ألقالي عذر .. صالح بوعياد

ألقالي عذر ليش ايلقطولي واعرفلي ايجيبوا فالقيط امنين
ان كان من حصيد القاطهم يحلفولي وعليهم نا اللي النص اليمين
وان كان الحق ما ايريد يعطوني يخزي الله اوجوه الكاذبين
عازيت فيهم درت كل احلولي اضعف إيمان ايجوا متعذرين
في نطق الحكم نا ماني عجولي امهلب هذي وامهلب هاذين
الا ع الزمط تموا ايغلظولي يا ريتهم غير يقبوا امغربلين
لا ياخوي قوللهم يغربلولي ما يعجنوه انخلاهم بالطحين
لا ياخوي قوللهم ايطيبولي نية حجايجهم وهم نيين
لا ياخوي قوللهم ايبيتولي رايهم بيش نصبحوا بايتين
ما يمسوا بحال وبحال يصبحولي وبيش يصبحولي ماهم ماسين
وانجي من هنا من هك يبلطولي انجي من هك نلقاهم رادين
ان كان فتلت نا هم ينقضولي وان كان نقضت يصبحوا فاتلين
علي احجروا خوفهن من قبولي وايجوني بيش ماهم لاقين
لا والله ما ايريد يلقولي لاوالله عذر الكل سين
إنهم هناك ما يقدروا يهلبولي لو كان انظاف راهم هالبين
انهاهم قبل ما انعري احمولي وانهاهم قبل ما تطرف العين
وانهاهم قبل ما اينوض امهبولي موش كل طيحة اطيحه حمدين
داروني ملول نا ماني ملولي لو كان ملول راني من اسنين
نافض ديا وامهاجر ابطولي الغربة خير من جيرة الباسلين
وأتريد الحق نا يلزم ارحولي وان كان رحلت ما ايردني حنين
انرد الا دين تنقص في بلولي لا والله كشفة لك ايدين

جذاب كإسمك يا مغناطيس قصيدة رائعة وبالتأكيد لها قصة ياريت نعرفوها .

ياام العيون الخضر...يوم القيامه دوريلك عذر الا نا امسامحك


مشكور مغناطيس...بارك الله فيك على القصيده الرائعه

حبة مسك + بوفرقة ... ألف شكر عالمرور وسامحونا في تعبكم . وياحبة مسك نلقانها قصة القصيدة ماني عارفها ولو عرفت توا انقولك . شكراً

مشكور على هذة المشاركة الجد قيمة وانت دائماً مميز بكل ما تأتى بة من جديد ورائع موفق وفى انتظار القادم منك واكيد القادم اجمل

شكراً على مرورك ومتابعتك الدائمة ياستار