فكر اكويس قبل ما اتجاوب (الجزء الثالث)

من طرف محمد اللافي 2011-12-23, 10:51 pm

طبعا كلكم عارفين قصة كتيبة نداء ليبيا ولي كانت في بنغازي ولي كانت وراء الخطف وسرقه السيارات والتفجير الي صار عند المحكمه والتفجير الي صار في تبستي واخر شي الهجوم علي مكان اسرا الكتائب وتحريرهم ومعاهم ناس في اللجان الثورية ومنهم قبعات الصفراء المهم الزبدة الي كانو في بنغازي من اتباع شكير والنظام السابق والهجوم صار يوم اغتيال اللواء عبدالفتاح في الليل ونفذت كتيبة النداء وبقدرت قادر مافيش اي مقاومة كأنهم زاردين او في تنسيق مسبق مع شخص معين والله اعلم
المهم ثاني يوم في الفجر توكلو الشباب من الجيش ومجموعه من قوات حفتر ( انا شفتهم ابعيني ) ومعاهم الثوار وسقط عدد من الثوار شهداء بأذن الله الي متاكد منهم 4 وفي الي ايقول 7 المهم في شهداء ان شاء الله حتي ولو جريح واحد دمه عندنا خير من الدنيا ولي فيها
المهم صارت بعدها مداهمات وتمو يمسكو في باقي الشبكة ولي وصلت لعند طبرق
والعدد وصل 980 فرد من كتيبه نداء ليبيا
فجأة في ليلة بدون ضي قمر تشكل لجنه و وكيل نيابه وهيأة تحقيق و يصدر قرار بأفراج عن جميع افراد الكتيبة بدون الرجوع حتي لي اولياء الدم الي استشهدو علي يوم المداهمه او الي استشهدو علي ايدين القبعات الصفراء ... طبعا بعلم ومباركة المجلس الموقر راعاة لله وحفظة
السؤال
من المستفيد من اطلاق ناس عندهم اتصال مباشر مع النظام وفي رقبهم دماء شهداء وخراب مباني حكوميه وخطف عدد من الاطفال والبنات والسيارت في بنغازي ؟
ولماذا لم يرد المجلس الي هذة اللحظه علي سؤال اهالي بنغازي بعد ان احتجو علي هذا التصرف وطالبو بالتحقيق ؟