حال ليبيا اليوم من زاوية اخرى

قصيدة للشاعر عبد الحميد باطاو يَستقبِلُ بها حفيده الجديد ويُخبِرُهُ فيها عن أحوال اليوم

عيط وصرّخ ياحفيدى زيـن.. على جـيـّـتك فى ها الزمـان الشّـين
صــرّخ وزيد أعياط .. على جـيـّتـك في وقـت كله أشـياط
صال فيه الخلباط والجلباط .. وراكـب الموجـه وصاحب الوجهين
وفرهد قليل الأصل عاش وزاط .. وضـاق حال اللى عـنده ضمير ودين
ناس فيـه ماتمشـى الّا بمشلاط .. وفيـه ناس من ذلّ العـصى خايفين
وفيه كل واحد داس تحت البـاط .. مع المنـهـره الساطور والسـّكين
لاعاد محبه لا وفا لا أرباط .. لا عاد رفق لا خوت متـفقين
ولاعاد من يفزع إن صارأعياط .. ولا من إيوازى بين مـتعاركين
ولاعـاد للشـكوه أهناك أنياط .. ولا من أيرد أحـقوق مظلومين
دنيا أن كان تسهى وما تحتاط .. أتضيع تنتهى فيها برمشة عين
جــدّك جرى نين قطـّع السّبّاط .. ووقـف بعـد جرّب الناس أسنين

صرخ وقطـّع ثوبك .. وزيد في البـكا نـوّح على مكتـوبك
على جـيـتك في وقت فيه يادوبك .. أتحـصّل نـفس في زحمـة الحيّين
حتى لونزحـت أدموع مايـشقوبك .. ولا مـن أيقول ياأنويرتى مسكين
يابل أتريد تختار بـين أدروبك .. وتنشـد بعد توحل اللى فاهمين
ربك أمقدرلك خطـاك وصوبك .. من أيام وانت في وسط الظلام جنين
إن صارلك صفا يجفاك الّى محبوبك .. وان جاك خـير تلقى أحذاك لقاقين
وتغلط وماتقـدر أتوارى أعيوبك .. وزيادة الخطـا أتفــرّح اللى شامتين
جـدّك أيام وهـو أصـغيّردوبــك .. يحـساب العرب هم كلهم زينين
قيس قـبل ماتشـرى وجـرّب ثوبك .. ومـا يخدعك تبكيش بياعين