سبحانه اللي هنتك وهوّنتيني..

سبحانه اللي هنتك وهوّنتيني... ونسيتك بعد ولعات ونسيتيني هنتي

هانك... تركتي ترك عقلي نسيه زمانك

غاليتي غليك العقل علّى شانك... رفعتي رفعتك فوق حاجب عيني
برمتي عليا ليش بعد احسانك... خطا قبل مانعرف وعلمتيني
مازال فيدي ماسكه عنوانك... اللي فيه واعدتي وماجيتيني
من يومها عندي نقص ميزانك... الله يسامحك فيما مضى خليني
سبحانه اللي هنتك وهوّنتيني... ونسيتك بعد ولعات ونسيتيني

بلي جابت... برمتي برمنا والعقيدة غابت

نفسي عليا لا تلومي عابت... برد الخطا وأصل الخطا خاطيني
عندي عليك شهود حقي ثابت... عهود بينا مايوم وفيتيني
وان كانك نكرتي والعدالة صابت... نجيبلك امضى يدك رهن في ديني
سبحانه اللي هنتك وهوّنتيني... ونسيتك بعد ولعات ونسيتيني

نسيت زمانك... وقلبي مليته صبر درت مكانك

واجد تبعتك غرني شيطانك... طرق قبل مانعرف لهن جبتيني
سيات درتي غالبات احسانك... بشي بخس للي يكرهوا بعتيني
ليش تخدعيني ياقليل امانك... عطيتي اسراري للعدو خنتيني
ردي عليا، بيني برهانك... كأني نقصت معاك طول سنيني
لكن بعد ريت الجفا عنوانك... الجافي عليه النفس ماترميني
شاعف وشعفني كلام لسانك... تايب بعد حبك حلفت يميني
لا نريد غيرك لا نريد مكانك... فضاء خير قلبي ارتاح لا تشقيني
جميع ماطرالي من تعب في شانك... حتى في منام الليل ماتهنيني
وجربت والتجريب من نقصانك... الياس شارته فوقك قبالة عيني
راضي بما قدر علي رحمانك... نحنن حنين الواردة خليني
نسكت انكان فكرت وقت احسانك... ونثور مالسيات بعد اتجيني
زايد وناقص ماثبت ميزانك... تخبل عليا الغزل لا تلوميني
الله يسامحك توا بنترك شانك... اللي بينا حزت، نواطي عيني
سبحانه اللي هنتك وهوّنتيني... ونسيتك بعد ولعات ونسيتيني

نسيت غلاها... ونسيت كل ما صاير زمان معاها

علي وين ماتخطر نعد خطاها... دوا هناك ماكيفه لها ينسيني
نا فكرتي تعبّر على معناها... اللي جرّبت في الماضيات سنيني
اللي كنت مانصبر نهار بلاها... وهي زاد ما تصبر ان غبت تجيني
بعد برّمن لنيا وصار خطاها... ماعاد نرضيها ولا ترضيني
سبحانه اللي هنتك وهوّنتيني... ونسيتك بعد ولعات ونسيتيني

تسلم اخى عبدالحفيظ