صالح بو عياد الشهيبي ...قولولها

قولولها تبعث معاذيرها - وكثرن أمواجعها وكثرن اعذارها
وفي كم طعنة غدر من خناجيرها - طلبت الدواء ع الجرح وحطت ابزارها
قولولها شاهد الله وضميرها - علي صلحنا وشهدوا أمعاي اكبارها
قولولها ما حلفت ماعاد انديرها - وليش أطعنتني قبل يطلع نهارها
قولولها مليان كثر خيرها - في باذره بيمينها ويسارها
أمواجع انهلب هذي واتجي غيرها - ما ف المواجع موجعه نختارها
قولولها اللي اهناك في مطاميرها - اللي ميرتها لي ساع تمتارها
قولولها ما نصح نبقى عشيرها - عشرة نكد ف الريق عاقد امرارها
قولولها من تو خاطي مصاديرها - يغنيني الله علي موية ابيارها
قولولها شن معنى تفاسيرها - ردت علي جواب جيب أبذارها
قولولها مازال ذاهب خبيرها - وعليها كذب تقازها و شبارها
قولولها مالوقت تأخذ محاذيرها - راه كل دار امصادرتا دارها
قولولها يقطع الله تدبيرها - وذاهبة انكان أمتبعه دبارها
قولولها في شئ واجد ايعيرها - كسر الخواطر راه واعر اجبارها
قولولها الأعذار حسرت زكاكيرها - وطاح من وجه الحقيقة اخمارها
قولولها خلاص عرفت جملة تفاكيرها - قولولها خلاص عرفت لعبة إقمارها
قولولها قريت السر في مناشيرها - قولولها حليت عقدة اسرارها
قولولها لاهي طيري ولاني طيرها - لا حطت أنحط ولا انطير بمطارها
قولولها كي اتريدني نشتشيرها - وهي ما عليّ اترد فيهن أشوارها
قولولها قزون نحرق حاذيرها - كيف ما تريد تحرق حاذيري بنارها
~~~~~~~~~~~~~~~~~~~~~~~~~~~~~~~~~~~~~~~~~

صح لسانك يا اسماعيل