مازلت نا هو نا هونا هونا

تعتبر ملحمة مازلت ناهو نا من اكبر الملاحم واقواها
حيث انه شارك فيها جميع شعراء ليبيا من مشرقها الى مغربها كبيرهم وصغيرهم
وقد اخترت منها رد الشاعر الكبير***علي الساعدي الفاخري**
مازلت نا هو نا علي ماطرالي فالحياه وجرا
نظيف معدني
مازال في احساس وضمير ايتعذب من عذاب الناس
ومازلت نعطف رغم حقد الياس حتى انكان ماعقب علي نما
قلع غرستي م الارض م الاساس ونشرها مع لرياح في الصحراء
حتى وهي هشيم عروقها يباس كي قبر حاتم مي حساب خلاء
والمركب اتضره كثرة الرياس ان سافر وجاته عاصفه هوجاء
ونا مركبي منسوف مالحراس وين ماعلي شط النجاة رسا
بناسه مشى م البرج للرفاس فوق م الامواج العاتيات اشلاء
واللي قستها ماقاسه تراس طاحنتني ليام طحن رحا
مغير للمصايب درت قلب نحاس وعبرت عبرة اليابان للماساه
ومازال صبري ماعلن لافلاس قاعد رصيده للهموم دواء
ومازلت متماسك مثيل الساس كيف هرم خوفو ع الزمان عصا
ومازلت صامد كي جبل لوراس في وجه هزات الدهر لقوا
والله يقرضك يابذرة الدرياس ربيع وطنها ديما عفاه جفاء
وهناك كيفه م البشرفيه اجناس اصحاب الفتن والحقد والبغضاء
الواحد ايجيك وجهه اتقول اكباس ونيته وفعله فالسواد سواء
تحسير المذابح هو جزا لجناس لكن جبيني فيه عرق حياء
والله يلعن الخناس والوسواس اللي للمحبه والسلام اعداء
اوراه القدم موحال يبقى راس حتى لواكبرحجمه انزال عضا
ومازال في الشعر للدراس دروس وتجارب موعظه وهدا
ومازلت داير للرفق مقياس مصافي انصفي في الرفيق بها
اصحاب المروه قرعة المنهاس اللي فالنوايب يوقفوا بسخاء
معادن كريمه كي احجار الماس علي كل ماتقدم اتزيد غلا
ان جا الباس يلقاهم اشداد الباس وان جاهم رخا صفوة عطا واحما
ونكره الغدر ساقيني الغادر كاس من طبيب في سكرة عطش واغماء
والظلم يامن البست الباس لاتكون لي ولانكون الها
مازلت له مشتاق اللي هزني فرقاه مالاعماق
سادل وراه ستار ماينطاق ستار ياس مايجدي معاه نجاء
ويجي في منامي جية السراق يحايي معاه امراض لي شفاء
ويامن علي اتلوم مانك حاق الطير وينما عشه احذاه هفا
يابال شاعر له اعزوم ارقاق وصادق وباكبركارثه ابتلى
كسرين جني فالسهم والساق خطا همها وزاداته علي اسماء
وياحسرتي موعر سعير افراق افراق جزو مني ما معاه نجا
ايكابر وصابر من مرض ماتاق وهو سوس ينخر في حشاه بدا
ياويلهم مالعهد والميثاق شر فعلهم لاسود سعير لظى
وبجاه من عرج لله ع البراق اجعن من اسبب فيه دار خلاء
نبكي فيه نبل العشق للعشاق ابكا ماابكي في صخر مالخنساء
علي طول ماطال الزمان الشاق نرثيه دمع وشعر واي رثاء


------------------------------------------------------------------
وسلمتووووووووووووووووووووووووووووووووووووووووووووووووووووووووووووووووووووا

الله يعطيك العافية يا بركة المنتدى على ما طرحت وما قدمت

مشكور خوي ستار على مرورك الكريم
وبارك الله فيك

رائعة مثلك تسلم اخى اسماعيل

الاخ اسماعيل
ملحمة( مازلت نا هو نا) كما نعلم جميعا ابتدأها الشاعر بوعجيلة عبد السلام وقد نظم على منوالها كثيرمن الشعراء منهم على سبيل المثال لاالحصر عبد السلام بوجلاوي وعلي الساعدي وعبد الله بو الروين ومفتاح الفالح وروفه الدعبوب وغيرهم الي ان وصلت الي شعراء في اقليم مطروح بمصر فنظم عليها الشاعر عبد الرحمن بو امغيب الصنقري ابيات ثم وصلت الابيات التي قالها الشاعر بومغيّب الي الشاعر عقوب الشرمي فنظم هو ايضا ابيات عنها.

هذه فعلا ملحمه شارك فيها العديد من الشعرء ، واستكمالا لما عرضته انت نضيف اليك فيما يلي مشاركات بعض الشعراء المشاهير الاخرين :

يقول الشاعر عبدالسلام بوجلاوي رداً على الشاعر بوعجيلة عبدالسلام في ملحمة ( مازلت نا هو نا ) :

مسّع رقت = ولسّع انسيت من فارقت
تقول ما اوصل منهم الا هالوقت =خبار ياسهم دوبه عليّ لفا
وما من افراق ناهر ذقت = لها امعاي ما زالن ابواقي دا
مكتوب في جبيني من نهار اخلقت = بنار الغلا نسمر ولا مه لا
مازلت نا هو نا
مازلت للزينين = نشارف ونا شارف علي خمسين
ومازلت لا توا نموج حزين = اطربي شال في جرة امناي جلا
مازلت ما نقبل إلى هالحين = من جهة امعزى في عزيز عزا
انظاري تقول مفارقات جنين =مجهول المصير انحاز بين اعدا
و لا بن ايهوننه بطول اسنين = غلا اشرب عليه زمانا وكلا
مازلت نا هو نا
مازال عقلي خضر = ايام لحصاد نريد نبذر بذر
علامات كبري ما عليهن عذر =. امراض مالهن عند الطبيب دوا
والياس مانع الغيع وفارض حظر=على من لصيف الشيب فيه بدا
خطيه كبيرة ملفته للنظر = ان كان دارها منا اينال جزا
والناس عندهم لازم يموت الجذر =ان صاف الورق ماله يجوز بقا
شين الملابس في نظرهم قذر= حتى لو ابقي طاهر نظيف عضا
مازلت نا هو نا
مازلت كي ما كنت = ان صاوبت صوب امصاوبني صنت
ولا من امنّي حياتي خنت =مبداي صدق قول وفي لوعود اوفا
وكنت اللي نجرح اليوم اطعنت = بلا اجراح طاعني سليم مشا
الحاصل على جنس الصبايا هنت = ما عد انذيبل غاليه بغلا
ولا ان بنت تفرح غير بنتي بنت = تقول لمها يا أمي الغايب جا
ولا لي عليهن لوم شبت وشنت = وفي هالمجال الكبر راه اخيا
حتى ان قلت مازلت له مالنت = حقيقة وياجب لعتراف ابها
الصوب سريبه عليسار ركنت = بنيت فيه كم عللي وبتت خلا
ومازلت صامد كيف ما قلت انت = وفيهم انراجي كان فاد رجا
مازلت نا هو نا
مازال في دوامه = مدورد عليه جذار عقلي ضاما
يمشي مع ايهن عدو دروب امامه=يخاير وحاير ما قرار خذا
ايخاف اللصيف يغر به يتعامى = عليه عالضما لوّلي يزيد ضما
اختامه اوقات يصلح غلطته بندامه = بلا مشربه خلف السراب جرا

احسبت السراب شراب بددت ماي يانا ما العطش ( غناوة علم )

ويطالب نهار ليل باستسلامه = الياس قاله سلم وهو مابا
حتى والسلام اوقات فيه سلامه = وناظر لغيري ما جرا وطرا
رفضت الخضوع وسلطته واحكامه = وله ما ركعت ولا طلبت جدا
نعيش صقر يوم ولا اسنين حمامه = ولا لي على عير الكريم اعبا
مازلت نا هو نا

مازلت في تياري =انواري نويت وما قدرت انواري
اصروع الجواد اطلقت في مشواري =وين م الجضر والغيض بي مشا
ومن قبل ناصب عالغوالي طاري = بكيت ما قضيت الياسهم ببكا
اللي افرقهم شوش جهاز افكاري = ما قبل حوته من جديد صفا
وتمن ايشوشن للجميل انظاري =كيف ما يريدن في زمان مضى
ولكن الشي اللي عليهن طاري = لا عذر فيه ولا عليه اغطا
زرابهن مرض من حكم ياس اقراري =اسماه كبر سن بواجدين زرا
وجدت الصوب ما ولول بحكمه ساري= معمومل بيه الوصوب القديم لغا
عقبت وغلبني ما اقدرت انجاري = الجيل الجديد اللي عليه نشا
لا اقدرت نوقف عند شوكة جاري = نعاكس صبايا عامدات عزا
ولا طال يالا مدرسة انتظاري = لفرعة بنات مسرحات غدا
جميع ف كتاب خليل ماني قاري =فنا مع الشباب اللي خلاص فنا
انظاري عوضهن في الطرب عالباري = له مابقي مما عطا وخذا
ولكن ابها بكل هوايد ضاري = يهفن ان جاهن العزيز نبا
يروقن اشجارهن واشجاري = عروقهن يطولن في عقاب ثرا
مازلت نا هو نا

كانن ايام الماضي = يجن في المنبي والجميل غراضي
ان كان قلبه م الغوالي فاضي= يلبي ندا قلبي ان ذاع ندا
وامعاه ان لفظت انكون عند القاضي =ما يصير من شوري امعاه خطا
وديمه عميل الغيرنا متغاضي=في ىخر المطاف ايهد ما ابتنا
ونصبح سوا راضي اوماني راضي = نصيبي حسايف م الغلا وشقا
الحاصل عليا تقول حاكم قاضي = ابياس ما يطالقني مدى الحيا
كمّين جاينه جتني العقل تشاطى=حتى وهي قويه راضيات ابها
مازلت نا هو نا

مازلت ماني ناسي= سريب الغلا اللي ثقب حماسي
ريح من غلاه توزّ في مقباسي=ما همدت واخمدت نين هفا
امعاه قبل من لاماه نحتم ياسي = ما انسيتهن عايش ايام زها
اوين ما صدر حكم لفراق القاسي = اللي اضحكتها ردت علي ابكا
مازلت نا هو نا

مازلت في موّالي = حتى ونا كبير وبزوجتي وعيالي
وكبرن وتمن من بنات اجيالي =عجايز ونا راسي الشيب كسا
ولا عد بصوب خليل يزهى بالي = ربابيط والا معنوه واغنا
وحتى ان قلت نترك هالصوب البالي = فايحات ما نعرف اندير اجوا
واللي ما عليه انغلا عيب انغالي=حتى لو اطري لمرضي فيه دوا
سقايهن ان ماتم السواقي مالي = ويهاوي ولا قط للضوّال عصا
يصابن بعيد وهن اعطاش اجمالي=اثقال ما يداعيهن زقيق ارشا
نين م العطش يفنن خلا في الخالي= ولا م السما ينل شراب سما
مازلت نا هو نا

مازال ماسك داره .. الخاطر مع اللي يعرفو مقداره
لجواد بينهم بالكبر زاد كباره .. كبير عندهم ولهم عليه عنا
وحتى لو شكرهم ماي عليه معاره .. للناس لملاح الشكر رد اكفا
ولا من شكر واحد يجير اشكاره .. الزين من امعاي ايزين قال اجحا
ولا من قرض ينساق في تياره .. لا ذم واحد لا مدح بإيحا
ومزال يبسط في العرب باشعاره .. كان البحر عنده اصفي وهدا
وان هاج وتغضب يا شقي بحاره .. قليل وين ياجد م الغراق نجا
واخيار الكلا م يفيد باختصاره .. حتى وهو قليل ان كان دل كفا

بلا شرح يعرف مقصدي بافكاره .. الفاهم الليربي عطاه ذكا
مرسولك انكان احسنت في اختياره .. على من رسلته ما يريد وصا
مازلت نا هو نا

مازلت ماسك حدي .. على ما تركني فيه بوي وجدي
لا ننجرف في دفع سيل امعدي .. ولا يزحزحن ساسي ارياح اقوا
ولا يوم يبهت معدني ويصدي .. معا صهدصيف ولا جمود اشتا
ولا يغيره طل الربيع ايندي .. خوغ م الندى يردي عليه صدا
وهي للمشاكل والحساي اتودي .. ما انتبع اللي في طريق مشا
وغالي علي الحق حتى ضدي .. نقوله وما نطلب عليه جزا
مازلت نا هو نا

مسّع لاكنت الغلب .. ولا عمر طيبي ابواخ الجلب
ولا يرد صيدي من تنبيح الكلب .. ولا يعن قافلتي سطير اجرا
ومازلت كيف نزوم ومة ثعلب .. هدير فرخها ينقص يعود ارغا
ومازلت نحمل في الجواجي قلب .. يفيض بحنان وعطف خير عطا
ولكن شديد عنيد قاسي صلب .. سريع يتحول كان لمر دعا
مازلت نا هو نا

رد الشاعر ( حســـــن شاكــــر الهونــــي )

احد شعراء الجفرة وله مشاركات عديدة في بعض الملاحم وله مساهمات شعرية متعددة ولعل من اشهر قصائده .. قصيدة الاجواد التي يقول مطلعها :

لجواد عندهم عندي أقدار عظيمة .. ولنذال مالهم عندي شرف لا قيمه

نعود لملحمة ( ما زلت نا هو نا ) فيقول هذا الشاعر :

مازال عندي همه .. ومازلت ما بين العرب نسَّما
ومازال كلمتي تجمع الشمل تلمه .. عندي الداني والبعيد سوا
ومعا الناس صاحب حق عندي ذمه .. ولد بيت ما نقدر ندير خطا
وبيت سر للصاحب وشايل همه .. وحكمة نعالج ف لهموم بها
وديمه على غيري مفرج غمه .. رضي والدي منه خذيت ارضا
ولو نقص عندي بالمديح انتمه .. امغير ذكر المبادي للشباب دوا
وكل شاب ياخذ درب بوه وعمَّه .. م الجيل لولي ناخذ دروب حيا
لنا سلف صالح والوفا في دمَّه .. لو يموت ما يرجع عالمبدا
ويهيج البحر مرات عنده جمَّه .. ومواج تلاطم عاليات اقوا
عندي على بو ميم ضافي كمَّه .. قصائد سماح امسجله ذكرا
غلا من مركبلي رجيف وحمَّه .. منه انطبب في جوح غلا
الجرح القديم نضمده وانضمه .. يعاود علي ينزف نصيب ادما
كاس الغلا في الجسم زرع سمَّا .. ما عد نافع في عزاي عزا
نطلب المولى يسلمهن من همَّه .. انظاري وعقلي في الظلال سوا
مازلت نا هو نا

ما زلت نا هو الاول .. صابر على جور الزمان امهول
وحظي امجرب في الرقاد يطّول .. ويمرن عليه اسنين ما يصحا
لو انموت لا نطمع ولا نسّول .. ولا عبد منه نطلبه الرجا
ثابت على مبداي ما انتحول .. وما يوم ملواجب طلبت اعفا
من غير ربنا ما حد عليه انعول .. هو اللي خلقني ملعدم نشا
والحاسد امفيت الحسد ايش ينول .. والحسد ثبت في قلبه امخلف دا
ما زلت نا هو نا

ما زلت في تياري .. الشباب في نما عقلي وبين افكاري
والكبر له اشاير غير انواري .. نص قرن كي دوبه علي مضا
وامجرب وراسم في الحيا مساري .. وعلى من ظلمني ما انرد كفا
كل شي محصي في اقلام الباري .. واللي تعمله عنا تنال جزا
وصادق وقول الحق له جهاري .. يالحق رافع ربنا السما
وامسالم وكاسب بالموده جاري .. متواضع وسالكهن ادروب الله
وأن كان م الزعل مرات تشعل ناري .. نسرع نطفيها بجرعة ما
انخلط انوازي وللشعور انداري وعايش حياتي بين ناس احيا
اوواخذ علينا الشعر نص نهاري .. هايم معا نفسي صباح مسا
ولعمار علم غيب اطول والا اقصاري .. وعارف الدنيا مش دار بقا
مفروضة عالنايم وعللي ساري .. رحلة نهايتها تكون فنا
مازلت نا هو نا

مازال لي كلام .. نقوله وما نخشى عليه ملام
نحنا دينا في لاشرع دين اسلام .. منزللنا تنزيل م السما
نجانا نشلنا من عهود ظلام .. وضيه دروب المومنين ضوا
حلل الحلال وحرنه الحرام .. عن فعل المعاصي ولفجور نها
حث عالاخاء والوصل في لرحام .. متعاونين في الشدة وفي الرخا
ايريد مجتمع مايهدمه هدام .. متماسك يهابو قوته لعدا
قابل للتوبة في حسن ختام .. دين يسر ياما ضالين هدا
ويحيي نهر البعث كوم عظام .. فيه يخرجو لموات م الوطا
انداد وعراة وحافيين اقدام .. للمولى ايهبو ملبيين ندا
ويرفع اقلامه ويصدرن لحكام .. ويندم اللي للنار راح هبا
ونحنا عليها دايرين ازحام .. الدنيا اللي ميمولها انتها
وفينا العاصي ومرتكب لجرام .. وفينا الغافل مابشي درا
عالجنب ليمن وليسار اينام .. يشخر تاركهن افروض صلا
وفيه ناس تفتن بينا ظلام .. اشيان لفعال اقلوبهم سودا
وفينا اللي شكار والذمام .. وفينا اللي للغير دار ولاء
شعب العروبة دارهم حكام .. والغرب ودارهم سلم عليه رقا
يبيعو لوطان يعلقو الوسام افعال مخجلة منها الجبين ندا
باعداد الصوابع مالهم احترام .. ان زالو حماة الشرف والمبدا
ونحنا وطنا قدامنا منضام .. من كمشة يهود وضعف وامريكا
ينظرو لنا نظرة قطيع اغنام .. ايهمها الا لوكال والمرعا
هذول يفهمو عابر لحدود وسام .. وجيوش زاحفة ما تلتفت لاورا
ومن دم ساخن نعملو حمام .. نهونو لرواح نرملو النسا
ونين العدو يطلب الاستسلام .. ابنا يعترف لشروطنا يصغى
مازلت نا هو نا


رد الشاعر : روفه الدعبوب الرفادي ( رحمة الله عليه )

يا حاج فرقت نا .. من بو غثيث أتقول غيم أشتا
رجاي منقطع

يا حاج فرقت حالي .. مع بو سوالف عل الضمير مدالي
لا عاد نشقابا ولا يشقابي .. حتى لو بكيت بدمع فيه دما
علي وين ما يخطر سريب الغالي .. ما عاد إيجيني نوم تحت أغطا
وناخذ الليل ونا أمغير أنشالي .. ويبقى قول حالتي هابا حفا ونقا

يا حاج دونك بررح .. جضر وياس متستاصل أمعاي امررح
لا أنغبت نشغل لا أنجيت أنفرح .. الدا كبر ما عنده هناك دوا
ولا عاد أزنادي من جدي إيجرح .. نين البحر ينزح إيعود ثرا
وتبيض الغزاله و الدجاج أيطرح .. أن صار هكذي ممكن إيصير رجا !

ويا حاج فرقت نا

ويا حاج نصبر صبر .. ألقيت علتي لا هي مرض لا كبر
حتى و الحجايج بين شكل أوبر .. ودك علي روحك أدير عزا
ألا أمغير جابرني زماني جبر .. و القل شين ما تنظر امعاه هنا
لام الميامي كيف ندع الحبر .. ربيع بغوها ماجروه عروق نما
وتريض في عفا لاقدع لاهي نبر .. ولا محاوفة لاهي طفيف عصا
ورافق اللي مالدهر واخذ عبر .. تنسابها ماضي شقا و كدا
صعيبة عل اللي جن أيامه غبر .. أتراود ثنايا شقا وكدا
أحلام كيف من بدل التبن بشبر .. عواطف أنخافن لا انموت بها
ولافات لاساحر و صاحب سبر .. ولا من أمخاوي في سما وطا
فتاح شبر ويتقز ويشبر شبر .. وما من أمشعوذ له أفلوس هدا
وفي الاخرة إللي سكن في قبر .. داير طويل الياس فيه رجا

يا حاج خذ مشحاطه .. غلا بوغثيث إيكيد في مشاطه
لا إيريد دموه ولا إيريد إخلاطه .. لعياله يطارد في عدا و عشا
وأعتاز باع بندقته وباع أحلاطه .. واحذاه يردن ما من أسراب قطا
وخده علي كفه غفر مرباطه .. سليم كان عاود وما خذا و عطا
مالقل عمرنا عدا حشاك سماطه .. وشيب الحسايف في الخدود بدا

ويا حاج فرقت نا


رد الشاعر : مفتاح الفالح

ما نيش نا هو نا .. أنحمل وين ما يحصل معاي خطا
ونقول ساهله

ما نيش مالزعاله .. بعد طيش عاطني الله عقاله
أنحمل وين ما يحصل أمعاي فساله .. ما من اللي عدت بدون كفا
وأن كان ما رقالي في السما نرقاله .. أيام وانا مبلي أمتاع بلا
و اليوم كل حد فيا أمحصل داله .. أموانس علي كمين عيب لفا
وحتى من جفاني ما أنريد أنساله .. اليوم الغلا تما عليه أرضا

ما نيش ميس ياس .. وما نيش مقتنع بالياس مل الاساس
أنحب الحياة وأنحب كل الناس .. ومومن وعندي في الكريم رجا
إيجي من تساخيره إن جاني ياس .. إيجب الفرج ويجيب الدوا للدا
و اللي عليه إيعبا ما ينهاس .. إللي ما علي غيره إيجوز عبا
هللي خلق فيا رهيف أحساس .. أنسان عاطفي مالي عزوم أقوا
أن شاف الجمال إيصيرله ألتماس .. عندي العين من قلبي قليل نجاة
وكل يوم مسقي من الغوالي كاس .. زها في اوله واخر المطاف بكا
قضيت عمر جيد وأغلبه أنعكاس .. وشعرت بتغير في الحياة جرى
عندي العقل هالفترة زكا عل الراس .. وهو في ظلالاته عليه طغا

ما نيش نا هو الاول .. الانسان إيتحول كل يوم أمحول
موال الغلا وأحسن أنسان إيمول .. علي كثرته مادرت بيه نما
قضيت كم عام وانا عليه انعول .. ألقيته هبا كله ورزق اربا
وما عاد سني تو لي أتخول .. أندير الخطا وأنعالجه بخطا
و اليوم الكريم ورحمته نسول .. تايب أنكمل في النهار صلاة
وما عاد نبي عل النسا نجو ل .. في العام يـــــالله مره أندير غلا

مانيش كيف زمان .. اللي فات مات وبات ماضي كان
كذاب كان قتلك عل الغلا عصران .. جربت الغلا لمرضي فيه دوا
ونعشق أيام الصغر و النسوان .. فيه بينا ذكرى وملح وما
وعندي حنين كبير في الوجدان .. للصوب الشريف اللي بدون أريا
لكن اليوم خلاص مهما كان .. ما عاد يغريني أسلوب أغرا
الأيام و الضروف إيغيرن الانسان .. الانسان مستحيل إيدير ما يشاء
حتى لو كسنه يعتبر عريان .. إللي يقتنع الايام موش كسا

وما نيش نا هو نا


رد الشاعر : عبد الله بالروين

ما زلت نا هو نا .. حتى أن كان شيبي عل السواد طغا
نشاد عل القدم

ما زلت نا القديم ... حذاي وين ما يطروا اولاف أنهيم
وبخصك وين علي المواهيم .. بانت وجابني لهن الخطا
إيسيلن كما سيلت دموع إيتيم .. أرقاق الغرض علي قديم غلا

ما زال لي أبعاد .. ومازلت ديــــــــــــما عل القدم نشاد
ومازال قلبي بالغلا وداد .. إيزيد فيه عطاه مع الخليل عطاه
وما زلت نعشق سمحة الميعاد .. وأنرايف عليها أن حازها الجفا

مازال في وجّاب .. ومازلت نلقى للسوال جواب
ومازلت كي يخطر نظيف الناب .. الأنظار يهطلن هطلت نزيل أشتا
ومازال عل الماقي إيحوس ضباب .. إحذاي وين ماعاشق اولاف طرا
ومازلت حامل في الكنين عذاب .. ولا تنكتب قولة أفلان شكا
ومازال في قلبي وميض شباب .. لولا الشيب اللي الراس غزا
فيا إيكر لجيهة الشياب .. كرة ضعيفة من أحذا الاقوا

مازلت رغم القهر .. أنحب الحواري و الطرب و السهر
فالسر عندي ينطرن والجهر .. لولاه ما رينا نهار زها
وبيهن أنداوي في كواين دهر .. قديمات في ماضي قديم مضا

ما زلت واسع بال .. ومازال عقلي للغلا ميال
ومازلت نعشق فالحياة الجمال.. إللي بعده ما نقدر أنطيق حياة
وما زلت نقدع في وعر الاجبال .. أنخاطر علي صيدي بدون عنا
وعندي شرك كمين ريم غزال .. أحذاه وين ما يبرم عليه لوا

ما زال عندي صبر .. ومازلت ننبر في الحجايج نبر
وعندي سهاري كي حساب الجبر .. أن سهريت من خده بنور ضوا
وما زلت نكره في السنين الغبر .. إللي قضيتهن بعد العزيز بكا
ونكره الناس ان عايرو بالكبر .. تمنيت ما عمر الشباب فنا
حكاية تريدلها أوراق وحبر .. وكاتب أنسانى فى العلوم قرا
وتمنيت بعد الموت ناجد قبر .. فيه نندفن نا و العزيز سوا

وما زلت نا هو نا .. حتى أنكان شيبي عل السواد طغا
نشاد عل القدم


رد الشاعر : احمد عبدالرحمن الشلوي

مازلت نا هو نا .. نصون الغلا ماني عديم وفا
أن جيت للوفا

مازلت صاين ودك .. ومازلت طامع فالزمان يردك
ندزوا وجاهه يطلبو في يدك .. يجيني بعد ياسات ومراجا
وانتي فالسماحة ما لقينا ضدك .. علي كثر ما رينا وجوه نسا
سماحة عيونك والغثيث وخدك .. عرش الجمال تصوقريه بها
ما تلوم هاللي ينحرم من ودك .. ان كان كمّله عمره عليك ابكا

مازلت فيك نراجي .. ومازلت كامي لوعتك ونداجي
يمكن لصوبي والغلا تحتاجي .. تجيني وتلقيني نظيف نيا
مع الزين نستانس يروق مزاجي .. والعفن ماعندي عليه عبا
علي شان بومضحك مثل العاجي .. نخش الخطر لو تم فيه دما
خطرها لقصقالك نعود ادراجي .. هو اللي مسببلي نصيب كدا
فيك وسط طايب حركته رجراجي .. ومضحك علي لون الجليد سوا
وما نظن نبقى من سريبك ناجي .. الله وعلم تبقى لي سبايب دا
غباوين في شانك نويت نقاجي .. لو يبقو جميع الناس لي عدا

ماولت وافي عهدي .. ومازال صوبك في مكانه عندي
ومازلت صادق في الغلا من جدي .. مجروح وانتي في غلاك دوا
وراه الخيانة عالبنادم تردي .. تدعي الناس يصيب فيه دعا
وشين النوايا عالعرب والحسدي لا بد ما يشقى ينال جزا
في الآخره وين الرحيل يعدي .. يندم على مادار فالدنيا

مازلت في جرناني .. ومازلت حاملهن هموم زماني
ومازلت في موج العزيز انعاني .. لا بان لامنه هناك نبا
حال العدو في غيبته خلاني .. مرايف وما عندي عزوم قوا
كنيبه بعد ياسات يبقى داني .. ويقسم ويبقى من حلالي نا
وننسى مع زوله جميع احزاني .. وما عاد يذّكر معاي شقا

الشاعر عبد الرحمن بو امغيّب الصنقري ( من مطروح )

مازلت نا هو نا ساس الحيا نبني عليه ابنا نظيف معدني

مازلت لك حمال
ومازال في عقلي عليك دلال
ومازلت واخذ في قولة قال
ومازلت مانخدم امفيت ابها
ومازلت تقلب كل يوم بحال
ومازال عندي فيكباب رجا

مازلت نا القديم
صاحب الجفا نقدر عليه انصيم
لاعيب لاسيات لاتحريم
لامعاتبه لاحس لاضوضا
ولا ليش لا كنك ولاتكليم
كثر الحديث ايسير فيه خطا
ولانريد نفتح باب سين وجيم
ولاخير ف الصاحب ان كان شكا
خزازين عقلي نين دارن ريم
من كثر السوايا طافحات منا
صابر ونراجي في رجا الكريم
يمكن اللي دردي اتعود صفا

مازلت كي ماكنت
لابعت صاحب لاصديقي خنت
نظيف الصداقة كان نا قارنت
من غير عله خالصه بوفا
وننشد لوجه الله كان نشدت
علي صاحبي حتى ان كان جفا
ومازلت نقفزلك بعد ما تقت
لانريد شكر ولانريد ثنا
ومازلت نبذل كل ماكونت
ومازلت نفرح للغريب ان جا
ونضيف الضايف لو عشا شحتت
انبات في مسره كامله وهنا
مضغاتني ليام نين ابطلت
وعندي ملاها والفراغ سوا
وكثر رفق لجواد منها خذت
امبادي بدينا بالحياه ابها
رصيدي قوي ومازلت مسع لنت
وغنا النفس ماكيفه اهناك اغنا
وكلمة الحق انقولها لوكنت
بين المشانق والسيوف احما
متمسك علي مبدا وبيه امنت
حتى وهن اظروفي هكذي وكذا
واصحاب المظاهر والنفاق اكرهت
دساسة الدسايس والوجوه اقوا
ووجهم اتقول اكداس طول الوقت
من كثر المعاصي شايلات صدا
كرارة احبال كبار فيهم دخت
وقلة ضمير وفشخره وريا
وان سالوك ماليله هنيه بتت
وان سلتم ماعد خلاصك جا
وان طالبتهم تبقى اتقول اغلطت
تاخذ كريهه سنه رد اكفا
يغفرلي الله ان فيهم خضت
علي عد مامنهم لحظت اخطا
الله يبعد الشيطان واستغفرت
مغير للنذاله مالقيت وعا
الله ينعلك يا ابليس وين حضرت
واينعل اللي كيفك سوا بسوا
وصلي ع الهادي واقول امنت
رب الخليقه واطلبوا الهدا
مازلت نا هو نا ساس الحيا نبني عليه ابنا نظيف معدني


قصيدة اخرى للشاعر عبد الرحمن بوامغيّب

مازلت نا هو نا علي كبر سني عفن في اخطا امغير بينا

مازلت موش تمام
ومازلت خاطي في بعض لحكام
قليل وين ماناقف ورا الامام
وقليل وين ما نوعا الفجر قرا
وقليل وين مانزعل علي الاسلام
وقليل وين دمعي ع الخدود جرا
شباب الحجاره جابهم الاعلام
الواحد اهدومه غارقات ادما
ولاجابني شايب كبير انظام
ولامشاعري حرك صريخ انسا
وقصة الدره فلم م الافلام
وواجد مثيله مانباهم جا
قاعد وانصنت انريد سلام
قابيتني جاهل وفي غبا
القدس راه مايجيبه مضيغ كلام
ايريد يوم دخانه اتقول ندا
ياربنا ياملك ياعلام
ان تنصر الحق الظلم راه طغا

امغير بينا مازلت نا هو نا علي كبر سني عفن في اخطا

مشاركة للشاعر عقوب الشرمي :

اسمعنا شريط وفيه قول* ارحومه
كلامه اعلاج وللمريض دوا
جميع من اسمع بوداد حط اختومه
لاايعارض لايقول خطا
مايطّلع الكلمة اللي مذمومه
بوداد زين اللفظ كان حكا
او كمان خوه من غادي ايعد اللومه
ماايرد ع الطالب بقولت لا
العمده شهير او سيرته مفهومه
الله يرحمه راجل قليل افدا
ان قال الكلام اتايده الحكومة
وفوق من قراره يختموا القضا
ان شاء الله في قبره هني في نومه
تدعيله العالم كل وان صلا
لاكن الدنيا ما عليها لومه
ما ادوم للانسان دار فنا
اومازلت مالي رده
اومازلت نفزع عند وقت الشده
او مازال في قلبي صفا وموده
وانحايل ع اليتيم كان بكا
ساس المحنه ماانريد انهده
وانحمل صاحبي حتى ان كان جفا
او عمر الجفا ماتم كي الموده
اوربك خلق لطباع موش سوا
اومازلت نا صبار
او مازلت نتقّى انريد عمار
او نبقى انطفي كي اتشيط النار
وانكافي اصحاب العيب بالحملا
او ياما اشربنا ف الزمان امرار
او ياما اضحكنا في ايام زها
هذا خبر ريته صحيح وصار
وارحومه حكابه ف الكلام بدا
ارحومه كلامه موعضة ووقار
ارحومه امعلم ما ايريد وصا
اومازلت ما نذارا
والضيف نعرف واجبه واقدارا
او نشكر اصحاب العرف والشعارا
في كل يوم وكل ليل مسا
اومازلت نا كي قبل م الصبارا
وبفعل العطيبه ما انريد اكفا
او مازلت صاحب جونه
او جاري انخاف عليه نوقف دونه
وانعامل العالم كل لون بلونه
او ما القيت كيف الصبر باب نجا
اولانقص عندي ف الرفق لاخونه
صاحب صداقا كامله بوفا
مازلت في معدالي
ومازال طبعي كيف قبل وتالي
اومازلت ع العايب انطّول بالي
كنيب ايتندم ويهديه الله
اهناك ناس هاديهم الله العالي
واهناك ناس من غادي اوجوه شقا
افيهم اللي مغضوب عقلا دالي
لايفيد صاحب لايكيد اعدا
اوفيهم اللي تلقاه كي الهلالي
يخبربك طريق الخير في الظلما
مازلت نا كي قبل
او مازلت ماودي انكر الحبل
او لاخير ف اللي يعتبوا ع الهبل
واللي لااجوّل لامشا لاجا
اللي مايبانوا يوم دق الطبل
فزعهم امغير اعياط كي النسا
منحاش* جا بولبده ابتاع الزبل
علي وطنا عيط وادير عزا
نفسي انشوف الخيل وامراح ابل
او نفسي انراعي وطن فيه اعلا
اومازلت كيف زمان
او نكره اللي كذاب والفتان
وانصاحبت صاحب ماعليا هان
اوكل يوم في قلبي ايزيد غلا
او لاخير في راجل طويل السان
وجابد سريب الناس كل ضحا
غالي علي البر والوديان
او نجع البوادي في اوطان خلا
رجاله عصارا صيدهم غزلان
والله طير الحباره امعا قطا
لاعندهم ناموس لاذبان
او اديوك م البيضا اتجيب الدا
وانجاهم الضيف ايذبّحوا خرفان
هاضول ناس من غادي اصحاب عنا
وسلامي علي لجواد والفرسان
اعداد ماقرا قاري كتاب تلا
واخيار الكلام صلاه ع العدنان
وهي الفايده نختم القول ابها

*******************************************

تعقيب على رد الشاعر المرحوم روفة الدعبوب
يبدا رد الشاعر من قوله:
ياحاج نصبر صبر القيت علتى لاهى مرض لى كبر
حتى والحجايج بين شكل اوبر ودك على روحك ادير عزا
الا امغير جابرنى زمانى جبر القل شين ماتنظر امعاه زها
ام الميامى كيف ندع الحبر ربيع بغو مى جروة اعروق نما
تعيش فى عفا لى قدع لاهى نبر لى محادفه لاهى طقيق عصا
ترافق اللى مالدهر واخذ عبر تنسا بها ماضى شقا وكدا
صعيبة عللى جن ايامه غبر تراود ثنايا خاطره انغفا
احلام كيف من بدل التبن بتبر وعواطف انخاف الانموت بها
وفى الاخرة هللى رقد فى قبر داير طويل الياس فيه رجا

ياحاج خذ مشحاطة غلا بوغثيث يكيد فى مشاطه
حتى النظر عنا اليوم تواطا مغير قهر للخاطر وضيق اوعا
لايريد دنوه لايريد اخلاطه ما من دوا تما سبايب دا
رسم سير خطتنا معاه تخاطا متوازيين مابينا هناك لقا
والوقت زاد سارتله معاه قحاطه لعياله ايطرد فى غدا وعشا
احتاج باع بندقته وباع احلاطه واحذاه بردن ما من اسراب قطا
خده على كفه غفر مرباطه سليم كان روح ما خذا وعطا
مالقل عمرنا عدا حشاك سماطه وشيب الحسايف فى الخدود دبا......

هذا هو الرد الصحيح والكامل للشاعر المرحوم روفة الدعبوب.
اما الابيات التى ذكرها ابن البادية وعبدالحفيظ والتى سبقت هذه الابيات فهى للشاعر الكبير (ادريس الشيخى) والتى يقول فيها:
ياحاج فرقت نا فى بوغثيث اتقول غيم اشتا رجاى منقطع
ياحاج فرقت حالى...... الى اخر القصيدةالتى يقول فيها:
ياحاج دونك برح جظار وياس مالاصلى احذاى امرح
لانغبت نشغل لانجيت انفرح الكبر شين ماكيفا هناك اعدا
ولاعاد ازنادى من جديد ايجرح نين البحر ينزح يعود ثرا
يفوت البحر الابيض الحوت ايمرح على قارة الغرسة وسلك امنا
وتبيض الغزله والدجاج ايطرح انصار هكذى يبقا اهناك رجا


فكان رد الشاعر المرحوم روفة الدعبوب على هذه الابيات

شكرا للاخ/الفهد على هذا التصحيح ، فعلا روفه كان رده على الشاعر "ادريس الشيخي" ، ولقد سمعت ذلك من "روفه" نفسه ، الله يرحمه ، حيث قال لي ان راس البيت الوارد بقول روفه هو للشاعر "ادريس الشيخي" .

الغرض ليس من القائل فقط بل هناك اخطاء فى بعض الكلمات المنقولة من الابيات
فمثلا:
لامحادفة (وليس لامحاوفة)
طقيق(وليس طفيف)
التبن بتبر(وليس بشبر)
وفتاح برج (وليس شبر)
لايريد دنوه(وليس دموه)
لا ادرى هل هى اخطاء املائية اثناء الكتابة ام منقولة كما هى.
الامران فيهما نقل خطاء لابيات لشاعر كبير ومتمكن الامر الذى لايختلف عليه اثنان مما يظهر ابياته ضعيفة وغير مفهومة فارجوا ان تكون الرسالة وصلت
وين الرقابة يا مشرف منتدى الشعر.
تقبلوا نقدى واحترامى.....

مشكورين جميعا على مروركم والمشاركه
وبالاخص اخي ابن الباديه واقول له بان هذه ملحمه
وفيها بعض المشاركات غير منشوره
ونامل ان يمدنا بكل مايجد من هذه الملحمه
----------------------------------------
مشكورين مره ثانيه