مكتبة الغناوي والشتاوي و العلم

نبدأ معكم في سرد غناوي العَلم والشتّاوات

ماهو شعر العلم ..؟

العلم بفتح العين واللام في اللغة هو الراية وهو العلامة والاثر وهو الجبل المرتفع,وهو سيد القوم ايضا . العلم في اغاني العلم يقصد بها الشخص المهم او الحبيب في الابيات العاطفية .
وعند البادية كانت المرأة الشاعرة المشهورة يقصدها الفرسان والشعراء من كل حدب وصوب فكأنها علم او راية او جبل مرتفع يهتدى بها الى مكانها .
واغنية العلم من احب جوانب الادب الشعبي المختلفة الى الناس ...كيف لا ؟, والاغنية الواحدة منه مركبة من بيت واحد مقفى وموزون تؤدي من المعاني مافيه غناء عن الكلام المسهب الطويل ...انها كالأمثال بأسلوب بسيط وكلمات قليلة تؤدي الغرض من قبل المقال الطويل والخطبة العصماء.


ما هي الشتــــــاوة....؟

لون من ألوان الأدب الشعبي وهى تقال دائما بعد المجرودة ... أحيانا بمفردها وتبدأ ببيت من الشعر الخفيف من شطرين بحيث تأخذ المجموعة الأولى الشطر الأول والمجموعة الثانية الشطر الثاني وتؤدى على ايقاع الكفوف وتصاحبها حركات متنوعة من قبل المؤدين وغالبا ما تصاحب هذه الشتاوة راقصة ( تسمى الحجالة).

واليكم بعض مقتطفات من العلم في مواضيع مختلفة :-

* لنبدأ ب( الحلم )
حلمت يا عزيز منام ... تمنيته الليل وما كمل
راقد وجاك النوم ... كذاب ما غلانا شاغلك
اتقول في الغطا مكتوب ... يخطر عزيز ساعات نومها
خيالات ياس عزيز ... للعين وين نامت ايجن
سريب ناس كانوا صوب ... البارح منامي جابهم
معاه النوم غير خيال ... العقل يا بعيدين عندكم

* ( الذكرى والنسيان )
مرهون يالعين انسيه ... ديري عزا وين واصبري
بلا رقرقة يا عين ... انسي عزيز ياساته مضن
يكساها ضباب فرسان خيل ... العين وين لأوهامك تجي
ننهى العين على ذكراه ... تقول نبيه لين ننظره
بكيت والبكا ماجاب ... ننساهم والله غالب علي
متورخين في الخاطر ... اعزاز ما نسيناه صوبهم

* ( مابين ارادة وعاطفة )
واخدين مافي العقل ... سواء بعاد ولا يقربوا
ترك غلاه عاش بلاه ... العقل كيف راعاك خاينة ؟
سبحان اللي هانوا ... واشقى العقل بأولاف غيرهم
بطى العقل يرجى فيك ... تغيب ليش يا مولى الدوا
العقل يا بعاد الدار ... يمسى معاي ويبات عندكم

* ( بكاء )
العين هدبها مبروم ... على عزيز يا ما باكية
ماعاد فيهن هدب ... لنظار م البكا يا غالية
خلاني عزيز يتيم ... بكاي ليل والليل ما كمل
بعد العيب جا منك ... يا عزيز مشكاهن لمن ؟
دموعي على لولاف ... سقطن في صفاء دارن حفر
ننهاهن يديرن عزم ... يمساهن الليل ويذرفن

* (الفراق )
فراق العزيز صعيب ... والصبر في غيابه كادني
ادموعي على لولاف ... نزيل غيم ريحة خامدة

* ( الارياف , الشوق )
امرايف يا عزيز عليك العقل ... حتى وانت يالاه موعره
اريافي ونار غلاك ... يا عزيز انا مانطيقهن
فراق العزيز عذاب ... وعين حزينة مرايفة
العقل مانسيهم يوم ... امرايف على طول ياسهم
مابك مرض يا عين ... على عزيز غير امرايفة
امرايف رياف الطير ... اللي في القفص حابسينه

* ( الجروح )
جروح كامدات الروح..
كاسرات العظم..
طارشات الوذن ..
سالات القلب ..
عاميات العين ..
ساحنات الكبد ..
طبيب ما على داهن ايجي .
جروحات عزيز كبار ... وساع والدوا انا منين لي
خايف العقل يجول ... يلقى الجرح ويغيب الدوا

* ( الغلا , الحب )
لا حرام ولا مسروق ... ليش في غلانا تجحدوا
بسيف الغلا مضروب ... القلب لين هادي حالته
شدي عزايمك يا عين ... يفنى العمر لا بال الغلا
اللي ما تردى مات ... اصحاب الغلا راهو الكل
بلاه مانعيش انموت ... غلاك يا علم نفس وقوت
ان كان الغلا قتال ... الدايم الله يا ارواحنا

* ( الحسد )
اللي حسدك صوب عزيز ... يعيش لا نبا لا عافية
التموا في مقاعده حساد ... عزيز مانلومه ع الخطا
عليك ميعدوا حساد ... ضروك في غلا كان نافعك
عزيز وين صار خطاه ... حساده خدوا غايتهم

* ( الخاطر )
يا عزيز وين تغيب ... ما يجيبلي خير خاطري
الخاطر مامعاه رفيق ... الا غلاك ديما يا علم
سريب غيرهم ما جاب ... الخاطر غواليه القدم
قسامي بلا غيات ... بالخاطر الله لا يجيبهن

* ( القدر , الاحترام , التقدير )
القدر هو رديع الصوب ... ان غابن قوانينه اعدم
ماهن خسارة فيك ... لقدار يا عزيز تقيمهن
في زمان قل القدر ... لقى لتراك خيرله

* ( الخطا )
مازال واجعك يا عين ... خطاهم اللي ماله سبب
خطاي من خطاك معاي ... سبق خطاك كافيته بالخطا
خطا عزيز كيد كبير ... معاه خاطري ناض وقعد
لا عزيز داير خير ... ولا خطاه لا قيله جهد
ليش يا عزيز ادير ... الصوب وانت عابي ع الخطا

* ( الصبر )
الصبر شين وزين ... عليه كان يالعين تقدري
هاك صبر داوي داك ... احسن عزاك في صاحب الغلا
الدمع ما يجيب عزيز ... الصبر خير واولى م البكا
اصبر تنال صوب عزيز ... اموالة الغلا طولة رجا


واخيرا ارجو منكم ان تسمحوا لي بان اهدي هاذين البيتين من العلم لشخص ما ...
فراق العزيز صعيب ... والصبر في غيابه كادني
على صبر ما يلتام ... جرحه جديد مازال خاطري .