الجزء الثالث من ملحمه (ما زلت نا هو نا)

من طرف **dude333** 2016-07-11, 7:59 am

الجزء الثالث من ملحمه (ما زلت نا هو نا)

من القصيده رقم 13 الى القصيده رقم 16

(ما زلت نا هو نا) عبد السلام بوجلاوي **القصيدة الثالثه عشر

الشاعر عبد السلام بوجلاوي

-----------

مازلت مسّع رقت ** ولسّع انسيت من فارقت
تقول ما اوصل منهم الا هالوقت ** خبار ياسهم دوبه عليّ لفا
وما من افراق نهاره ذقت ** لها امعاي ما زالن ابواقي دا
مكتوب في جبيني من نهار اخلقت ** بنار الغلا نسمر ولا مه لا
وما زلت نا هو نا

........................

مازلت للزينين ** نشارف ونا شارف علي الخمسين
ومازلت لا توا نموج حزين ** اطربي شال في جرة امناي جلا
مازلت ما نقبل إللي هالحين ** من جهة امعزى في عزيز عزا
انظاري تقول مفارقات جنين ** مجهول المصير انحاز بين اعدا
و لا بن ايهوننه بطول اسنين ** غلا اشرب عليه زمانا وكلا
وما زلت نا هو نا

........................

مازال عقلي خضر ** ايام لحصاد نريد نبذر بذر
علامات كبري ما عليهن عذر ** . امراض مالهن عند الطبيب دوا
والياس مانع الغيه وفارض حظر ** على من لصيف الشيب فيه بدا
خطيه كبيرة ملفته للنظر ** ان كان دارها منا اينال جزا
والناس عندهم لازم يموت الجذر ** ان صاف الورق ماله يجوز بقا
شين الملابس في نظرهم قذر ** حتى لو ابقي طاهر نظيف عضا
وما زلت نا هو نا

........................

مازلت كي ما كنت ** ان صاوبت صوب امصاوبتني صنت
ولا من امنّي حياتي خنت ** مبداي صدق قول وفي لوعود اوفا
وكنت اللي نجرح اليوم اطعنت ** بلا اجراح طاعني سليم مشا
الحاصل على جنس الصبايا هنت ** ما عد انذيبل غاليه بغلا
ولا ان بنت تفرح غير بنتي بنت ** تقول لمها يا أمي الغايب جا
ولا لي عليهن لوم شبت وشنت ** وفي هالمجال الكبر راه اخيا
حتى ان قلت مازلت له مالنت ** حقيقة وياجب لعتراف ابها
الصوب سريبه ع اليسار ركنت ** بنيت فيه كم عللي وبتت خلا
ومازلت صامد كيف ما قلت انت ** وفيهم انراجي كان فاد رجا
وما زلت نا هو نا

........................

مازال في دوامه ** مدورد عليه جذار عقلي ضاما
يمشي مع ايهن عدو دروب امامه ** يخاير وحاير ما قرار خذا
ايخاف اللصيف يغر به يتعامى ** عليه عالضما لوّلي يزيد ضما
اختامه اوقات يصلح غلطته بندامه ** بلا مشربه خلف السراب جرا
ويطالب نهار ليل باستسلامه ** الياس قاله سلم وهو مابا
حتى والسلام اوقات فيه سلامه ** وناظر لغيري ما جرا وطرا
رفضت الخضوع وسلطته واحكامه ** وله ما ركعت ولا طلبت جدا
نعيش صقر يوم ولا اسنين حمامه ** ولا لي على عير الكريم اعبا
وما زلت نا هو نا

........................

مازلت في تياري ** انواري نويت وما قدرت انواري
اصروع الجواد اطلقت في مشواري ** وين م الجضر والغيض بي مشا
ومن قبل ناصب ع الغوالي طاري ** بكيت ما قضيت الياسهم ببكا
اللي افرقهم شوش جهاز افكاري ** ما قبل حوته من جديد صفا
وتمن ايشوشن للجميل انظاري ** كيف ما يريدن في زمان مضى
ولكن الشي اللي عليهن طاري ** لا عذر فيه ولا عليه اغطا
زرابهن مرض من حكم ياس اقراري ** اسماه كبر سن بواجدين زرا
وجدت الصوب ما ولول بحكمه ساري ** معمول بيه الوصوب القديم لغا
عقبت وغلبني ما اقدرت انجاري ** الجيل الجديد اللي عليه نشا
لا اقدرت نوقف عند شوكة جاري ** نعاكس صبايا عامدات عزا
ولا طال يالا مدرسة انتظاري ** لفرعة بنات مسرحات غدا
جميع ف كتاب خليل ماني قاري ** فنا مع الشباب اللي خلاص فنا
انظاري عوضهن في الطرب عالباري ** له مابقي مما عطا وخذا
ولكن ابها بكل هوايد ضاري ** يهفن ان جاهن العزيز نبا
يروقن اشجارهن واشجاري ** عروقهن يطولن في عقاب ثرا
وما زلت نا هو نا

........................

كانن ايام الماضي ** يجن في المنبي والجميل غراضي
ان كان قلبه م الغوالي فاضي ** يلبي ندا قلبي ان ذاع ندا
وامعاه ان لفظت انكون عند القاضي ** ما يصير من شوري امعاه خطا
وديمه عميل الغيرنا متغاضي ** في ىخر المطاف ايهد ما ابتنا
ونصبح سوا راضي اوماني راضي ** نصيبي حسايف م الغلا وشقا
الحاصل عليا تقول حاكم قاضي ** ابياس ما يطالقني مدى الحيا
كمّين جاينه جتني العقل تشاطى ** حتى وهي قويه راضيات ابها
وما زلت نا هو نا

........................

مازلت ماني ناسي ** سريب الغلا اللي ثقب حماسي
ريح من غلاه توزّ في مقباسي ** ما همدت واخمدت نين هفا
امعاه قبل من لاماه نحتم ياسي ** ما انسيتهن عايش ايام زها
اوين ما صدر حكم لفراق القاسي ** اللي اضحكتها ردت علي ابكا
وما زلت نا هو نا

........................

مازلت في موّالي ** حتى ونا كبير وبزوجتي وعيالي
وكبرن وتمن من بنات اجيالي ** عجايز ونا راسي الشيب كسا
ولا عد بصوب خليل يزهى بالي ** ربابيط والا معنوه واغنا
وحتى ان قلت نترك هالصوب البالي ** فايحات ما نعرف اندير اجوا
واللي ما عليه انغلا عيب انغالي ** حتى لو اطري لمرضي فيه دوا
سقايهن ان ماتم السواقي مالي ** ويهاوي ولا قط للضوّال عصا
يصابن بعيد وهن اعطاش اجمالي ** اثقال ما يداعيهن زقيق ارشا
نين م العطش يفنن خلا في الخالي ** ولا م السما ينل شراب سما
وما زلت نا هو نا

......................

مازال ماسك داره .. الخاطر مع اللي يعرفو مقداره
لجواد بينهم بالكبر زاد كباره .. كبير عندهم ولهم عليه عنا
وحتى لو شكرهم ماي عليه معاره .. للناس لملاح الشكر رد اكفا
ولا من شكر واحد يجير اشكاره .. الزين من امعاي ايزين قال اجحا
ولا من قرض ينساق في تياره .. لا ذم واحد لا مدح بإيحا
ومزال يبسط في العرب باشعاره .. كان البحر عنده اصفي وهدا
وان هاج وتغضب يا شقي بحاره .. قليل وين ياجد م الغراق نجا
واخيار الكلا م يفيد باختصاره .. حتى وهو قليل ان كان دل كفا
بلا شرح يعرف مقصدي بافكاره .. الفاهم الليربي عطاه ذكا
مرسولك انكان احسنت في اختياره .. على من رسلته ما يريد وصا
وما زلت نا هو نا

......................

مازلت ماسك حدي .. على ما تركني فيه بوي وجدي
لا ننجرف في دفع سيل امعدي .. ولا يزحزحن ساسي ارياح اقوا
ولا يوم يبهت معدني ويصدي .. معا صهدصيف ولا جمود اشتا
ولا يغيره طل الربيع ايندي .. خوغ م الندى يردي عليه صدا
وهي للمشاكل والحساي اتودي .. ما انتبع اللي في طريق مشا
وغالي علي الحق حتى ضدي .. نقوله وما نطلب عليه جزا
وما زلت نا هو نا

......................
مسّع لاكنت الغلب .. ولا عمر طيبني ابواخ الجلب
ولا يرد صيدي من نبيح الكلب .. ولا يعن قافلتي سطير اجرا
ومازلت كيف نزوم زومة ثلب .. هدير فرخها ينقص يعود ارغا
ومازلت نحمل في الجواجي قلب .. يفيض بحنان وعطف خير عطا
ولكن شديد عنيد قاسي صلب .. سريع يتحول كان لمر دعا
وما زلت نا هو نا

......................

( (ما زلت نا هو نا) عبد الحميد عبد السلاو بطاو**القصيدة الرابعه عشر

و ماننحـني مـازلت ناهـونا** امشاكس ومانسكت ان ريت خـطا

ومـازلت ماغيرت ** حتى بعد قصرن اخـطـاى اكبرت

لامشيتى بدلت لاسـقرت ** ولاضـعفت كى زاد الزمان جـفـا

ولاعن طـريقيي تهت لاعوكـرت** ولاقـلت ماالياسات باللى جا

ولامن غلط بين العرب دنقرت** ولايـوم فوق رأسي سفـيت أغطـا

ولامع الغوالي بالجفا بـادرت** ولاتبان لي كشره ان ضيـف لفـا

ولانقول للجافي عليش هجرت** ولانلـوم لانعـتب عليه أن جـا

وياما علي هول الزمـان صـبرت** وعازيت لى مايفـيد فيه عزا

ولايوم عمرى للجميل نكرت** مجبول عالـوفا

وما زلت نا هو نا

........................

مازلت فى موالـى** شايل أهموم الناس قبل وتـالى

وماننخدع وسـط البساط الخـالى** ان ريت السراب انقول بلكـى مـا

ومايخف بوقى بوقرون مدالى** نترك غـلاه ان ريت فـيه صغـا

ويامـا هجرنا من اعزاز غـوالى** بعدعاملونا بغطرسه وجـفا

موش نااللى نرخص على دلالـى** نزيد ضعف كان رقا سوم الاصحاب

ولانهين صاحب لانعادى والى** الناس كلهم وقت الحساب سـوا

ومايوم فى مـينا ربطت احبالى** وقف مركـبى لاعاد مشى لاجا

ومعروف بين الناس قبل وتالـى** بطيب عشرتـى

وما زلت نا هو نا

........................

مـازلت مابطـلت** ومـازلت نسـعى لغايتى ماوصلت

ومازلت لى نبيه ماحصلت** مع الياس عندى في الكريم رجا

حتى ان زمـانى مـال نا ما مـلت** واقـف على حوضى عصـا بعقـاب

ومـايوم عمـرى لصاحبى جاملت** انقوله أخطيت ان كـان دارخطا

ولايـوم عمرى لكـلمتى بدّلت** ولاقـلت من العوسج يصير نما

ولاانضـاق بى الحال قلت اوحلت** صيورها ان ضاقت تعود رخا

واجد دلانى هالزمـان ذبـلت** ولا قلت أيوه أن كـان تلزم لا

ولافى طـباعي لنت لاعدلت** أنشـيل العـنا

وما زلت نا هو نا

........................

مازلت فى ترتـيبي** لانخـيب لانغلط وماسـك عـيبي

خفّن غراضى كيف فتّـق شيبي** ورينا صـغا واجد وريت زهـا

ضعفن أعيونى مانفع تطبيبى** للكـبر وماعـطارجاب دوا

صـابروراضـى بقسمـتى ونصيبي** ولي عـزم كـان وقتى على قسا

زايـدعلى راقـدالريح نحـيبـى ** أنشـوف حالته نكمـل عليه أبكـا

نحس بالكرم ونهم نلقى جيبى** فارغ ايصفر ماعليه أعبـا

أيرق عـزم صوان الجبال سريبي** ونا أنقول هانت مافقدت رجا

حتى ان زمانى جارفي تقليبي** وزادالشقا

وما زلت نا هو نا

..........

مـازلت قاعـد راكـن** راتب ضمـان وحوش بـاني وساكن

أمهـوط وقاعدفي ذرا غيرلكن ** أنجيت في علل مانقول ماني نا

مايهمـنى اللى طاح واللى ماكن** ولاأنخاف كان قـالواالحسـاب بـدا

ولايغرنـي كـذاب مهمـا راطـن** شى يفـيد كى يموت المـريض دوا

ومايفيد يبقن واجـدات معاطن** ونموت مالظـما ماأهناك فيهن مـا

ومايفيـد غـافل فى الزمان وفاطن** ولا أهناك من يقـدر يرد قضا

ومامن عوالى في الوطاه تواطن** لايدوم ضيق ولايدوم رخا

حتى ان كان في كبرى أخطاى تخاطن** عنـد الفـزع

و ما زلت نا هو نا

......................

(ما زلت نا هو نا) عمران القزون** القصيدة الخامسه عشر

.................................

ما زلت نا هو نا ** انشوش وين ما نسمع سريب أنسا

و لا بغيرهن

....................

ما عاد لذيذ وجابه ** نسمر بنار غلاه لا نشقابه

ع الرف رامى لوعته و كتابه ** و لكل شيء ولعه و وان اطفا

وعارفه امزهد في عواه شبابه ** واجد الجيل اللى اليوم نشا

و للهليع امسلم في الغريم ان صابه ** و لا له ايجيب ان كان رد زبا

خطرها غلا غالى برد منشابه ** و ابرى ع العدم جرحه بغير دوا

العقل فيه ما شقّى الدا طبّابه ** حكيم الدّهر داوا أبداه دوا

متغيهب ابقى في جبدتا ىو سلهابه ** و ما الشيب ع العالقه دون طيب رما

و في حدود ما جرب العقل أصحابه ** و ما شاف ناس وما أدروس خذا

ايدلك ان صاب امشى على صوابه ** وان كان هو اخطى مرجوع له الخطا

القيت التحضر ثمن خش احسابه ** مدفوع من احساب القيم حيل جا

و العالم تحول م الحضاره غابه ** بيها الواعى و الحكيم صحا

هوايش اوعار ادغالها جوّابه ** مال الطمع فيها ايموت ظما

و اضعاف من زئير اسبعها ريّابه ** و أجراس الكنأيس و الاذان نها

و كاينتها هاللى إضعاف غلابه ** كيانهن ايضيع و للقوى البقا

و ديمه الحيا بريحها قلّابه ** يقوا الضعيف و يضعفوا القوا

و سيور السباع الضاربه الغضابه ** ايجيفهن عليهن عاقبات اجرا

والعبره الشرقى وين صار اغيابه ** اللى طيحته لها الحين صوت صدا

ولها الحديث حديث جائع نابه ** العصر الحديث حيث فيه لفا

فيه أمم متحده عليك خرابه ** و مجلس الحرب الأمن فيه لغا

وخرْبت الثقب اليوم با أسبابه ** بالغلم عيب و فيه جهل بدا

للعلم ظلمه غامره طلابها **وله وجه شين مع الزمان بدا

و النور فطرتع الانسان بين اجنابه ** شعاع يفقدع بالعلم كان قرا

وان عاش في المدينه ما اتعد اتعابه ** ايتوه في وجه الساكنين ابها

رغابه المباني غافلين رغابه ** عدّامات جراده في افجوج خلا

ونعام وين يستانس ايمد ارقابه ** وكان خاف روسه في الرمال خفا

وعجول كل رفقتهم حشاك انصابه ** و اشباه الديوك اذان دون صلا

وهل عيب ديما ع البعض عيابه عوج ارقابها خايل على ام ذرا

وكم ثلب يخزن ما انسى ضرابه ** و خيل ما امعاهن جرى غير شقا

و تاجد اللى مبدا الفار مشى به ** خراب عامره ديمه و نقل وبا

وهناك من ايقلد بالاخرين اعجابه ** و اهناك من اير كى الببغا

وديما خلاياها اتعوز رقابه ** فيها عسل للنحل فيه شفا

وتاجد اللى الجميل ما يدرابه ** اعيونه ايغمضهن ان كا كلا

و الناس من خيال الصادقه هرابه ** ان كان قلتها منك اتزيد جفا

امغير ماى جديده من النبى و أصحابه ** الحق دوم خالق له الله اعدا

ولكن ايفوز و ينتص باربابه **الحق له دعايم واثقات اقوا

واللى الليل يخدم في استار احجابه ** عيونه ان قابلهن النور غشا

حشا م اللى ايحاسب احساب نقابه ** وعار ايثوارت من ضنا الـ ضنا

وتهاب من العتب و اللوم م العتابه ** وقولت افلان العيب فيه خطا

عيش البساطه قل من يرضابه ** ولا المال الواجد ايجيب هنا

وهو للزها في الفقر دم قرابه وعنده خصم دايم مع الشرا

حتى كان كوخ كايخات اخشابه ** و نلاقى مقامى فيه خف قضا

متوسد اجرابى و الفراش اترابه ** ولاكن نمت انعوز فيه اغطا

و الوادى امسلم فيه للحطابه ** برضا و الله من غضب برضا

و بعيد ع الكشيش و حب لاجتنابه ** ان كان ردت نسعى فىدروب نجا

ولا النهر يلزمنى انعوم شرابه ** ان كثرن تماسيحه انسيبه لها

و ديمه ايخلط دمعته ابطرابه ** ولاّد دهرنا تومى زها و بكا

و التومى ايليقن ع الشقيق اثيابه ** امغير ما شقيق على شقيق هنا

وكان النّظر لقبر غابى حابه ** و فوق من ترابه هش ريت نما

بات فيه يصّارع زها و كآبه ** و أوقات أتمنى للعيون عما

وطاش النظر ردّه خيال سحابه ** مرورها على مصدر النور طغا

من صور شتّى أسباب عذابه ** للرحله الراحل يلزمه الوتا

غول الخيام الدّاميات انيابه ** فيه ينتظزر حتى ان كان بطا

وبساط ايتراقص من بعيد سرابه ** ايبان شين به ارياح فنا

ايجيه صاحبه سافى عليه اجرابه ** عارم اتعينه ع المسير عصا

الخوف من ظلام رهيب في مهلابه ** يطويه كيف ما قبله م الأجيال طوا

و على الله جراب ايكون فيه ثوابه ** عظيم بيه ايفوت صراط يو اللقا

و ما زلت نا هو نا

...................................

ما زلت نا هو نا) حليمه الشريف السعيطى **القصيدة السادسه عشر

---------------------------

ما زلت نا هو نا** على ما طرا فى الحيا و جرا ** نظيف معدنى

عندى انظار ما يجَدن ** إن عطش علىبير العصر ينهدن

وان شدن رجيل أصعاب ما يرتدَن ** كاسحات ما فيهن اعروق نجا

وصاحب السويا ما عليه ايعدَن ** حتى لو قعدصاحب طويل عنا

وكنهن عطنَك وعد فيه ايسدن ** لجلن تربَن طبعهن وفا

و لا يقبلن عدو ولا يرتدن ** الصدق عندهم ما يجرى فى الما

و ما زلت نا هو نا

........................

عندى عقاب صميله ** انرايف ع الغالى وما نمشى له

ونقدر على الحمل الثقيل انشيله ** ومازلت فى الكريه انقول رخا

حتى ان كنت حاسب ناس لى عزيله ** ايجو ان صارت لى شده ايقولو لا

القيتهم لفاعى فى اثواب جميله ** تركيز سمهم يكثر بكثر الما

واللى ينظرك بالعين ماتو ميله ** عدوَك ايطيح ويطلبك نجدا

و ما زلت نا هو نا

........................

عندى قلب ياما شايل ** وطاوى بجالته نصيب علايل

وصابر على ضيم الزمان المايل ** وعايش امعيشه ما عليك ابها

ومازلت لتوا عليه انحايل ** روَضته على عيشت صغا و شقا

ما قبل قنعته بكل وسايل ** له دايرة ياس العزيز رجا

مهم باعدو ما عاد ايجديهم جايل ** الياس بيناعقد الفراق مضا

و ما زلت نا هو نا

......................

من طرف **STAR** 2016-07-11, 9:53 am

صحيت واجد

الجزء الثالث من ملحمه (ما زلت نا هو نا)

الجزء الثالث من ملحمه (ما زلت نا هو نا)

رد: الجزء الثالث من ملحمه (ما زلت نا هو نا)