الطفل الليبي فى السوبر ماركت

الطفل الليبي في السوبر ماركت


عملية انزال الطفل الليبي الى السوبر ماركت ولا اي محل تاني ..يسبقها في الغالب موشح طويل عريض ونصائح وتحذيرات للطفل :

( رد بالك تلمس حاجة ) ( مش اتدير العار وتقعد تلم في الحاجات راهو مامعياش فلوس)
... ( تعرف تقول نبي هذي ونبي هذكاهي توا إنورريك)( تعرف كان تطلقني وتجري واتدير الهبال الا ماتاكل طريحة قدام الناس ومعاد تحلم تنزل لدكان)

ورغم موافقة الطفل على كل ماسبق وافتعاله للهدوء والقناعة ..الا انه اول ماينزل يصيرله الهبال..و يا اما يقعد يجري في المحل..والا يبدا ينق..

(نبي هذي..اشريلي هذي..خاطري فيها .نبي بطاطا..والنبي اخر مرة نبي حلوة وحدة بس..انتم وعدتوني يومها)

واحيانا يمد حاجة وهما على الكاصة بيخلصو..ويبدوا يتخضروا ويصفروا كانها غالية وماعندهمش فلوس وهو يعيط وينق لين يطلعوه بالسيف ملحوقا بهبدة من بوه اوقرصة من امه..ويبقى الطفل الليبي ثابتا على طباعه ومسكر راسه مهما وعد بالعكس.