ياعليك دلالة قدام العرب مقعمزين اقبالة وين الحشم ياناس

ياعليك دلالة......قدام العرب مقعمزين اقبالة.....وين الحشم ياناس

وين الحشم والغيرة....وين الانسان اللي معاه ضميره....اللي قبل كانو من معادن خيرة.....اليوم عدو للخطا بعجالة

كان الولد ماتفوت عليه بصيرة.....صقر حر ماينزلش للبطالة

وكانت البنت الطيبة الاميرة......صاعب عليها تشوف يوم رزالة

كانو اربايت شرف ناس شهيرة.....حكيمين ديمة فرايهم عقالة

اسياد الطبايع والنفوس كبيرة......شديدين في الكلمة عرب فعالة

تبدل الوقت وصارله تكديرة......وبانن عيوب الناس جن اقبالة

وخربن عقول اللي سماح السيرة......واصبح دليل العيب فيه سهالة

الحشمة تغطي من عيوب كتيرة.......تعفف النفس اللي تبي الفسالة

وانا قعدت نموج عندي حيرة........في شي ريتا موش قولت قاله

ني شفت بنت فعمر موش صغيرة......ايديها فيد اللي ارخاص امتاله

ويحكو فحكاوي صوب بتشهيرة........والناس كلا فجنبهم جواله

قدام خلق الله بتجهيرة......لاهو قريبلها ولا تدماله

ولاهو زوجها ونقول فيها خيرة......تقوا العشق وضهروه اهباله

وانا ارتعشت وصارلي تكشيرة.......والحر مايرضا يدير ندالة

سماحت الصوب تكون ليه خبيره......وتبعد علي الشمات والقواله

وتعيش قصت عشق موش قصيرة......وتاخد وتعطي في الكلام جماله

وبلفعل نار الشوق راي كبيره......لاكن تطفيها عيون غزالة

هلي هدبها سمح في تفسيره........بنظرة خفيفة للعلل قتالة

وانا كلامي نجيب فيه انديره......ونقصد قضايا مجتمع واهواله

ونختم كلامي بعد راي وشيرة......وصلو ع النبي صاحب الرسالة

ياعليك دلالة......قدام العرب مقعمزين اقبالة.....وين الحشم ياناس

م ن ق و ل