مازلت حى يا عمر

مازلت حى يا عمر
لشاعر عبد الحميد بطاو

تنشد علىّ مازلت حي يا عمر
بين الجفا وكثرة وجوه الشر

كثرة اللّقاقين

اللى كى الجرانة ايزغرتوا وساحبين
السيل واخذهم وهم غافلين
نين يوم يعزقهم على شى بر
فيهم اللّى من الكذب مكسوفين
كى اتجيه يرخى وكى تغيب ايزر
وفيهم اللّى وسط الخطا حاصلين
وله وجه لا يندى ولا يدنقر
وفيهم اللّى انشاف ناس ملتمين
ايخش بينهم بالك ايشيل خبر
وفيهم اللّى فى كل شى خاشين
وما يعرف اللّى اتفيد مااللّى اتضر
وفيهم اللّى يضمك بلطف ولين
وله لسعة اللّفعى نهار الحر
لا عاد كرامة لا شرف لا دين
لا وجه طيب لا كلام ايسر
انقضوا عقاب هاالعمر منطمرين
ولا صحبة اللّى رفقته تقهر
وتنشد علىّ مازلت حي ياعمر

كثرة اللّى صفّاقة

كل يوم وجه وكل وقت رفاقة
اللّى كى اتراجع سيرته واوراقه
تستغرب اتقول ها الشكل كيف ظهر
من بّره اتلاقى قشرته براقة
ومن جوّة امعبا حقد يطّافر
تاريخنا امسجل اللى لقاقة
اللّى لموسلينى سلموا سى عمر
ابكاهم امغير امجاملة ونقاقة
بروق ورعد غير ما اهناك مطر
من حاش الحرس يقسم مع الّسراقة
العصران م الفلس تكمل حياته زر
ناس رايقة وناس فى الشقا تزّاقة
الوسط انتهى اما خير ولا شر
واللّى كتب شرّط جميع اوراقه
لا يجيب شعر ولا يفيد خبر
فى الحوش حابس ما نريد رفاقه
واجدين لى انجاك ضيق يستاخر
انقيّس على صرفى افلوس الباقة
وكى اتضيق ندعى ربنا يستر
وتنشد علىّ مازلت حي يا عمر

مازلت حي انقايس

بين الجفا وها الوقت لى متعاكس
فيه كل ذيلى دار روحه رايس
البوم صال نين جفّل الطير الحر
العصران فى هم المعيشة حايس
كرامته انذّلت بين جوع وشر
وصاحب الخطا قاعد قبالة يمارس
والسارق عليه الخير بان ظهر
ان كانك عرفت مع الفساد اتسايس
اتنال حاجتك فى الحال ما تنظر
وكنك شكيت وقلت فيه دسايس
ايتوه مركبك ما عاد تلاقى بر
امسكر على روحى وقاعد خانس
فى الحوش لا نطلع ولا نخبر
ايضيق بي الحال لكن دايس
على قلب يطّافر اتقول بحر
وتنشد على مازلت حى يا عمر

مازلت حي ووافى

براتب الضمان وبقلب راضى وصافي
خلاص سد لى ريناه واجد كافى
احواش عمرنا توّه اشوى عصر
لا انذل روحى لصاحبى اللى جافى
ولا انخالط اللّى ابسلطته مغتر
ولا عاد نبرم مركبى بمجدافى
ولا نعاند التيار وسط بحر
نصبر على شيبي وجمرى الطافى
مراد ربنا لا نزيد لا نغير
في الحوش قاعد بين دلال اولافى
وراضي بنصيبي خير ولا شر
الله ايسامحك نا كنت دايا خافى
وحثحثتنى نين قلت ها الخبر
وتنشد على مازلت حي ياعمر