أزمة السيولة

من طرف طرابلسيةحرة 2012-01-15, 9:19 pm

السلام عليكم ورحمة الله وبركاته عندي موضوع وأهم موضوع ضروري نطرحوه ونتناقشوا فيه ومش حنسيبوه ولانسكتوا عليه لين ينحل وهو أزمة السيولة في كلمه إبدينا نسمعوا فيها هلبه هيا سيوله و قف ع مصرف يقولك سيوله وتتفرج ع تلفزيون يقولك سيوله وإحنا الحمد لله دولة غنية ولابتقولوا معمر خنب الفلوس وهربهم برا ليبيا وين 23 مليار يلي لقوهم في مصرف طرابلس المركزي هذا أول عرض والله أعلم بباقي المصارف والفلوس يللي يلاقوا فيهم في الصحراء الأطنان الذهب ولاتحسابوا الشعب الليبي راقد ع وذانه يعني الشي واضح الصحاح يخنبوا في الفلوس يعني إحنا حولنا معمر وجونا معمرات ثانيين ع قولة المثل الليبي هارب من الغولة طاح في سلال القلوب به كان مافيش وين فلوس تصريف دولار لي مدايرين عليه زحمه إتقوا الله في أنفسكم ياناس راهوا فيه ناس مش لاقية باش تأكل (من صلح أمر دينه صلحت أمور دنياه)وإنتم قاعدين قاعدين ماشيين ع خطى معمر كثرت الرشاوي والواسطات والخنبة طرابلس متحررة من شهر 8 وأزمة السيولة قاعدة مانحلتش والمصارف ديما زحمة ولما تمشي تسحب ماتسمعش إلاكلمة مافيش سيولة فى القريب العاجل سوف ينفجر غضب الشعب عن الوضع السلبى الراهن إلى متى إحنا هكي يقولوا مافيش سيولة وهما يصمصروا في الدولار لحساباتهم الخاصة ويخنبوا في الفلوس يجب على الحكومة وبنك ليبيا المركزي سرعة اتخاد الاجراءات الى اعادة الثقة الى البنوك لكي يتم ارجاع الاموال من المواطنين وايضا تحديد سعر صرف العملة الاجنبية الحقيقي وهناك عدة خطوات لا نعتقد ان الخبراء الليبيين لا يعرفوها شفتوا أيام الثورة معمر كيف كان مسيرها والناس كانت تسحب في فلوسها عادي ومافيش حد كان يشكي من أزمة السيولة وتوا الناس كلها تشكي سيولة وغلاء الأسعار فيه ناس مش لاقية باش تأكل وبدأت القراية توا بالله عليكم العيلة يلي ماعنداش إلا معاش واحد باش بتأكل وباش بتشري أدوات مدرسية لصغارها والمصروف اليومي متاع الصغار الناس تشكي من غلاء الأسعار مافيش رقابة كل واحد امدير مايبي فاهمين الحرية بالغلط تي بالله عليكم ديروا رأي وساد خنبة وواسطات ورشاوي فدينا راهوتوا بالله عليكم شن وضيفتها الحكومة الجديدة ولاغير كلام بس نسمعوا في أسمائهم ومافيش حد دار حاجة لتوا قداش ليها الحكومة متشكلة بلافائدة وحق ربي ماواجعني إلا دماء الشهداء يللي بأفعالكم هادي السرقة والرشاوي والواسطات وكل واحد يشوف لمصلحته ويسرق في الفلوس ويحط فيه لحسابه الخاص بتضيعوها دماء الشهداء هباء إتقوا الله في أنفسكم وفكروا في الناس يللي بتموت {وتعاونوا على البر والتقوى ولا تعاونوا على الإثم والعدوان} قاعدين الناس متاثرة بمعمر وخايفة ومايعلموش ان فلوسهم توا رايحات و فرحانين بالطوابير ف المصارف يحسابوها ازمة بالعكس هادو يخنبو فيكم توا وصدق الي قال انه شعب خناب حت وكان تعطيه فلوس ع كبر البحر مزال يبي يخنب مع العلم تحسابونا مانعلمو بشي وكيف تصرفو ف الدولارات وبقداش تبيعو فيهم ومن الي ياخد فيهم وتبو اتبات مدير مصرف المركزي كل يوم 30 الف يصرف فيهم هدا كله مسجل ف قوائم بس مانبوش البلاد تفسد كل شي ف وقته حلو والي خنب معروف ومسجل عنةالله عليكم ياسراق وأكليين أموال الناس كل واحديخنب وإيدس في حسابه الخاص وحسابات أولاده وأقاربه وطزفي الشعب الفقيرالمسكين تي ليبيابالكامل تبي تصفيةمن هالنماذج الخنابة لأنهم زودوها هلبه خنابين وحق ربي فيه ناس حاطينهم في مناصب وهماأصلامش كفؤاللشئ هذاوتاريخهم وملفاتهم سود كمشةسراق مخانب إحناكان نبواهكي مفروض خلينامعمروخلاص علاش إمدايرين ثورةشن تحسابوا الناس ساكتة يعني راضية ع الوضع لا والله سكتة تعطي في فرصة يمكن يتصلح الوضع ولما يتفجروا راح يتفجروا في مرة واحدة ويديروا ثورة ثانية لكن الباين ماينفعش معاكم الفرص وإنتم قاعدين تسرقوا وحق ربي شئ يحرق الدم هكي بتدمروا كل شئ بنيتوه وبنوه الثوار الأحرار وبتضيعوا دماء الشهداء هكي بتشوهوا صورة الليبين الأحرا وبتشوهوا سمعة ثورة 17 فبراير المجيدة

من طرف **عبدالحفيظ عوض ربيع** 2012-01-16, 7:54 am

لكى الشكر اختى على هذه المشاركه ونامل ان تقال كلمه وتنفذ على الفور فى الموعد بدل عن قريب التى نسمعها كثيرآ

أزمة السيولة

أزمة السيولة

رد: أزمة السيولة