ايّام الرخا رطبين ..

لبعج بو عدوان الفاخري
ايّام الرخا رطبين ..


نوضة اطراف الوطن شتت شمالنا
ماحال دائم ، كل حال يزول
صبرنا لضيم الدهر، والدهر دالنا
ولا خير في اللي يرتمي مديول
عطا بالقفا الزمان بهدل بحالنا
منا خذا لنصاف عرض وطول
صغير صيردو مقسوم يحكم ريالنا
بين الدول مجنوح مو مقبول
لا ينشكى منا ، ولا ينشكى لنا
شايب مقمبر في عزا ميكول
الناس يحسبونا هبل كاثر هبالنا
لو كان ننغروا فينا شوي عقول
احنا هم اللي ع الحمار نلحقوا في غزالنا
وجيت جايبه عندي شهود عدول
ف ايام الرخا رطبين تفرط بهالنا
حليبنا يشتول نعطفوا ع الغول
وان كان صار شيل وحط مالك ومالنا
نتعبوك لا تاخذ خبر منقول
اللي عند روحه سبع حربه هو دلالنا
نخلوه يغرد شبهة الباقول
احنا كي نحوسوا نين نسفوا اسدالنا
كبير العرب يبقى جحيش بغول
ما من اللي قبلك شكى من قتالنا
بطل وقال من دق الرمام الحول
خذوا سيور من كبده عصارى رجالنا
وهو جاي يدّلّل بها الدحول
نجامة الحديد تغلب في فنجالنا
لو سطّراته خمسطاشر حول
ولا عن ديار الطرف يقدع مالنا
ولا م النذير نخطّروا الرحول