دير رايك اوشوف اللي ايسير

السلام عليكم ورحمة الله وبركاته ..


كيف حالكم أن شاء الله في خيار الخير


والله بأختصار حبيت يكون فيه مكان يجمعنا مع بعض


كعيله وحده ..ويسهل فيه التهدريز علي بعضنا


والسوال علي أي حد يغيب علينا أو نفتقدوه


أو اي شي تبوه مثلا أقتراح لهذا القسم


اي شي مش عاجبكم قولولي عليه


بالك نقدر أنغيره..


وهذه بأختصار الفكره


وأنشاء الله تعجبكم


في امان الله




أول البادي بسم ربي الهادي خالق الكون والناس فيه اعمار
وثاني ابياتي معطره بصلاتي عليك يالنبي بو فاطمه المختار
وثالت كلامي بادب واحترامي نسلم على لاصحاب والحضار
نسلم عليهم خاطري نا فيهم جلسه معاهم مجليه لاكدار
اكدار ومصايب منها الخاطر طايب يقصر كلامي نعبره ماصار
صاير وصاير في الكنين الحاير صايف ربيعه بعد كان اخضار
ربي يصبر شي كان نخبر شيا يفتت صلبها لاحجار
دنيا غريبه وين حد تصيبه يعيش في تعاسه وظلم واحتقار
وكانهي واتاته يعيش طول حياته مرتاح ولو طبعه م لاشرار
وعندي مثايل موش قوله قايل خساره سميته ف الكرم ماصار
نفسه خسيسه مخبيه الدسيسه وفالوجه يضحكلك عليك يغار
وفيه الكريم اللي غلاه سليم يصبي معاك وما يدير اعذار
تطلب رفقهم دوم ماتفارقهم ربه اجواد وما يديرو العار
واصحى الغلطه ما اديرش خلطه واللي سفيه اديرله مقدار
والها بصلاتك قبل يوم وفاتك وادعي لربك في صلاه افجار
ونا دعايه لربنا مولايه ايجيب الزها يجلي على لاكدار
يجيب السعاده وفرحتي بزياده كنه شفا ريدي ربيع الدار
ملي طراله دمعتي منهاله هكي العالي رادله لاقدار