هن وأوهام ديار أولافي ....للشاعر : احمد ارميلة

هن وأوهام ديار أولافي= قور مكافي .. بانن بيش يزيد اريافي
هن و أوهام ديار الغرَّه=عين الحرّه .. بانن قور وطوق اديرّه
فيهن ما عاد لهم جرَّه=غمَّ السافي .. من كانوا ملفى لولافي
وين الغيث احلوقه جرّه=بمّ شعافي.. نزَّالين البرّ العافي
قال اقدام امدسّنه فرّه= فيه فيافي .. شاعر ناس اقدم قذافي
قانوا ما من حمل امعرّه=كيله وافي .. من فزَّان علي زعنافي
هن وأوهام ديار اريادي =قور مقادي .. بانن بيش يزيد نكادي
واخرى نا من دون امدادي=رابي كافي .. فرقه بونيبان ارهافي
هاللّي في قربه من غادي=حظِّي جافي ..عمره ما جا يوم اصدافي
لكن تابع قول الهادي=قلبي صافي .. ماني علِّي فات مكافي
هن وأوهام ديار الغالي=قور عوالي .. بانن جو غيَّاب اقبالي
ما كاينهم داسوا خالي=واعر حافي .. قزّ أعلاه تقول مشافي
هل من كان امذيبل حالي=دنوي نافي.. مابا ياطى في مندافي
ما قدّم قبل ولا تالي =لاستعطافي .. باب وفاء بيِّن لا خافي
هن وأوهام جميل التوقه=حاين شوقه .. قور وجوف يدير حلوقه
بوجرعود جدايل فوقه=سالف سافي .. من سِبَّاه أسباب صيافي
قسمي من مقطوع الذوقه=ياس إضافي .. شين يطيِّر نوم الغافي
هن وأوهام وسيع ارغابه=بانن هابا .. قور وخالي دار ضبابه
فوق الدير البيض ارقابه=جا مشرافي .. خطّر بوذرعان انظافي
لطَّ اقسام اللِّي نشقى به=من صنَّافي ..لاقي في كفّي عرَّافي
هن وأوهام ديار منانا =يا قرنانه .. بانن بيه مواير يانا
لوكان يولّي لمكانه = داي يشافي.. نجع اللِّي مكنوني رافي
طير غلا مجلي نيبانه=فوق اكتافي .. نازل بسم الله العافي
صايف من قبل يجي وانه= لبّ غلافي .. لبّ أوراق سنين عجافي
هن وأوهام ديار امعدّي= داير سدّي.. كان شهير نبا يا ودّي
ياوي ويعشّي ويغدّي =ما من هافي .. ربَّاه و هو كان ارفافي
لكن هم وين ونا يدّي = دون أهدافي .. قاصر فرقة حال احدافي
خلاني ديما متكدّي=ضيِّي طافي.. بعد اللِّي لاماهم دافي
هن وأوهام سماح الطاري =قور مقادي دارن زومه
بانن بيش يحوس مداري =نندب ناخذ ليل ويومه
عَ اللّي غابوا هم وأفكاري=غاشي عدَّادين اللومه
جيت ألقيت جباهم ضاري= فيه امقيم امقيطن بومه
هم وين ونا طال جضاري =كل أسبوع يزيد هجومه
دايج بوجمَّه حفاري =داره والجرَّة مردومه
هاللّي دوم تقول اصداري=ضيّ يديه مع بوثومه
تحلف بارق سيله جاري=بان ينابي طاب نسومه
في رقراق يدير صحاري=ذابن لاقدَّام خشومه
عنوي ع اللّي عزمي شاري=له ميجال ومو في الحومه
حايل ياس مناي قراري=بين اصبيّ العين ونومه
لكن في ديوان القاري=هاللّي مقبولات ختومه
دار الدنيا قال الباري=بين هناء وبكاء مقسومه
عنها سال قديم سهاري= مندرسات أوراق رسومه
عدّن يا عقلي وانظاري=ريدي لابس عالي سومه
مات وما غسّل يا ناري= فارس طرقي عامد قومه
فوق خماس امبكّر ساري=غافل ما عنده معلومه
من زندات وهو مو داري=راحن كوم رماد هدومه
طاح تقول عقاب وزاري= بين صفافي .. خرّب جال نجوع ضفافي
ع اللّي ما عاد لهم ذاري =جن ذرَّافي .. لنظار ونا زاد اقطافي
جار عليّ خطوره زاري =تحت الضافي .. جرعود مع عقد ارعافي

مشكور وبارك الله فيك استاذنا ابن الباديه

رائعة تسلم اخى ابن الباديه