زيد ثلاثة من عندك

فيه ثلاثيات واجد فى العالم يتكلموا عليهم ... لكن هناك ثلاثيات فى ليبيا .... بس ... بس

تفضلوا ...

ثلاثة تسبب الإحباط : الواسطة ... و الديون ... والمنتخب الليبي .


ثلاثة صعب نتخلى عنها : الماء...والهواء...والبازين .


ثلاثة محتاجات واسطة : البعثات..والشقق...ودواء بلكة امتاع الكحة للاطفال


ثلاثة يرفعوا الضغط : الملح..وزحمة المرور..والعيل كان عشش .


ثلاثة تسبب الغرور : الفيلا... والهامر..وبدلة الحرس البلدي .


ثلاثة ياكلوا في لحوم البشر: الحيوانات المفترسة....والبزناسة الكبار ... وجماعة القرمة كان شبعوا .


ثلاثة لازم نتخلى عليهم : التفنيص.. وسياق امتاع الفرح..والزروق قدام القلع


ثلاثة ما يرقدوش الليل : المديون.. والسارق....والمزروب

ثلاثة شبه اختفوا من ليبيا : ..احترام الشياب ....والفراشية .... الدلاع الطويل.


ثلاثة ما تحسش بطعمتهم الا في ليبيا :مكرونة على الحطب....وفاصوليا بالكرشة..و..والزردة في الباكور


ثلاثة تدعو لهم بالهداية : البلعوط ..والمحسدي.. والجزارة

ثلاثة ما تستغربش منهم في ليبيا :

واحد قاص السريع على رجليه..... وواحد يسوق في الاتجاه العكسي ..... وواحد طالع في الاحمر..


ثلاثة كان مشوا تتمنى ما عادش يردو: الفقر ..والمرض.. والبنت كان تزوجت .


ثلاثة تتمنى ما تصبحش فيهم : سواق افيكو مستعجل....وطابور طويل في الشيل.... والمدير المتعارك مع مرته ..


ثلاثة ربي يفكك منهم : مجاري مفتوحة......وكلب مطلوق .....والحيطة الطايشة .


ثلاثة ملهش معنى إلا في ليبيا : البطش..والزغدة.. والعصبان ...


ثلاثة لا تستخدم إلا في ليبيا : الشرمولة ..والسيزة....وعبابيد الزميتة

مشكور لما قدمت وننتظر منك المزيد

وثلاثة مانقدروا بلاهن في المنتدى

الضبع....ومواضيع الضبع....وخفة دم الضبع

مشكور على الثلاثيات الجميلة

تلاثه ماتملش منهن بكل:انت والتميمي وعرب التميمي كلهم .
مشكور علي التلاتيات .

مشــــاركه خبـــرهـا مــو هنـــا بلكــل.:.بــــــــــــــــــــــارك الله فيك...