الرويعي الفاخري - نجم الليل ياليلى"

من طرف **عبدالحفيظ عوض ربيع** 2010-03-18, 3:25 pm

الرويعي الفاخري @ نجم الليل ياليلى"

.
نجم اللِّيل يا ليلى ثقيـــل*** قصير الدرج في كبد الســما

لا لي لوم يعجل بالرحيــل*** ولا لـي لـوم تاتيني اخــرا

صايف فيك مرجاي الطـويل*** صيفة جـذر ما طال الثـرا

شلت الصوت في ذيل الرحيـل*** لك نـاديت ما جـاب النـدا

جيت نموج مكسور و ذليل*** صوتي ضاع في ريح الخـــلا

من فرقاك ودّرت السبيـل*** لك بردان كنتــي لي دفــا

لا عــد دل قافلتـي دليـل *** و لا عد شمس ضوّت لي وطــا

ولا فـي ليل نوّر لي فتيل*** و لا عد طير في وذني شــدا

سنين العمـر م الكرب الجليل*** ما اسرع كيف ما طارن هبــا

جفّـن كيف يابسة القصيـل*** منبهتات بهرجهن طفــــا

كاس الشوق خلاّني هزيـل*** نشرب فيه فـي صبح ومسـاء

قبلك كنت في النوم العسيل*** كيف الطيـر سابح في الهــواء

نرقد وين ما يهجم اللِّيـل*** عندي كل ما يجري ســواء

جيتك جـيّ راكبني جفيل*** نلعب بين غيطـان العفــاء

فجّرتيــه لحسـاس النبيـل*** قبلك كان عايش فـي خفـا

فيك لقيت لحلامي رسيـل*** وردّيـات فـاح لهن شــذا

جيتي طيف في عمري دخيل*** ماسح كل ما قبله جـــرا

منّيـتيه بالفيض الجزيـل*** حلمــي نين في ظلك نمــا

و بين يديـك يا شبه الهميل*** صاف صياف بلكل وانتهــاء

جيتك مزن باشر بالنزيل*** ****لاطشتيـه بارياحــاً اقسا

طاش انظرك و القيتي خليل*** غيري وين في شطّك رســاء

غرّك ظل يا ليلـى ظليـل*** و امباهـاه و معيشة رخـــاء

و اللِّي كان عندك مو قليل***** طوّحتيه تطّويــحة نـواء

سيّبتيه من غدرك قتيل ***** بين اللِّيل و اذيـاب الفــلا

يانا اليوم يانا اللِّى عليـل*** عنّي غـاب جيّاب الـدواء

مـايج كيف عالية النخيل*** تصفق فـيّ لريـاح القــواء

وين نقـول نستعدل نميـل*** نردح كيف ميزان العصـا

راح البين بالحلم الجميـل*** قصوري فيه بنيّن ع الخيــا

ع الاطـلال في الدمعه نهيــل*** ننادي وين و يرد الصـــدا