حوال حايلة : اجمل قصائد الادب الشعبى الليبي

مهداة لكل من يتذوق الشعر الشعبى الليبي

من هو صاحب القصيدة
صاحب القصيدة هو الشاعر الليبي الكبير محمد بن زيدان ولد عام 1880 م في مدينة ودان وعاش بها ثم هاجر عام 1894 م إلى بلدة توكرة شمال شرق بنغازي ومن بعدها عاد الى مدينة ودان واستقر بها حتى وفاته عام 1955 م، ولدى الشاعر الكثير من الاشعار وروائع شعرية شعبية ومنها
(درت قبال، أحوال حايلة، مابي مرض)

أحوال حايلة
هذه الملحمة غنية عن التعريف وهي احد ملاحم الشعر الشعبي مثال ملحمة النجع وملحمة مازلت نا هو نا ... وأول من بدأ هذه الملحمة هو شاعر ودان الشاعر محمد بن زيدان الودانى ، ثم تناولها مجموعة من الشعراء منهم الفضيل المهشهش وبو رويلة المعداني وعمر بوعوينة وحسين لحلافي والجدير بالذكر ان اجمل واشهر الردود كان رد الشاعر الفضيل المهشهش بقصيدة جميلة مطلعها :
احوال يبكن .. احوال ع اليمين وع اليسار يتَكَّن ..

القصيدة الاصلية
(محمد زيدان )
احوال حايله بين المنام وطيبه .. احوال جبدهن للناس فيه الغيبــــه
احــــوال عجايــــب .. منهن سقيم العقل فكره غايـــــب
ومنهن رضيع الثدي راسه شايب .. احوال حالهن ما قدرتشى نشكي بيه
ان شاكيت ما تلقى حذاك حبايـب .. مفيت الشوامت بالخلاف تجيبـــه
احوال هــــــــوايــل .. احوال حايله بين القدم والجَّايــــل
احوال سرزهن تحت الشريحه مايل .. احوال بدهن ما عاد فيه نشيبـــه
طاحن رواويق اللجام دقايـــل .. اندق بالحلق عدي بعيد الصيبــــه
وطاح الكتاب بدين عصيه نصايـل .. وتفرتك كباس الجلد والتعصيـــه
احوال خلفن للعاقلين علايـــل .. مرض في الجواجي كادهم تطبيبــه
مفيت ما الله بيده يدير دلايــــل .. واللى عند ربي فرض ميش صعيبه

رد الشاعر حسين لحلافي

احــــوال يكـَـــــدَّن .. احوال بالغَرايب كل يوم يجدَّن
احوال كل باب وكل فَجْوة سَدَّن .. مفيت ما يحنَّ الله عالم غَيْبة
لَرَانب يدَيْهن للجَّوارح مَــــــدَّن .. وجا السَّبع للقَطًّوس يسْتذْرِي بَه
عَلَيْه الثعالـــــب صايْلات تعَدَّن .. بْقِي بينهن مَذْلول ماله هَيْبه
وكـــانَنْ ان تَاوَق من بعيد يردَّن .. مغير زَوْمْتَه ترْبِي عليه الرِّبيه
احـــوال يعلَّــــــن .. احوال واحْلات ، احوال ما ينْحَلَّن
اللي يقول فاتَنِّي عليه يــــوَلَّن .. يجدَّن عليه بْشَيّْ مو داري بَه
يجدن عليه بشي مــــو في باله .. ولا كان في ظنَّه انَّه يَلْفَي له
لَيَّام ع الْبْنادم يْبرمَنْ بالدَّاله .. ما هْناك يوم ولا وراه طلِيبه
ما هناك يوم ولا وراه طرِيده .. تْجِيبه بالشّقا ليله هْموم نكيده
وتجيه بالهَنا ليله افراح سعيده .. الليل والنهار يجَنْ بكل عَجيبه
الليل والنهار يجَنْ بكل أَوامــر .. يخلَّن اللي مرتاح ديما سامر
وكم هدّمَن من بيت باهي عامر .. مْبات الجّْلاوي كي الليل يجيبه
مبات الجلاوي وين عاز مْباته .. وضاقن عْيونه والطريق رماته
يلاقُّوه يجَّارَوا الكل وَشْناتـــه .. مْلاقاةْ صاحب جا بعَدْ تغْييبه
اجواد كيف مَولي البيت كي مولاته .. كيف الضّنا في الجُّود كي العَزِيبه
يبقوا كلهم حضّار في نَدْهاته .. وهو تْقول منهم ما تْطقَّه غِيبه
راحوا ، وراح البيت وفْراشاته .. وراحوا فراسِينه ، وراح سبيبه
ما يلتقن تَوّا الا ناياتــــــه .. وجرّةَ نضادِيَّه ، ومَبْروك نِيبه
احــــوال اشْقَنّـــــا .. بْلِيقه جدِيده كل يوم يجَنَّا
احوال حوّلَنْ لَسْلام نَيْن غَبَنَّه .. بعَد صوْلته ماعَدْ عَدُو يدْوِي به
اللي كان فيما فات واخذ طَنَّه .. حَكَم لنْدلس واوطان مِيشْ قريبه
في قرْطبه واشْبيليا طاعَنَّه .. وياما رفَعْ فيهن الصّوت خطيبه
وياما حكَمْ فيهن بْنَصّْ السّنه .. وكل من يخالفها السيف نصيبه
وياما ماكاتِيب الخَليفه جنَّه .. وياما قرَوْهن يرجْفُوا م الهَيْبه
وياما كسَرْ من جيش كان مْعَنَّى .. وسَيَّب بْـــلاداته جـلا بالخَيْبه
ما هْناك شِى مطرح ولاخشَّنَّه .. جْيوشه اللي كانَنْ شْوَيْ في طَيْبه
نين الحَكايم كلهن هابَنّه .. فْرانسا ودولة طاليا الغَضِيبه
في وطنهن تمَّن كرايس منَّه .. محــــا دِينْهن واطَي مقام صلِيبه
يشِيلن عَقَاب الليل ما يَرْجَنَّه .. كيف يَعْلمَنْ جَيْشه نزَلْ في الصِيبه
واللي يريدْها حالاً بْها ياتَنّه .. كيف تصـْــــلْهن منَّه مغير كتِيبه
خَطَّرها احوال الوقت كيف فْطنَّا .. لْقِينا لْهن بَرْمات وتْشقّلِيبه
اوقات يبْرمَن لَحوال ويوَاَلنَّا .. واوقات للبْنادم عندهن تغْضيبه
واوقات يعْكسَن واوقات يَبْقن لنَّا .. وديما لهن ضحْكَه بعَدْ تكْلِيبه
كَنَيِّب يَبْرَمَنْ ليام ويواتَنَّا .. نمْشُوا لوطنْنا رحمةْ الله قريبه
بْجَيش ينْطرح سوْقات فوق حْصنّه .. لا يزيدْ لا ينْقصْ الفَيْن كتِيبه
اللى هذا شوق الحَرْب لهْ يدّنَّي .. حْلاَطه جديد ودْقرْتَه امّ حْرَيْبه
جميع الذّخايركل وَانْ يجَبنَّه .. ما يعُوزحتي سلك من تُوظِيبه
نْعَدّوا مْعاهم ما نفَر يسْتَنَّي .. معاجيل سدَّيْنا من التغريبه
اللي يموت ماو نادم يجي للجَّنه .. الموت سَهْم طايش كل حىّ يصيبه
واللى يعيش في وطْنَه هَذَاك تهَنَّي .. يعيش حرّ ويحّيدْ دارهْ قلَيْبَه
وآخر كلامي هذا ما نْتمَنَّي .. وربي كريم ما عَليه صعِيبه

رد الشاعر بو رويلة المعداني

احوال حايله دون المنام وراحه .. احوال جبْدها للرِّيق فيه كلاحــــه
كيف منو وارد بِيرْ تاوْ نزاحــه .. وكيف منو واحِي في التّْراب طليبه
كيف من اصَّدَّر قو خابْ سْلاحه .. تاو النّدَرْ بتْصير له تكذيبـــــه
***
احوال حايله دون المنام ونومه .. احوال جبدها للناس فيه حرومـــه
كم خصّْ خالى كان علَّوا كومـه .. وكم قصر خلَّاه الزمان زريبــه
وكم عبد نازل في منازل غُومه .. وكم بَىّْ في حالةْ صغا وهَزيبــــــه

رد الشاعر الفضيل المهشهش

احوال يبكن .. احوال ع اليمين وع اليسار يتَكَّن
احوال خلّفن عقْدات ما ينفكن .. باب النجا منهن الله يجيبه
احوال على المصالح بالفساد تفكَّن .. تفْكاي الطّليب منين دال طليبه
***
احوال تشيب .. احوال حايله دون المنام الطيب
احوال جبدهن للناس فيه تريب .. احوال ما اتفرزهن منين صيبه
ان كان هو جفاك اللي حذالك قريب .. وهو حبيب يا صاحب لمن تشكي به
***
احوال حَسوفه .. ما ينتسن لا عند قطْر الصّوفه
من خاشْ خوك يبقى لك حسودي نوفه .. حلال الجّلا منَّه بعيد تْسيبه
لا الوذْن تسمع لا العين تشوفه .. خير من مْقاقاتك وجبد سريبه
***
احوال تفارج .. احوال عفْنْهن ع الزَّيْن توا دراج
احوال خلّفن حتى الحمار يهارج .. في هَيْلعا من خاف من تنييبه
***
ما خاف من تهْريمه .. ولا خاف م الهيْلع يقلّ القيمه
لا سْبدّْ م الدنيا لها تبْريمه .. ينزل اللى راقي بغير دريبه
**
احوال وحالي .. احوال كيدهن ع اللى مقامه عالي
الجّارح اللي فيه السّْيور مدالي .. لا يقرب الحوزه ولاتمشي به
***
احوال جن في ساعه .. احوال يقلبن كي قلْبْه الزَّعْزاعة
احوال ركّبن في وطنْنا بوزاعه .. احوال ودّرنّا كل حد في صيبه
** *
احوال مشومه .. احوال ما معاهنشي هني في نومه
احوال حاطات الصقر تحت البومه .. حتى ان فك منها تلحقه وتْجيبه
***
تلحقه وتطقَّه .. عليه طايبه ترميه وين تحقَّه
ان كان راجعت عطبك عليها نقَّة .. الصقر بوجرس يقدع علي تنسيبه
***
احوال يجدن .. احوال كيف عقدات الجّراد يمدَّن
احوال يخطرن باشغال ما ينعدن .. حايْزات من دون الحبيب حبيبه
احوال خمّمن جابن بعيد وردَّن .. على وطن يا ناري اليوم ذهيبه
حايز بلاداته عدو انسدن .. وكم نفس شرقانه معاه تعيبه
خلى دموعها فوق الخدود يهدن .. وكل وقت عاطيها ستاك هزيبه