****
يا بدر لو تعلام ..
اريافي على ريمة بلاد الشام
ما انحكرك تبخل ابجيب سلام .. ولا تذّخر حاجه على تسنيدي
فضلة ايام وساقلي الغرام .. لديار قاحزة اولاف موش نديدي
بيش ما عقبلي من رحا ليام .. الياس يطحنه يقضي عليه وميدي
والطيح يا قمر طيحت علم صدام .. اللي نباع من جيشه بسوم زهيدي
ماعد يقولوا بوهنا ومقام ..ولاعاد يلبس من جديد جريدى

....واسلمتوا.....

قصيدة سمحه زين الله يسلمك

مشكور علي القصيده الرائعه
تحياتي

مشكور على هذة المشاركة الجد قيمة وانت دائماً مميز بكل ما تأتى بة من جديد ورائع موفق وفى انتظار القادم منك واكيد القادم اجمل