زول جميل /للرويعي الفاخري

زول جميل يانا اليوم هاوي** قاسي كنت خلاني ضعيف
شوف الريم خزرات النداوي**من للعين من غيره وليف
ضاوي الوجه لوراه ضاوي**كيف الشمس في المزن الخفيف
دوره ماح في طوبه سماوي**كي الجريد في النو العصيف
فوق النحر سلسلته اتهاوي**كاشف فوق مرمارة رصيف
ريق لذ من شرب القهاوي**ريحة رق من نسمة الريف
يسحر في بسماح الحكاوي** وبترديع الاسلوب اللطيف
انطاقش فيه في اركان الخفاوي**اطقاش الريم للعشب الرهيف
ناره في تطلق في شظاوي**تشكع نين في عين الكفيف
شوقه ري عرق القلب راوي**هيل وكيل مو نطق ورشيف
نقرا فيه في لحن الغناوي**ونكتب فيه عاللوح النظيف
فارح بيه طاير بيه اهواوي**فرحة وطن برجاع الخريف
اللي لرياح واشموس الضحاوي** يصلن فيه لاهفاته لهيف
لا فرقان فيه ولا حذاوي**خالي خلو مقطوع الخليف
ياخد الليل فوق روس العلاوي**ذيبه شين عواي ونحيف
حن الله داواه المداوي**وجاه اللطف من عند اللطيف
بغيت ارجاع موعاطي جهاوي**ايدخن بات لبروقه خطيف
انفلتن فيه عازقات العذاوي**زغراتات في النو الكثيف
نشابات في عوص الحناوي**قلاعات للدرع الكنيف
طواحات تفلة على الكداوي**بين حيوط وتراب ولفيف
هضا شيء من جد اوحكاوي**مبداء سرد مو كله طريف
عندي عقل يلوي فيه لاوي**حزنه دوم للطربه رديف
فواهق غر من كل الجلاوي**اتغشم كل عراف وظريف
يطير نوم حلوات الغفاوي**بكا بغداد والقدس الشريف
تحشد مال ورجال وتقاوي**اقران الشرع والدين الحنيف
واحن غير تطبيل وادواوي**وعرض اجيوش وخداع ولصيف
كيف الراي معندي فتاوي**وكيف اندير منعلام كيف
روحي روح نكارة شهاوي**وراسي راس ميقعد بكيف
عقلي عقل يرقالهن سماوي**قسو الحرب والشوق العفيف
لاني كيف لقاقت اللهاوي**مظلل تحت من مزنة الصيف
لا نعتز بسماح الكساوي**وعلو الجاه ومعيشة الهيف
ما من ملك خير منه رعاوي**وما من حر خير منه وصيف
غير الحظ وين ايكون شاوي**ايكبل يد الانسان الحصيف
لا له قنو ضمار الصهاوي**ولا له مال للزين وظيف
ايبدل فيه خيبات السعاوي**طراد المجد بطراد الرغيف
يلاوي بين القيود المطاوي**قبل الي مرباعه يصيف
عليه يشوخ كم قالت ارباوي**دابه نح واتكبر وزيف
في سباه يرضا بالدناوي**جمع المال وجه مو كسيف
كي بندير نقاحت الجاوي**هلي دوم طايب عالرجيف
كيفه قال كلني عالشهاوي**ايروعك يوم تلقاني حليف
وهو بطلات في داه العزاوي**لو مرباع لا يبقى امصيف
مع العدوان ابجود ايجاوي**وعالصحيب جبار وعسيف
نخاف علي تستاسع فجاوي**لساني مر وخطابي عنيف
يبقى خير تقصير الخطاوي**امفيت الصبر ما حاجه انظيف
لغير الله ما عندي شكاوي**ولغير الله منبي نصيف

مشكور خالد

مشكور على الطرح الجيد اخى العزيز..بارك الله فيك

شكراً لك على هذا الاطراء الاكثر من رائع