مش قتلي نبيك؟

مش قتلي نبيك؟
ومش قلت من كاس الغلاء نرويـك
مش قتلي ما غيـرك ولا خاطيـك يبقى شواطئ مركبـي ومرسـاي؟
مش قتلي بريـن أجوحي بيـك أنـت طبيبـي وبلسـمـي ودواي ؟
ومش قتلي تحت الجنـاح طاويـك فالعين مرقدك والهدب قلت أغطاي؟
ومش قتلي طاسـة غـلاء نسقيـك ونرويك ود من صافي بحور غلاي ؟
ومـش قتلي ديمـا رجايـا فيـك أنـت هنـاي وفرحتـي وزهـاي ؟
ومش قتلي في خاطـري نطريـك روحك وطيفك دوم خيـال حـذاي ؟
ومش قتلي نصنـع سنـاء لياليـك وأنهدهدك فـي ساعـة التغفـاي ؟
ومش قتلي نمسح أدمـوع ماقيـك وانفرحـك وان الافـراح أمعـاي ؟

ثاريتنـي واهـم بعد بإيـديـك منـك شربـت أمـرار مكّـن داي
الخاطر كسرته في خفـاء نبكيـك وريدي قطعته منه غزيـرة أدمـاي
غير ليـش بايعنـي ونـا شاريـك ياحلم عمـري ياأحـدود أمنـاي ؟